விண்மீன் கூட்டங்களை வரைபடம் எடுக்கப்போகும் கையா செயற்கைக்கோள் !!

நமது பூமி, சூரியன் ஆகியவற்றைக் பால் வீதி மண்டலம் என்பது பல ஆயிரம் கோடி விண்மீன்களைக் கொண்டதாகும். இந்த விண்மீன்களின் இருப்பிடம் அவை நகரும் தன்மை ஆகியவற்றை ஒரு வரைபடமாகத் தயாரிப்பது என்பது விண்வெளி ஆராய்ச்சியாளர்களிடையே பெரும் சவாலாக இருந்தது. இந்த சவாலை சாமர்த்தியமாக செய்து முடிப்பதுதான் தற்போது விண்ணுக்குச் சென்றிருக்கும் கையா செயற்கைக் கோளின் பணி.

பால் வீதி மண்டலத்தில் உள்ள கோடிக்கணக்கான விண்மீன்களைக் கணக்கெடுத்து முப்பரிமாண வடிவிலான வரைபடமாகத் தயாரிக்க உதவுவதற்காக தான் கையா செயற்கைக்கோள் விண்ணில் செலுத்தப்பட்டுள்ளது. 

பிரெஞ் கயானாவில் இருந்து புறப்பட்டுள்ள கையா, ஒரு மாதப் பயணத்துக்குப் பிறகு பூமியில் இருந்து சுமார் 15 லட்சம் கிலோ மீட்டர் தூரத்தை அடைந்து, அங்குள்ள பூமியையும் சூரியனையும் இணைக்கும் எல் 2 என்ற புள்ளியை மையமாகக் கொண்ட வட்டப்பாதையில் இயங்கும். இந்த வட்டப்பாதையில் இயங்குவதற்கு எந்த வகையான உந்துவிசையும் தேவையில்லை. எனினும், பிற உபகரணங்களை இயக்குவதற்கான சக்தியைத் தயாரிப்பதற்காக இந்தச் செயற்கைக்கோளில் சூரியசக்தித் தகடுகள் இணைக்கப்பட்டுள்ளன. இதற்காகவே, சூரியனை பூமி மறைக்காத வகையிலான எல் 2  வட்டப்பாதை தேர்வு செய்யப்பட்டுள்ளது. அதே நேரத்தில், கையாவில் உள்ள உபகரணங்களைக் பாதுகாப்பதற்காக சூரி ஒளி மறைப்புத் தகடுகளும் இதில் பொருத்தப்பட்டுள்ளன.

விண்மீன்களைக் கண்காணிப்பதற்காக இரண்டு தொலைநோக்கிகள் கையா செயற்கைக்கோளில் உள்ளன. விண்மீன்களின் நிறை, வெப்பநிலை நிறை, இயங்கும் வேகம் போன்றவற்றையும் பூமியில் இருந்து அவற்றின் தொலைவையும் தீர்மானிக்கும் நவீனக் கருவிகள் இதில் இணைக்கப்பட்டுள்ளன. கையா இயங்கும் 5 ஆண்டுகளில் ஒவ்வொரு விண்மீனும் சுமார் 70 முறை அளவெடுக்கப்படும். இந்தக் காலகட்டத்தில் நொடிக்கு சுமார் ஒரு மெகா பிட் வேகத்தில் 60 டெர்ரா பைட் தகவல்களை பூமிக்கு அனுப்பும்.

இந்தத் தகவல்களைக் கொண்டு 2020-ம் ஆண்டு சுமார் நூறு கோடி விண்மீன்களைக் கொண்ட முப்பரிமாண வரைபடம் வெளியிடப்படும். எனினும் இந்த வரைபடத்தில் இருக்கப்போவது பால்வீதி மண்டலத்தில் உள்ள வெறும் ஒரு சதவீத விண்மீன்கள்தான் என்பது குறிப்பிடத்தக்கது.