எரிவாயுக் குழாய் பதிப்பு: சென்னையில் நடந்த கருத்துக் கேட்பு கூட்டத்தின் 2 ஆம்நாள் விவாதம்.:

கூட்டத்திற்கு தலைமைச்செயலாளர் ஷீலா பாலகிருஷ்ணன் தலைமை தாங்கினார்.

வேலுச்சாமி, விவசாயி : விவசாயத்தை தவிர வேறு தொழில் எங்களுக்கு தெரியாத நிலையில் தற்போது விளைநிலங்களான வாழ்வாதாரத்தை அழித்தால், வாழ்வதற்கான தகுதியை நாங்கள் இழக்கிறோம். இதனால் தற்கொலை செய்து கொள்ள, கருணை அடிப்படையில் அனுமதிக்க கோரி ஜனாதிபதிக்கு மனு அளிப்பதை தவிர வேறு வழி எங்களுக்கு தெரியவில்லை.

சின்னராசு, விவசாயி : என்னுடைய நிலத்தில் குழாய் பதிப்பதற்காக நஷ்டஈடாக ரூ.102க்கு கெயில் நிறுவனம் காசோலை வழங்கி உள்ளது. எங்களுக்கு பணம் வேண்டாம், எங்கள் நிலம் தான் வேண்டும். நிலத்தில் பதிக்கப்படும் குழாய்க்கு எதாவது சேதம் ஏற்பட்டால் 7 ஆண்டுகள் வரை தண்டனை வழங்குவதாகவும் மிரட்டுகின்றனர். எங்கள் நிலத்தையும் கொடுத்துவிட்டு, தண்டனையையும் பெற வேண்டும் என்ற அவலநிலை ஏற்பட்டுள்ளது. இந்த ஆபத்து இதோடு நிற்காமல் எங்கள் சந்ததியினரையும் பாதிக்கும் வகையில் உள்ளதால் மாற்று வழியை கடைப்பிடிக்க வேண்டும்.

பழனிச்சாமி, விவசாயி : எங்கள் நிலத்திற்கு பட்டா, சிட்டா போன்ற ஆவணங்களை அரசு அளித்துள்ளது, நாங்களும் வரி செலுத்தி வருகிறோம். இந்நிலையில் எங்களை கேட்காமல் நிலத்தை சேதப்படுத்தினால், பட்டா, சிட்டாவை அரசிடமே அளித்துவிடுகிறோம் என்னவேண்டுமானாலும் செய்து கொள்ளுங்கள்.

சுதா எம்.பி.ஏ, விவசாயி : விவசாய விளை நிலங்களைத் தவிர்த்து சாலைகள் வழியாக்க் குழாய்களைக் கொண்டு செல்ல தொழில் நுட்ப சாத்திய கூறு இல்லை என்று கெயில் நிறுவனம் கூறுகிறது. 1957ம் ஆண்டு ஆழியாறு அணையிலிருந்து மலைகளை குடைந்து குடிதண்ணீரை அப்போதைய முதல்–அமைச்சர் காமராஜர் கொண்டு வந்தார். அதேபோல் கடலுக்கு அடியில் பல்வேறு வசதிகள் பிற நாடுகளுக்கு கொண்டு செல்லப்படுகின்றன. அப்போது எல்லாம் தொழில்நுட்ப சாத்திய கூறுகள் இருந்த போது, தற்போது நிலத்தில் குழாய் பதிக்க தொழில்நுட்ப சாத்திய கூறு இல்லை என்கின்றனர். தேவைப்பட்டால் விவசாயிகளான நாங்கள் குழாய் பதிப்பதற்காக வரைபடங்களை தயாரித்து தருகிறோம்.

பொன்னுசாமி, விவசாயி : எரிவாயு குழாய் எங்கள் நிலத்தில் பதிக்கபோகிறார்கள் என்று தெரிந்த உடன் என்னுடைய மகனுக்கு பெண்வீட்டார் பெண் தர மறுக்கின்றனர். எனவே இந்த திட்டத்தை மாற்றுப்பாதையில் நிறைவேற்ற வேண்டும். தவறினால் உயிரை விடுவதை தவிர விவசாயிகளுக்கு வேறு வழி தெரியவில்லை.

மு.ஈசன், தமிழ்நாடு விவசாயிகள் வாழ்வாதார பாதுகாப்பு குழு : கர்நாடக மாநிலம் தாபூல் முதல் பெங்களூரு வரையிலான எரிவாயு குழாய் திட்டத்தில், கர்நாடகாவில் மட்டும் சுமார் 400 கிலோ மீட்டர் தூரம் எரிவாயு குழாய் பதிக்கப்பட்டுள்ளது. இங்கு தவிர்க்க இயலாத இடத்தில் மட்டுமே விளைநிலங்களில் வழியாக பதிக்கப்பட்டுள்ளது. அதற்கு முன்பாக விவசாயிகளிடம் கெயில் நிறுவனம், கர்நாடக அரசும் கருத்து கேட்டுள்ளது. வழிகாட்டி மதிப்பிலிருந்து 6 மடங்கு இழப்பீடு வழங்குவதுடன், பயிர்கள் மற்றும் மரங்களுக்கு தனியாக ஒரு லட்சம் ரூபாய் வரை இழப்பீடு வழங்கப்பட்டு, இத்திட்டம் கொண்டுவரப்பட்டது. பெங்களூர் நகரின் சுற்றுவட்ட சாலையில் சுமார் 70 கிலோ மீட்டர் தொலைவிற்கு நடுவிலும் ஓரத்திலும் எரிவாயு குழாய் பதிக்கப்பட்டுள்ளது. அதேபோன்று கேரளா, கர்நாடக மாநிலம் போன்று தமிழகத்திலும் நெடுஞ்சாலை ஓரத்தில் பணியை கெயில் நிறுவனம் மேற்கொள்ள வேண்டும்.

செ.நல்லசாமி, தமிழ்நாடு விவசாயிகள் சங்கங்களின் கூட்டமைப்பு : இந்த திட்டத்தின் ஒரு பகுதியான கொச்சின் – மங்களூரு வரை சுமார் 300 கிலோ மீட்டர் நீளமுள்ள திட்டப்பாதைக்கு கேரள மாநில விவசாயிகளின் தீவிர எதிர்ப்பு காரணமாகவும், கேரள மாநில அரசு, விவசாயிகளுக்கு எதிராக போலீஸ் பாதுகாப்பு அளிக்க மறுத்துவிட்டதாலும், கெயில் நிறுவனம் இத்திட்டத்தை கேரள மாநிலத்தில் கைவிட்டுள்ளது. விவசாயிகளுக்கு எதிராக யாரும் செயல்படக் கூடாது. தொடர்ந்து நிலங்களை பறித்தால் படித்தவர்களும் தீவிரவாதிகளாக மாறினால் ஆச்சரியப்படுவதற்கில்லை, மேலும் பாராளுமன்ற தேர்தல் வரவிருப்பதால் தமிழக அரசுக்கு எதிராக விவசாயிகளை திருப்பும் வேலையில், மத்திய அரசுடன் இணைந்து கெயில் நிறுவனம் செயல்படுகிறதா? என்றும் விவசாயிகளுக்கு சந்தேகம் ஏற்பட்டுள்ளது.