சென்னை சென்ட்ரல் ரயில் நிலையத்தில் குண்டுவெடிப்பு : ஒருவர் பலி !! 12 பேர் படுகாயம் !!

சென்னை சென்ட்ரல் ரயில் நிலையத்தின் 9 வது பிளாட்பாரத்தில் இன்று காலை நிகழ்ந்த குண்டுவெடிப்பில் ஒருவர் உயிரிழந்ததாகவும், 13 பேர் காயமடைந்ததாகவும் தகவல்கள் வெளியாகியுள்ளன. 

சென்னை சென்ட்ரலில் உள்ள ஒன்பதாவது பிளாட்பாரத்தில் இன்று காலை 7.10 மணி அளவில் பெங்களூரிலிருந்து சென்னை வழியாக கவுகாத்தி செல்லும் கவுகாத்தி எக்ஸ்பிரஸ் ரயில் வந்தது. 

கவுகாத்தி எக்ஸ்பிரஸ் ரயிலில் இருந்து பயணிகள் இறங்கி கொண்டிருந்த போது, அந்த ரயிலின்  எஸ்-4 மற்றும் எஸ்-5 பெட்டிகளில் அடுத்தடுத்து குண்டுகள் வெடித்தது.

இந்த குண்டு வெடிப்பில், ஆந்திர மாநிலம் குண்டூரை சேர்ந்த ஸ்வாதி என்ற 22 வயது இளம்பெண் பலியாகியுள்ளார். மேலும் 12 பேர் படுகாயமடைந்துள்ளனர்.

இந்த குண்டு வெடிப்பில் படுகாயம் படுகாயமடைந்தவர்கள் சென்னை ராஜீவ் காந்தி மருத்துவமனையில் சிகிச்சைக்காக அனுமதிக்கப்பட்டுள்ளனர். இவர்களில் இரண்டு பேரின் நிலைமை மிகுந்த கவலைக்கிடமாக இருப்பதாக மருத்துவர்கள் தெரிவித்துள்ளனர்.  

குறைந்த சக்தி குண்டு

வெடித்த குண்டுகள் இரண்டும் குறைந்த சக்தி கொண்டதாக இருந்ததால், பாதிப்பு அதிக அளவில் ஏற்படவில்லை என போலீஸ் அதிகாரிகள் தெரிவித்தனர்.

ரயில் சேவை நிறுத்தம்

இந்த சம்பவத்தை தொடர்ந்து சென்னை சென்ட்ரல் ரயில் நிலையத்தில் ரயில் சேவை நிறுத்தப்பட்டது. புறநகர் ரயில் சேவையும் நிறுத்தப்பட்டது. ஒரு மணி நேரத்திற்கு பின்னர் ரயில் சேவை மீண்டும் தொடங்கும் என தெரிவிக்கப்பட்டுள்ளது. மேலும் எழும்பூர் ரயில் நிலையத்திலும் பாதுகாப்பு பலப்படுத்தப்பட்டுள்ளது.

உதவி எண் அறிவிப்பு

சென்னை சென்ட்ரல் நிலைய குண்டுவெடிப்பு குறித்து தகவல் அறிய தொலைபேசி எண் அறிவிக்கப்பட்டுள்ளது. 044-25357398 என்ற தொலைபேசி எண்ணில் தகவல் தெரிந்து கொள்ளலாம்.

நிவாரண தொகை அறிவிப்பு 

குண்டுவெடிப்பில் உயிரிழந்த பெண்ணின் குடும்பத்திற்கு ரூ.1 லட்சமும், படுகாயமடைந்ததோருக்கு ரூ.25,000, லேசான காயமடைந்தோருக்கு ரூ.5,000 இழப்பீடுவழங்கப்படும் என்று அதிகாரி ஒருவர் தெரிவித்தார்.