மூன்றாம் திருமுறை-51

3.051.திருஆலவாய் 
பண் - கௌசிகம் 
திருச்சிற்றம்பலம் 

இத்தலம் பாண்டிநாட்டிலுள்ளது. இதுவே மதுரை. 
சுவாமிபெயர் - சொக்கநாதசுவாமி. தேவியார் - மீனாட்சியம்மை. 

3339 செய்ய னேதிரு வாலவாய் மேவிய ஐய னேயஞ்ச லென்றருள் செய்யெனைப் பொய்ய ராமம ணர்கொளு வுஞ்சுடர்பைய வேசென்று பாண்டியற் காகவே 3.051.1
நடுநிலைமை உடையவரே! திருஆலவாயில் வீற்றிருந்தருளும் தலைவரே! என்னை அஞ்சேல் என்று அருள் செய்வீராக. பொய்யராகிய சமணர் இம்மடத்திற்கு வைத்த இந்நெருப்பு மெல்லச் சென்று பாண்டிய மன்னனைப் பற்றுவதாக. 

3340 சித்த னேதிரு வாலவாய் மேவியஅத்த னேயஞ்ச லென்றருள் செய்யெனைஎத்த ராமம ணர்கொளு வுஞ்சுடர்பத்தி மன்தென்னன் பாண்டியற் காகவே 3.051.2
எல்லாம் வல்ல சித்தரே! திருஆலவாயில் வீற்றிருந்தருளிய தலைவரே! என்னை அஞ்சேல் என்று அருள் செய்வீராக. ஏமாற்றித் திரிவோராகிய சமணர் இம்மடத்திற்கு வைத்த இந்நெருப்பு ஆருக மதத்தில் பக்தியுடையோனாகிய பாண்டிய மன்னனைப் பற்றுவதாக. 

3341 தக்கன் வேள்வி தகர்த்தரு ளாலவாய்ச்சொக்க னேயஞ்ச லென்றருள் செய்யெனைஎக்க ராமம ணர்கொளு வுஞ்சுடர்பக்க மேசென்று பாண்டியற் காகவே 3.051.3
சிவனை மதியாது தக்கன் செய்த வேள்வியைச் சிதைத்த திருஆலவாய்ச் சொக்கரே! என்னை அஞ்சேல் என்று அருள்புரிவீராக. இறுமாப்புடைய சமணர்கள் இம்மடத்திற்குப் பற்ற வைத்த நெருப்பு அத்தகையோர் பக்கமே சார்ந்து பாண்டிய மன்னனைப் பற்றுவதாக. 

3342 சிட்ட னேதிரு வாலவாய் மேவியஅட்டமூர்த்திய னேயஞ்ச லென்றருள்துட்ட ராமம ணர்கொளு வுஞ்சுடர்பட்டி மன்றென்னன் பாண்டியற் காகவே 3.051.4
நீதிநெறி தவறாதவரே! திருஆலவாயில் வீற்றிருந்தருளும் அட்டமூர்த்தி வடிவானவரே! என்னை அஞ்சேல் என்று அருள்புரிவீராக! கொடியவரான அமணர் இம்மடத்தில் பற்ற வைத்த நெருப்பு கல்வியறிவுடையோனாகிய பாண்டிய மன்னனைச் சென்று பற்றுவதாக. 

3343 நண்ண லார்புர மூன்றெரி யாலவாய்அண்ண லேயஞ்ச லென்றருள் செய்யெனைஎண்ணி லாவம ணர்கொளு வுஞ்சுடர்பண்ணி யற்றமிழ்ப் பாண்டியற் காகவே 3.051.5
பகையசுரர்களின் திரிபுரங்களை எரித்த திருஆலவாயில் வீற்றிருந்தருளும் அண்ணலே! என்னை அஞ்சேல் என்று அருள்செய்வீராக. சிந்திக்கும் திறனில்லாத சமணர்கள் இம்மடத்தைக் கொளுத்திய நெருப்பானது பண்ணிசையோடு தமிழ் வழங்கும் பாண்டிய மன்னனைச் சென்று பற்றுவதாக. 

3344 தஞ்ச மென்றுன் சரண்புகுந் தேனையும்அஞ்ச லென்றரு ளாலவா யண்ணலேவஞ்சஞ் செய்தம ணர்கொளு வுஞ்சுடர்பஞ்ச வன்தென்னன் பாண்டியற்காகவே 3.051.6
திருஆலவாயில் வீற்றிருந்தருளும் அண்ணலே! அபயம் என்று உம்முடைய திருவடிகளைச் சரணம் அடைந்த அடியேனையும் அஞ்சேல் என்று கூறி அருள்புரிவீராக. வஞ்சகம் செய்யும் சமணர்கள் இம்மடத்திற்கு வைத்த இந்த நெருப்பு, பஞ்சவன், தென்னன் முதலிய பெயர்களையுடைய பாண்டிய மன்னனைச் சென்று பற்றுவதாக. 

3345 செங்கண் வெள்விடை யாய்திரு வாலவாய்அங்க ணாவஞ்ச லென்றருள் செய்யெனைக்கங்கு லாரமண் கைய ரிடுங்கனல்பங்கமில் தென்னன் பாண்டியற் காகவே 3.051.7
சிவந்த கண்களையுடைய வெண்ணிற இடபத்தை வாகனமாக உடையவரே! திருஆலவாயில் வீற்றிருந்தருளும் அழகிய கண்களையுடைய சிவபெருமானே! அடியேனை அஞ்சேல் என்று அருள்செய்வீராக! இருள்மனம் கொண்ட சமணர்கள் இம்மடத்திற்கு இட்ட நெருப்பானது, உயிருக்குத் தீங்கு நேராதபடி பாண்டிய மன்னனைச் சென்று பற்றுவதாக. 

3346 தூர்த்தன் வீரந் தொலைத்தரு ளாலவாய்ஆத்த னேயஞ்ச லென்றருள் செய்யெனைஏத்தி லாவம ணர்கொளு வுஞ்சுடர்பார்த்தி வன்தென்னன் பாண்டியற்காகவே 3.051.8
பிறன் மாதரை விரும்பிய தூர்த்தனாகிய இராவணனின் வீரத்தை அழித்துப்பின் அருள்செய்த திருஆலவாயில் வீற்றிருந்தருளும் பெருங்கருணையுடைய சிவபெருமானே! அடியேனை அஞ்சேல் என்று அருள்செய்வீராக! இறைவனைத் துதிக்கும் பேறு பெறாத சமணர்கள் இம்மடத்திற்கு இட்ட நெருப்பு, இப்பூவுலகை ஆளும் தென்னன் பாண்டியனைச் சென்று பற்றுவதாக! 

3347 தாவி னானயன் றானறி யாவகைமேவி னாய்திரு வாலவா யாயருள்தூவி லாவம ணர்கொளு வுஞ்சுடர்பாவி னான்தென்னன் பாண்டியற்காகவே 3.051.9
உலகத்தைத் தாவியளந்த திருமாலும், பிரமனும் அறிய முடியாதவாறு நெருப்பு மலையாய் ஓங்கி நின்ற திருஆலவாய் இறைவனே! அடியேனுக்கு அருள் புரிவீராக! நீராடமையால் தூய்மையற்ற சமணர்கள் இம்மடத்திற்கு இட்ட இந்நெருப்பு இதற்குக் காரணமான பாண்டிய மன்னனைச் சென்று பற்றுவதாக! 

3348 எண்டி சைக்கெழி லாலவாய் மேவியஅண்ட னேயஞ்ச லென்றருள் செய்யெனைக்குண்ட ராமம ணர்கொளு வுஞ்சுடர்பண்டிமன் தென்னன் பாண்டியற்காகவே 3.051.10
எட்டுத் திசைகளிலும் எழில் பரவும் திருஆலவாயில் வீற்றிருந்தருளும், அண்டங்களுக்கெல்லாம் நாயகனான சிவபெருமானே! அடியேனை அஞ்சேல் என்று அருள்புரிவீராக! சிறுமையுடைய சமணர்கள் இம்மடத்திற்கு இட்ட நெருப்பானது தொன்மையாக விளங்கும் பாண்டிய மன்னனைச் சென்று பற்றுவதாக. 

3349 அப்ப னாலவா யாதி யருளினால்வெப்பம் தென்னவன் மேலுற மேதினிக்கொப்ப ஞானசம் பந்த னுரைபத்தும்செப்ப வல்லவர் தீதிலாச் செல்வரே 3.051.11
‘எனக்குத் தந்தையாக விளங்கும் திருஆலவாய் ஆதிமூர்த்தியின் திருவருளால் சமணர்கள் இம்மடத்திற்கு வைத்த நெருப்பின் வெப்பமானது பாண்டிய மன்னனைப் பற்றுவதாக’ என்று உலக நியதிக்கு ஏற்ற தன்மையில் ஞானசம்பந்தன் உரைத்தருளிய இத்திருப்பதிகத்தை ஓதவல்லவர்கள் குற்றமற்ற செல்வர்களாகத் திகழ்வர். 

திருச்சிற்றம்பலம்