சனவரி மாத -ஆசிரியர் கடிதம்.

ஆசிரியர் பக்கம்

 டாக்டர் ஏ.பி.ஜெ.அப்துல்கலாம் அவர்கள் 2020ல் இந்தியா வல்லரசாக வேண்டும் என்று நினைத்தார்.   1-1-2020 இறுதி ஆண்டில் அடியெடுத்து வைக்கும் இந்த நேரத்தில் இந்த ஒரு ஆண்டில் சில அடிப்படை வளர்ச்சி சிந்தனைகளை, செயல்பாடுகளை முன்னெடுக்கும் ஆண்டாக முன்னெடுக்க அனைவரும் முன்வரவேண்டும்.  இன்று இந்தியாவின் ஒரு சில கிராமங்கள் தன்னிறைவு பெற்று, முன்மாதிரியான கிராமங்களாக விளங்குவதை நாம் தொடர்ந்து செய்திகளில் பார்க்கிறோம். அது அந்தப் பஞ்சாயத்துக்குத் தேர்ந்தெடுக்கப்பட்ட தனி மனிதர்கள் , தனியார் அமைப்புகள்  உள்ளிட்டவற்றாலேயே சாத்தியமாகிறது. அவர்கள் செய்த அந்த மாற்றத்தை ஆவணப்படுத்தி அவற்றைப் பரவலாக்கும் உத்திகளை அறிந்து அவற்றை நடைமுறைப்படுத்துவது வளர்ச்சிக்கு வித்திடும்.  

தமிழ்நாட்டின் 12,620 பஞ்சாயத்துகளிலும்  பொறுப்பு மிக்க , சமூகத்திற்காக தன்னுடைய பங்களிப்பை வழங்க முன்வரும் இளைஞர்தான் இன்றைய  அவசியத் தேவை. அரசாங்கமோ , தனியார் நிறுவனங்களோ தமிழகத்தின் கல்விப்படிப்பு முடிந்து ஒவ்வொரு ஆண்டும் வரும் அனைவருக்கும் வேலை வழங்குவது சாத்தியமில்லை என்பது அனைவரும் அறிந்ததே.  

இந்நிலையில் ஒவ்வொரு கிராமப் பஞ்சாயத்துகளிலும் கிடைக்கும் வாய்ப்புகளை, வளங்களை முறைப்படுத்தி, தற்சார்பு பொருளாதாரத்தை  ஏற்படுத்துவதும், சிறு தொழில்களை புதிய சிந்தனைகளுடன் ஏற்படுத்தி வேலைவாய்ப்பை அதிகரிப்பதும் , உரிய பயிற்சிகள் கொடுப்பது, இதன்மூலம் வேலைவாய்ப்பை , கிராமப் பொருளாதாரத்தை உயர்த்துவது போன்றவை சாத்தியமாகும். 

மேலும் கிராமங்களின் கட்டமைப்புகள் வலுப்பெற ஒவ்வொரு கிராமத்தின் ஐந்து முக்கியத் தீர்க்கப்படவேண்டிய தேவைகளைத் தொகுத்து அதை இந்த ஓர் ஆண்டில் ஒவ்வொரு கிராமத்திலும் ஓரிரு மக்கள் பிரச்சினைகளை , தேவைகளைச் சரி செய்வது கிராமப்புறக் கட்டுமானத்திற்கு வலு சேர்க்கும். 

டாக்டர் ஏ.பி.ஜெ.அப்துல்கலாம், டாக்டர்  எம்.எஸ்.உதயமூர்த்தி போன்றோர் மனித குலத்தின் வளர்ச்சி குறித்து, சிந்தித்த தலைவர்கள்.  அவர்கள் தன்னுடைய கருத்துகளைப் பின்பற்றத் தொண்டர்களை உருவாக்க எண்ணியதில்லை, அவர்கள் அவர்களை  ஈடுசெய்யும் தலைவர்களை உருவாக்கவே எண்ணினார்கள். எனவே, ஒவ்வொருவரும் தன்னை ஒரு டாக்டர் ஏ.பி.ஜெ.அப்துல்கலாமாக , டாக்டர்  எம்.எஸ்.உதயமூர்த்தியாக நினைத்து சமூக மாற்றத்திற்குத் தங்களை ஈடுபடுத்திக்கொள்வது அவசியமாகிறது. 

வாழ்க தமிழ்... 

மீண்டும் அடுத்த இதழில்  சந்திப்போம்.