தந்தை வழி உறவுகள்

மகனுக்கு தனது தந்தை மூலம் வரும் உறவுமுறைகளே தந்தை வழி உறவுகள் ஆகும். தந்தை வழி உறவுமுறைகளும் அவற்றிற்கான விளகங்களும் பின்வருமாறு :

பெரியப்பா:

மகனுக்கு  தந்தையின் உடன் பிறந்த சகோதரங்களுள் மூத்த ஆண் சகோதரன் பெரியப்பா என்று அழைக்கப்படுவார்.

பெரியம்மா:

மகனுக்கு தந்தையின் உடன் பிறந்த சகோதரங்களுள் மூத்த ஆண் சகோதரனின் மனைவி அதாவது பெரியப்பாவின் மனைவி பெரியம்மா என்றழைக்கப்படுவார்.

சித்தப்பா:

மகனுக்கு தந்தையின் உடன் பிறந்த சகோதரங்களுள் இளைய ஆண் சகோதரன் சித்தப்பா என்று அழைக்கப்படுவார்.

சின்னம்மா :

மகனுக்கு தந்தையின் உடன் பிறந்த சகோதரங்களுள் இளைய ஆண் சகோதரனின் மனைவி அதாவது சித்தப்பாவின் மனைவி சின்னம்மா (சித்தி) என்றழைக்கப்படுவார்.

சகோதரன் :

ஒருவரின் பெரியப்பா அல்லது சித்தப்பாவின் மகன் அவருக்கு சகோதரன் முறை ஆவார். அச்சகோதரன் தன்னை விட வயதில் மூத்தவராக இருப்பின் அண்ணன் என்றும் இளையவராக இருப்பின் தம்பி என்றும் அழைக்கப்படுவார்.

சகோதரி :
ஒருவரின் பெரியப்பா அல்லது சித்தப்பாவின் மகள் அவருக்கு சகோதரி முறை ஆவார். அச்சகோதரி தன்னை விட வயதில் மூத்தவராக இருப்பின் அக்கா என்றும் இளையவராக இருப்பின் தங்கை என்றும் அழைக்கப்படுவார்.

அத்தை:

மகனுக்கு தந்தையின் உடன் பிறந்த சகோதரங்களுள் பெண் சகோதரி அத்தை என்று அழைக்கப்படுவார். தகப்பனாரின் அக்கா பெரியத்தை என்றும் தகப்பனாரின் தங்கை சின்னத்தை என்றும் அழைக்கப்படுவார்.

மாமா :

மகனுக்கு தந்தையின் உடன் பிறந்த சகோதரங்களுள் பெண் சகோதரியின் கணவர் அதாவது அத்தையின் கணவர் மாமா என்றழைக்கப்படுவார். பெரியத்தையின் கணவர் பெரியமாமா என்றும் சின்னத்தையின் கணவர் சின்னமாமா என்றும் அன்புடன் அழைக்கப்படுவர்.

மைத்துனன் :

அத்தையின் மகன் மைத்துனன் என்றழைக்கப்படுவார். மைத்துனன் என்ற முறையை பேச்சுவழக்கில் மச்சான் என்றும் அழைப்பர்.

மைத்துனி:
அத்தையின் மகள் மைத்துனி என்றழைக்கப்படுவார். மைத்துனி என்ற முறையை பேச்சுவழக்கில் மச்சாள் என்றும் அழைப்பர்.

தாத்தா:
அப்பாவின் அப்பா தாத்தா என்றழைக்கப்படுவார். இலங்கைத் தமிழரின் உறவுமுறையில் அப்பாவின் அப்பாவை அப்பப்பா என்றும் அழைப்பர்.

பாட்டி :

அப்பாவின் அம்மா பாட்டி (அ) அப்பாயி என்றழைக்கப்படுவார். இலங்கைத் தமிழரின் உறவுமுறையில் அப்பாவின் அம்மாவை அப்பம்மா என்றும் அழைப்பர்.