ஏழாம் திருமுறை-82

7.082.திருச்சுழியல் 

பண் - நட்டபாடை 

திருச்சிற்றம்பலம் 

இத்தலம் பாண்டிநாட்டிலுள்ளது. 

சுவாமிபெயர் - இணைத்திருமேனிநாதர். 

தேவியார் - துணைமாலைநாயகியம்மை. 

832 ஊனாய்உயிர் புகலாய்அக 

லிடமாய்முகில் பொழியும்

வானாய்வரு மதியாய்விதி 

வருவானிடம் பொழிலின

தேனாதரித் திசைவண்டினம் 

மிழற்றுந்திருச் சுழியல்

நானாவிதம் நினைவார்தமை 

நலியார்நமன் தமரே.

7.082.1

  உடம்புகளாகியும், அவைகளில் புகுதலை யுடைய உயிர்களாகியும், அகன்ற நிலமாகியும், மேகங்கள் நின்று மழையைப் பொழியும் வானமாகியும், வினைப்பயன் வருதற்கு வழியாகிய உள்ளமாகியும் நிற்பவனாகிய இறைவனது இடம், சோலைகளில் தேனை விரும்பி வண்டுக் கூட்டம் இசைபாடுகின்ற திருச்சுழியலாகும். அதனைப் பல்லாற்றானும் நினைபவர்களை, கூற்றுவன் ஏவலர்கள் துன்புறுத்தமாட்டார்கள். 

833 தண்டேர்மழுப் படையான்மழ

விடையான்எழு கடல்நஞ்

சுண்டேபுரம் எரியச்சிலை

வளைத்தான்இமை யவர்க்காத்

திண்டேர்மிசை நின்றான்அவன்

உறையுந்திருச் சுழியல்

தொண்டேசெய வல்லாரவர்

நல்லார்துயர் இலரே.

7.082.2

  தண்டுபோல மழுப்படையை ஏந்தியவனும், இளமையான இடபத்தை யுடையவனும், தேவர்கள் பொருட்டு, கடலில் எழுந்த நஞ்சினையுண்டு, திரிபுரங்கள் எரியும்படி வில்லை வளைத்துத் திண்ணிய தேரின்மேல் நின்றவனும் ஆகிய சிவபெருமான் எழுந்தருளியிருக்கின்ற திருச்சுழியலிற் சென்று அவனுக்குத் தொண்டு செய்ய வல்லவர்கள், இன்பம் உடையவரும், துன்பம் இல்லாதவரும் ஆவர். 

834 கவ்வைக்கடல் கதறிக்கொணர்

முத்தங்கரைக் கேற்றக்

கொவ்வைத்துவர் வாயார்குடைந்

தாடுந்திருச் சுழியல்

தெய்வத்தினை வழிபாடுசெய்

தெழுவார்அடி தொழுவார்

அவ்வத்திசைக் கரசாகுவர்

அலராள் பிரியாளே.

7.082.3

  ஓசையையுடைய கடல், முழக்கம்செய்து, தான் கொணர்ந்த முத்துக்களைக் கரையின்கண் சேர்க்க, அங்கு, கொவ்வைக் கனிபோலும் சிவந்த வாயையுடைய மகளிர் மூழ்கி விளையாடுகின்ற திருச்சுழியலில் எழுந்தருளியிருக்கின்ற கடவுளை வழிபட்டு மீள்கின்றவரது திருவடிகளை வணங்குவோர், தாம் தாம் வாழ்கின்ற நாட்டிற்கு அரசராய் விளங்குவர்; அவ்வரசிற்குரியவளாகிய திருமகள் அவர்களை விட்டு நீங்காள். 

835 மலையான்மகள் மடமாதிட

மாகத்தவண் மற்றுக்

கொலையானையின் உரிபோர்த்தஎம்

பெருமான்திருச் சுழியல்

அலையார்சடை யுடையான்அடி

தொழுவார்பழு துள்ளம்

நிலையார்திகழ் புகழால்நெடு

வானத்துயர் வாரே.

7.082.4

  மலையரையனுக்கு மகளாகிய இளைய மாது தனது திருமேனியின்கண் இடப் பகுதியினளாக, கொலைத் தொழிலையுடைய யானையின் தோலைப் போர்த்துள்ள எம் பெருமானாகிய, திருச்சுழியலில் எழுந்தருளியிருக்கின்ற, நீர் பொருந்திய சடையை உடையவனது திருவடியைத் தொழுபவர்கள், மனத்தில் குற்றம் பொருந்தாதவராவர்; இவ்வுலகில் விளங்குகின்ற புகழை நாட்டிய மகிழ்வோடு நீண்ட வானுலகத்திற்கும் மேற்செல்வார்கள். 

836 உற்றான்நமக் குயரும்மதிச்

சடையான்புலன் ஐந்தும்

செற்றார்திரு மேனிப்பெரு

மான்ஊர்திருச் சுழியல்

பெற்றான்இனி துறையத்திறம்

பாமைத்திரு நாமம்

கற்றாரவர் கதியுட்செல்வர்

ஏத்தும்மது கடனே.

7.082.5

  நமக்கு உறவாயுள்ளவனும், மேன்மை தங்கிய சந்திரனை யணிந்த சடையை யுடையவனும், ஐம்புலன்களையும் வென்று பொருந்திய திருமேனியையுடைய பெருமானும் ஆகிய இறைவனது ஊர் திருச்சுழியலே. அதன்கண் நீங்காது இனிது எழுந்தருளியிருக்கப்பெற்ற அவனது திருநாமத்தைப் பயின்றவர், உயர்கதியிற் செல்வர்; ஆதலின் உலகீர், அவனது திருப்பெயரைப் போற்றுமின்; அதுவே உங்கட்குக் கடமையாவது. 

837 மலந்தாங்கிய பாசப்பிறப்

பறுப்பீர்துறைக் கங்கைச்

சலந்தாங்கிய முடியான்அமர்ந்

திடமாந்திருச் சுழியல்

நிலந்தாங்கிய மலராற்கொழும்

புகையால்நினைந் தேத்தும்

தலந்தாங்கிய புகழான்மிகு

தவமாம்சது ராமே.

7.082.6

  மாசினை உடைய பாசத்தால் வருகின்ற பிறப்பினை அறுக்க விரும்புகின்றவர்களே, துறைகளை உடையதாதற்கு உரிய கங்கையாகிய நீரினைத் தாங்கியுள்ள முடியையுடைய சிவபெருமான் எழுந்தருளியிருக்கின்ற இடமாகிய திருச்சுழியலை, நிலம் சுமந்து நிற்கின்ற மலர்களாலும், செழுமையான நறும்புகைகளாலும் வழிபட்டு, நினைந்து துதிமின்கள்; உமக்கு இவ்வுலகம் சுமக்கத்தக்க புகழோடு கூடிய மிக்க தவம் உளதாகும் திறல் உளதாகும். 

838 சைவத்தசெவ் வுருவன்திரு

நீற்றன்னுரு மேற்றன்

கைவைத்தொரு சிலையால்அரண்

மூன்றும்மெரி செய்தான்

தெய்வத்தவர் தொழுதேத்திய

குழகன்திருச் சுழியல்

மெய்வைத்தடி நினைவார்வினை

தீர்தல்லௌ தன்றே.

7.082.7

  சிவாகமங்களிற் சொல்லப்பட்ட வேடத்தையுடைய சிவந்த திருமேனியை யுடையவனாய்த் திருநீற்றை யணிபவனும், இடிபோலும் குரலையுடைய இடபத்தை யுடையவனும், கையின்கண் வைத்த ஒரு வில்லாலே மூன்று கோட்டைகளையும் எரித்தவனும், தெய்வத் தன்மையையுடைய தவத்தோர் வணங்கித் துதிக்கின்ற அழகனும் ஆகிய இறைவனது திருச்சுழியலை உள்ளத்துள் வைத்து, அவனது திருவடியை நினைபவரது வினைகள் நீங்குதல் எளிது. 

839 பூவேந்திய பீடத்தவன்

றானும்மடல் அரியும்

கோவேந்திய வினயத்தொடு

குறுகப்புக லறியார்

சேவேந்திய கொடியானவன்

உறையுந்திருச் சுழியல்

மாவேந்திய கரத்தான்எம

சிரத்தான்றன தடியே.

7.082.8

  எருதினை, ஏந்துகின்ற கொடியாகப் பெற்ற சிவபெருமான் எழுந்தருளியிருக்கின்ற திருச்சுழியலில், மானை ஏந்திய கையை யுடையவனும், எங்கள் தலைகளின்மேல் உள்ளவனும் ஆகிய அவனது திருவடிகளை, தலைமை அமைந்த வணக்கத்தோடு அணுகச்சென்று அடைதலை, மலராகிய, உயர்ந்த இருக்கையில் உள்ளவனாகிய பிரமனும், வலிமையுடைய திருமாலும் ஆகிய இவர்தாமும் அறியமாட்டார். 

840 கொண்டாடுதல் புரியாவரு

தக்கன்பெரு வேள்வி

செண்டாடுதல் புரிந்தான்திருச்

சுழியற்பெரு மானைக்

குண்டாடிய சமணாதர்கள்

குடைச்சாக்கியர் அறியா

மிண்டாடிய அதுசெய்தது

வானால்வரு விதியே.

7.082.9

  தன்னையே மதித்துக் கொள்ளுதலைச் செய்துநின்ற தக்கனது பெருவேள்வியை, பந்தாடுதல்போலத் தகர்த்து வீசி விளையாடினவனாகிய திருச்சுழியலில் எழுந்தருளியிருக்கின்ற இறைவனை, மூர்க்கத்தன்மை பேசுகின்ற சமணராகிய அறிவிலிகளும், குடையை உடையவராகிய புத்தர்களும் அறியாமல், வலிமை பொருந்திய வாதுசெய்து, அதன் வண்ணமே யாவார்களாயின், அஃது அவர் வினைப்பயனேயாகும். 

841 நீருர்தரு நிமலன்திரு

மலையார்க்கயல் அருகே

தேரூர்தரும் அரக்கன்சிரம்

நெரித்தான்திருச் சுழியல்

பேரூரென வுறைவானடிப்

பெயர்நாவலர் கோமான்

ஆரூரன தமிழ்மாலைபத்

தறிவார்துய ரிலரே.

7.082.10

  அருவிகள் பாய்கின்ற இறைவனது திருமலையில் எதிரொலி உண்டாக, அதன் அருகில் தனது ஊர்தியைச் செலுத்திய இராவணனது தலையை நெரித்தவனும், திருச்சுழியலைத் தனது பெரிய ஊராகக் கொண்டு எழுந்தருளியிருப்பவனும் ஆகிய இறைவனது திருவடிப் பெயரைப் புனைந்தவனும், திருநாவலூரார்க்குத் தலைவனும் ஆகிய நம்பியாரூரனது இத் தமிழ்ப் பாடல்கள் பத்தினையும் உணர்கின்றவர், துன்பம் யாதும் இலராவர். 

திருச்சிற்றம்பலம்