ஏழாம் திருமுறை-65

7.065.திருநின்றியூர் 

பண் - தக்கேசி 

திருச்சிற்றம்பலம் 

இத்தலம் சோழநாட்டிலுள்ளது. 

சுவாமிபெயர் - இலட்சுமிவரதர். 

தேவியார் - உலகநாயகியம்மை. 

665 திருவும் வண்மையுந் திண்டிற லரசுஞ்

சிலந்தியார் செய்த செய்பணி கண்டு

மருவு கோச்செங்க ணான்றனக் களித்த

வார்த்தை கேட்டுநுன் மலரடி யடைந்தேன்

பெருகு பொன்னிவந் துந்துபன் மணியைப்

பிள்ளைப் பல்கணம் பண்ணையுள் நண்ணித்

தெருவுந் தெற்றியும் முற்றமும் பற்றித்

திரட்டுந் தென்றிரு நின்றியூ ரானே.

7.065.1

  பெருகி வருகின்ற காவிரியாற்றின் நீர், கொணர்ந்து தள்ளிய பல மணிகளை, சிறுமகாரது பல குழுக்கள், விளையாட்டிற் சென்று எடுத்து, தெருக்களிலும், திண்ணைகளிலும், முற்றங்களிலும் குவிக்கின்ற, அழகிய திருநின்றியூரில் உள்ள இறைவனே, நீ, சிலந்தி செய்த செய்கைத் தொண்டினைக் கண்டு, அதன் மறுபிறப்பாய் வந்த கோச்செங்கட் சோழ நாயனார்க்கு, செல்வத்தையும், கொடைத் தன்மையையும், திண்ணிய ஆற்றலை உடைய அரசாட்சியையும் அளித்த செய்தியைக் கேட்டு, அடியேன் உனது மலர் போலும் திருவடியைப் புகலிடமாக அடைந்தேன்; என்னை ஏன்று கொண்டருள். 

666 அணிகொ ளாடையம் பூணணி மாலை

யமுது செய்தமு தம்பெறு சண்டி

இணைகொள் ஏழெழு நூறிரும் பனுவல்

ஈன்ற வன்திரு நாவினுக் கரையன்

கணைகொள் கண்ணப்பன் என்றிவர் பெற்ற

காதல் இன்னருள் ஆதரித் தடைந்தேன்

திணைகொள் செந்தமிழ் பைங்கிளி தெரியுஞ்

செல்வத் தென்றிரு நின்றியூ ரானே.

7.065.2

  திணை வரையறையைக் கொண்ட செவ்விய தமிழைப் பசிய கிளிகள் ஆராய்ந்து சொல்லுகின்ற, செல்வத்தையுடைய, அழகிய திருநின்றியூரில் உள்ள இறைவனே, உன்பால், பாலைக் கொணர்ந்து ஆட்டி, அழகினைக் கொண்ட ஆடை, அழகிய அணிகலம், சூடுகின்ற மாலை, திருவமுது என்னும் இவற்றைப் பெற்ற சண்டேசுர நாயனாரும், தனக்குத்தானே நிகராய் உள்ள பாடல்கள் நாலாயிரத்து தொள்ளாயிரத்தை அருளிச் செய்தவராகிய திருநாவுக்கரசரும், அம்பைக் கையிலே கொண்ட கண்ணப்ப நாயனாரும் பெற்ற, அன்பின் பயனாகிய இனிய திருவருளை விரும்பி, அடியேன் உனது திருவடியை அடைந்தேன்; என்னை ஏன்று கொண்டருள். 

667 மொய்த்த சீர்முந்நூற் றறுபது வேலி

மூன்று நூறுவே தியரோடு நுனக்கு

ஒத்த பொன்மணிக் கலசங்க ளேந்தி

ஓங்கு நின்றியூ ரென்றுனக் களிப்பப்

பத்தி செய்தவப் பரசுரா மற்குப்

பாதங் காட்டிய நீதிகண் டடைந்தேன்

சித்தர் வானவர் தானவர் வணங்குஞ்

செல்வத் தென்றிரு நின்றியூ ரானே.

7.065.3

  சித்தர், தேவர், அசுரர், ஆகியோர் வணங்குகின்ற, செல்வத்தையுடைய, அழகிய திருநின்றியூரில் உள்ள இறைவனே, உன்னிடத்து அன்பு செய்த பரசுராமன் உனக்கு மிக்க புகழையுடைய முந்நூறு வேதியரோடு, முந்நூற்றறுபது வேலிப் பரப்புள்ள நிலத்தை, என்றும் விளங்கும் 'திருநின்றியூர்' என்று பெயரிட்டு, ஏற்புடைய, பொன்னாலாகிய அழகிய கலசங்களைக் கொண்டு நீர் வார்த்து அளிக்க, அவனுக்கு உன் திருவடியை அளித்த முறைமையை அறிந்து, அடியேன், உனது திருவடியை அடைந்தேன்; என்னை ஏன்று கொண்டருள். 

668 இரவி நீள்சுடர் எழுவதன் முன்னம்

எழுந்து தன்முலைக் கலசங்க ளேந்திச்

சுரபி பால்சொரிந் தாட்டிநின் பாதந்

தொடர்ந்த வார்த்தை திடம்படக் கேட்டுப்

பரவி யுள்கிவன் பாசத்தை யறுத்துப்

பரம வந்துநுன் பாதத்தை யடைந்தேன்

நிரவி நித்திலம் அத்தகு செம்பொன்

அளிக்குந் தென்றிரு நின்றியூ ரானே.

7.065.4

  மேலானவனே, நெற்பயிர்கள் முத்துக்களைப் பரப்பி, அம்முத்துக்களோடு ஒத்து மதிப்புடைய செம்பொன்போலும் நெற்களை அளிக்கின்ற திருநின்றியூரில் உள்ள இறைவனே, உன்னை, பசு ஒன்று, சூரியனது நீண்ட ஒளி தோன்றுவதற்கு முன்பே எழுந்து, தன் மடியாகிய கலசத்தை ஏந்திப் பால் சொரிந்து வழிபட்டு நின் திருவடியை அடைந்த செய்தியை உறுதிப்படக் கேட்டு, அடியேன், உனது திருவடியை நினைத்துத் துதித்து, பற்றுக்களை எல்லாம் விடுத்து வந்து அடைந்தேன்; என்னை ஏன்று கொண்டருள். 

669 வந்தொர் இந்திரன் வழிபட மகிழ்ந்து

வான நாடுநீ யாள்கென அருளிச்

சந்தி மூன்றிலுந் தாபர நிறுத்திச்

சகளி செய்திறைஞ் சகத்தியன் றனக்குச்

சிந்து மாமணி யணிதிருப் பொதியிற்

சேர்வு நல்கிய செல்வங்கண் டடைந்தேன்

செந்தண் மாமலர்த் திருமகள் மருவுஞ்

செல்வத் தென்றிரு நின்றியூ ரானே.

7.065.5

  செவ்விய தண்ணிய சிறந்த தாமரை மலரின்கண் இருக்கும் திருமகள் வாழும், செல்வத்தை யுடைய, அழகிய திருநின்றியூரில் உள்ள இறைவனே, இந்திரன் ஒருவன், உன்னிடத்து வந்து உன்னை வழிபட, அதற்கு மகிழ்ந்து, அவனுக்கு, 'நீ, விண்ணுலகை ஆள்க' என்று சொல்லி வழங்கிய தலைமையையும், 'காலை, நண்பகல், மாலை' என்னும் மூன்று சந்திகளிலும், இலிங்க உருவத்தை நிறுவி, கலையுருவத்தை அமைத்து வழிபட்ட அகத்திய முனிவருக்கு, அருவிகள் மணிகளைச் சிதறுகின்ற, அழகிய திருப்பொதியில் மலையில் வீற்றிருக்க அருளிய பெருமையையும் அறிந்து, அடியேன், உனது திருவடியை அடைந்தேன்; என்னை ஏன்று கொண்டருள். 

670 காது பொத்தரைக் கின்னரர் உழுவை 

கடிக்கும் பன்னகம் பிடிப்பருஞ் சீயம்

கோதில் மாதவர் குழுவுடன் கேட்பக்

கோல ஆல்நிழற் கீழறம் பகர

வேதஞ் செய்தவர் எய்திய இன்பம்

யானுங் கேட்டுநின் இணையடி யடைந்தேன்

நீதி வேதியர் நிறைபுக ழுலகில்

நிலவு தென்றிரு நின்றியூ ரானே.

7.065.6

  நீதியையுடைய அந்தணர்கள் நிறைந்திருத்தலால் உளதாகிய புகழ், உலகமுழுதும் விளங்குகின்ற, அழகிய திருநின்றியூரில் உள்ள இறைவனே, கேள்வியால் துளைக்கப்பட்ட செவியினையுடைய நால்வர் முனிவர்கள், 'கின்னரர், புலி, கடிக்கும் இயல்புடைய பாம்பு, பற்றுதற்கு அரிய சிங்கம், குற்றம் அற்ற பெரிய தவத்தவர் குழாம்' என்ற இவருடன் இருந்து கேட்ப, நீ, அழகிய ஆல் நிழலில் இருந்து, அறத்தின் உண்மைகளை எல்லாம் சொல்ல, அவற்றைக் கேட்டுப் பின்பு வேதங்களை இயற்றி அவர்கள் அடைந்த இன்பத்தினைக் கேட்டறிந்து, அடியேனும், உனது திருவடியிணையை அடைந்தேன்; என்னை ஏன்று கொண்டருள். 

671 கோடு நான்குடைக் குஞ்சரங் குலுங்க 

நலங்கொள் பாதம்நின் றேத்திய பொழுதே

பீடு விண்மிசைப் பெருமையும் பெற்ற

பெற்றி கேட்டுநின் பொற்கழ லடைந்தேன்

பேடை மஞ்ஞையும் பிணைகளின் கன்றும்

பிள்ளைக் கிள்ளையும் எனப்பிறை நுதலார்

நீடு மாடங்கள் மாளிகை தோறு

நிலவு தென்றிரு நின்றியூ ரானே.

7.065.7

  பெண் மயில்கள் போலவும், இளைய பெண் மான்கள் போலவும், இளைய கிளிகள் போலவும், பிறை போலும் நெற்றியையுடைய மகளிர், உயர்ந்த மாடங்களையுடைய மாளிகை தோறும் விளங்குகின்ற, அழகிய திருநின்றியூரில் உள்ள இறைவனே, நான்கு கொம்புகளையுடைய யானை, உன்முன் நின்று, தனது உடல், அன்பினால் நடுங்கத் துதித்தபொழுதே, முன்னை வடிவத்தையும், விண்ணுலகத்தை அடையும் பெருமையையும் பெற்ற தன்மையைக் கேட்டு அடியேன், உனது பொன்போலும் திருவடியை அடைந்தேன்; என்னை ஏன்று கொண்டருள். 

திருச்சிற்றம்பலம்