காஞ்சியில் போதி தர்மருக்கு நினைவிடம் !!

சுமார் 1500 வருடங்களுக்கும் முன்பு, சீன தற்காப்புக் கலையை உருவாக்கியவரும், மிகப் பெரிய மருத்துவ நிபுணருமாக விளங்கிய போதி தர்மருக்கு, அவர் பிறந்ததாக கருதப்படும் காஞ்சிபுரத்தில் நினைவிடம் அமைக்க சீன, ஜப்பான் நாட்டைச் சேர்ந்த சில அமைப்புகள் முயற்சி மேற்கொண்டுள்ளன.  

இந்த போதி தர்மர் நினைவிடம் சென்னையை சேர்ந்த பண்டைய கல்வி ஆய்வு நிறுவனத்தின் மூலம் கட்டப்படுகிறது. இது தொடர்பாக பேசுவதற்காக, சீனா மற்றும் ஜப்பானை சேர்ந்த சில அமைப்புகள், சில தினங்களுக்கு முன்பு பண்டைய கல்வி ஆய்வு நிறுவனத்தின் இயக்குனரான ஜான் சாமுவேலுடன் ஆலோசனை நடத்தியது. இந்த ஆலோசனைக்கு பிறகு, சாமுவேல் அளித்துள்ள பேட்டியில் கூறியிருப்பதாவது,

விரைவில் காஞ்சிபுரத்தில் போதிதர்மர் நினைவிடம் அமைக்கப்பட உள்ளது. இந்த நினைவிடம் சீனா மற்றும் ஜப்பான் நாட்டைச் சேர்ந்தவர்கள் அளிக்கும் நிதியுதவி மூலம் கட்டப்படுகிறது. சுமார் 2 ஏக்கர் பரப்பளவில் கட்டப்படும் இந்த நினைவிடத்தின் கட்டுமான பணிகள் முடிவடைந்தால் உலகத்தரம் வாய்ந்த புத்த மத தத்துவ மையமாக இது உருவெடுக்கும். 

இந்த நினைவிடத்தில் சீனாவின் சோங்ஷான் மலையில் 9 வருடங்கள் தியானம் செய்த போதி தர்மருக்கு அந்த மலையிலிருந்து செதுக்கப்பட்ட அவரது திருவுருவ சிலையை நிறுவப்போவதாக சீனக் குழுவினர் தெரிவித்துள்ளனர். மேலும் இந்த நினைவிடத்தில் ஜப்பானில் வடிவமைக்கப்பட்ட நினைவு தூண் ஒன்று நிறுவப்பட உள்ளது. 

இந்த மையத்தில் சீன தற்காப்புக் கலை, குங் பூ மற்றும் தியான வகுப்புகள் நடத்தப்படும் எனவும் தெரிவிக்கப்பட்டுள்ளது.