சர்வதேச விண்வெளி நிலையத்தில் பழுதை நீக்க பல் துலக்கும் பிரஷ் பயன்பட்டது

சர்வதேச விண்வெளி ஆராயச்சி நிலையத்தில் ஏற்பட்ட பழுதை, பல் துலக்கும் "பிரஷ்'சை" பயன்படுத்தி, விஞ்ஞானிகள் சரி செய்துள்ளனர். பூமியில் இருந்து, 400 கி.மீ., தொலைவில் விண்வெளியில் அமைந்துள்ள, சர்வதேச விண்வெளி நிலையத்துக்கு, சூரியசக்தி மூலமாகவே மின்சாரம் பெறப்படுகிறது. சூரிய சக்தியை கிரகிக்க, விண்வெளி நிலையத்தின் மேலே, எட்டு அடுக்குத் தகடுகள் அமைக்கப்பட்டுள்ளன. இவற்றில் ஒரு அடுக்கில் இருந்து விண்வெளி நிலையத்துக்கு உள்ளே வரும் இணைப்பில் பழுது ஏற்பட்டதையடுத்து மின்சாரம் பெறப்படுவதில் சிக்கல் ஏற்பட்டது. இதனை சரி செய்யும் பணியில், இந்திய வம்சாவளியைச் சேர்ந்த அமெரிக்க நாசா விஞ்ஞானி சுனிதா வில்லியம்ஸ் மற்றும் ஜப்பான் விஞ்ஞானி அகிஹிகோ ஹோஷிடே ஆகியோர் ஈடுபட்டிருந்தனர். சூரிய சக்தியை, நிலையத்துக்கு உள்ளே கடத்தும் இணைப்பு ஒன்றில் பொருத்தப்பட்ட "போல்ட்"டின் நடுவே, விண்துகள்கள் படிந்திருப்பதால், மின்சார கடத்தலில் பாதிப்பு ஏற்பட்டது கண்டுபிடிக்கப்பட்டது. ஆனால், "போல்ட்"டில் இருந்த தூசிகளை அகற்ற முடியாமல், கடந்த வாரம் எட்டு மணி நேரத்துக்கும் மேல் சுனிதாவும், சக விஞ்ஞானியும், அந்தரத்தில் நின்ற படி சிரமப்பட்டனர். தூசிகளை அகற்ற, சரியான கருவி கிடைக்காத நிலையில், பல் துலக்கப் பயன்படும் மூன்று "டூத் பிரஷ்"களை பயன்படுத்தி, தூசிகளை அகற்றி, "போல்ட்"ஐ, மீண்டும் பொருத்தும் பணியை சுனிதா வில்லியம்சும், அகிஹிகோ ஹோஷிடேவும் வெற்றிகரமாக செய்து முடித்தனர்.