ஐந்தாம் திருமுறை-43

5.043.திருநல்லம் 

திருக்குறுந்தொகை

திருச்சிற்றம்பலம் 

இத்தலம் சோழநாட்டிலுள்ளது. 

சுவாமிபெயர் - உமாமகேசுவரர். 

தேவியார் - மங்களநாயகியம்மை. 

1496 கொல்லத் தான்நம னார்தமர் வந்தக்கால்

இல்லத் தார்செய்ய லாவதெ னேழைகாள்

நல்லத் தான்நமை யாளுடை யான்கழல்

சொல்லத் தான்வல்லி ரேல்துயர் தீருமே. 5.043.1

  அறிவற்றவர்களே! நமன் தமராகிய எமதூதர் கொல்லவந்தபோது இல்லத்தில் உள்ளவர்கள் செய்யலாவது யாது? திருநல்லத்தில் எழுந்தருளியிருப்பவனும், நம்மை ஆளுடையவனும் ஆகிய பெருமான் கழல் சொல்ல வல்லமை உடையீரேல், உம்துயர்கள் தீரும்.

1497 பொக்கம் பேசிப் பொழுது கழியாதே. 

துக்கந் தீர்வகை சொல்லுவன் கேண்மினோ

தக்கன் வேள்வி தகர்த்த தழல்வண்ணன்

நக்கன் சேர்நல்லம் நண்ணுதல் நன்மையே. 5.043.2

  பொய்ம்மொழிகளைப் பேசிப் பொழுது கழியாமல் துயரங்கள் தீர்தற்கு ஓர் உபாயம் சொல்லுவேன்; கேட்பீராக; தக்கன் வேள்வியைத் தகர்த்த தீவண்ணனாகிய திகம்பரன் உறைகின்ற திருநல்லம் நண்ணி வழிபடுதலே உமக்கு நன்மை.

1498 பிணிகொள் வார்குழற் பேதையர் காதலால்

பணிகள் மேவிப் பயனில்லை பாவிகாள்

அணுக வேண்டி லரன்நெறி யாவது

நணுக நாதன் நகர்திரு நல்லமே. 5.043.3

  பாவம் செய்தவர்களே! மலர் முதலியன விட்டுப் பிணித்தலைக்கொண்ட நீண்ட கூந்தலை உடைய பெண்களிடத்து வைத்த காதலால், அவர்கட்கு ஆளாகிப் பணிகளைப் பொருந்திச் செய்து பயன் இல்லையாதலால், நெருங்கிப் பணி செய்ய வேண்டில் அரன் நெறியே அணுகி திருநல்லம் சென்று வழிபடிவீர்களாக.

1499 தமக்கு நல்லது தம்முயிர் போயினால்

இமைக்கும் போது மிராதிக் குரம்பைதான்

உமைக்கு நல்லவன் தானுறை யும்பதி

நமக்கு நல்லது நல்ல மடைவதே. 5.043.4

  தம்முயிர் தம்மைவிட்டு நீங்கினால் தமக்கு நல்லது; அங்ஙனமே இவ்வுடலாகிய குடிசை இமைப்பொழுது கூட நில்லா இயல்புடையது; உமாதேவிக்கு நல்லவனாகிய இறைவன் உறைகின்ற பதியாகிய திருநல்லம் என்னுந் தலத்தை அடைந்து வழிபடுவதே நமக்கு நல்லது ஆகும்.

1500 உரை தளர்ந்துட லார்நடுங் காமுனம்

நரைவி டையுடை யானிடம் நல்லமே

பரவு மின்பணி மின்பணி வாரொடே

விரவு மின்விர வாரை விடுமினே. 5.043.5

  வார்த்தைகள் தளர்ந்து உடல் நடுங்குவதற்கு முன்பே, நரை உடைய இடபவாகனத்தை உடைய இறைவன் வீற்றிருக்கும் இடமாகிய திருநல்லத்திற்சென்று பரவிப் பணிவீர்களாக; பணிகின்ற அன்பர்களோடு கலந்து வழிபடுவீராக; அங்ஙனம் கலவாதவர்களை நீங்குவீர்களாக.

1501 அல்ல லாகஐம் பூதங்க ளாட்டினும்

வல்ல வாறு சிவாய நமவென்று

நல்லம் மேவிய நாத னடிதொழ

வெல்ல வந்த வினைப்பகை வீடுமே. 5.043.6

  ஐம்பெரும் பூதங்கள் துன்பங்கள் உண்டாக ஆட்டினாலும், திருநல்லத்தில் எழுந்தருளியுள்ள நாதன் திருவடிகளை வல்லவாறு ழுசிவாயநம" என்று தொழுதால். வெல்லுதற்கு வந்த வினைகளாகிய பகை கெடும்.

1502 மாத ராரொடு மக்களுஞ் சுற்றமும்

பேத மாகிப் பிரிவதன் முன்னமே

நாதன் மேவிய நல்லம் நகர்தொழப்

போது மின்னெழு மின்புக லாகுமே. 5.043.7

  மனைவியரும், மக்களும், சுற்றத்தாரும் வேற்றுமைப்பட்டுப் பிரிகின்ற இறுதிக்காலம் வருவதற்குமுன்பே; தலைவன் மேவியுள்ள திருநல்லமாகிய நகரைத் தொழப் போதுவீர்களாக; எழுவீர்களாக; அப்பெருமானே புகலாவான்.

1503 வெம்மை யான வினைக்கடல் நீங்கிநீர்

செம்மை யாய சிவகதி சேரலாம்

சும்மை யார்மலர் தூவித் தொழுமினோ

நம்மை யாளுடை யானிடம் நல்லமே. 5.043.8

  வண்டுகளின் ஒலி பொருந்திய மலர்களைத் தூவி நம்மை ஆளுடையானாகிய பெருமான் உறையும் திருநல்லத்தினைத் தொழுவீர்களாக; தொழுதால் வெப்பம் பொருந்திய வினைக்கடலினின்றும் நீங்கி நீர் செம்மையாகிய சிவகதியினைச் சேரலாம்.

1504 கால மான கழிவதன் முன்னமே

ஏலு மாறு வணங்கிநின் றேத்துமின்

மாலும் மாமல ரானொடு மாமறை

நாலும் வல்லவர் கோனிடம் நல்லமே. 5.043.9

  திருமாலும், பிரமனும், பெருமைமிக்க வேதங்கள் நான்கும் வல்லவர்களாகிய முனிவர்களும் ஆகிய அனைவர்க்கும் கோனாகிய சிவபெருமான் வீற்றிருக்கும் இடம் திருநல்லம். ஆதலால், பொருந்திய காலம் கழிவதற்கு முன்பே, இயலும் நெறியில் வணங்கி நின்று வழிபடுவீராக.

1505 மல்லை மல்கிய தோளரக் கன்வலி

ஒல்லை யில்லொழித் தானுறை யும்பதி

நல்ல நல்ல மெனும்பெயர் நாவினால்

சொல்ல வல்லவர் தூநெறி சேர்வரே. 5.043.10

  வளம் நிறைந்த தோள்களை உடைய இராவணன் ஆற்றலை விரைந்து ஒழித்த பெருமான் உறைகின்ற பதியாகிய நல்ல நல்லம் என்னும் பெயரை நாவினால். சொல்லும் வல்லமை உடையவர்கள் தூயநெறியிற் சேர்வர்.

திருச்சிற்றம்பலம்