தமிழகத்தில் தமிழ் வளர்ச்சித்துறை சார்பில் “சொற்குவைத் திட்டம்” விரைவில் தொடங்கப்படும் என அத்துறையின் அமைச்சர் பாண்டியராஜன் அண்மையில் நடைபெற்ற நிகழ்ச்சி ஒன்றில் தெரிவித்து உள்ளார்.
இந்த திட்டத்தின் மூலம் தமிழ் சொற்களை அனைத்தையும் தொகுப்பது, சொற்களின் இலக்கண வகைகளை பதிவிடுதல், ஆங்கில வார்த்தைகளுக்கு சரியான தமிழ் வார்த்தைகளைப் பதிவு செய்வது, தேடப்படும் தமிழ்ச் சொற்களை புதுப்பித்தல் உள்ளிட்ட பணி மேற்கொள்ளப்பட உள்ளன.
இது தொடர்பான அறிவிப்பை ஏற்கெனவே சட்டப்பேரவையில் முதல்வர் எடப்பாடி பழனிச்சாமி அறிவித்து உள்ளார். அதற்கான பணிகள் தற்போது நிறைவுறும் தருவாயில் உள்ளது. விரைவில் இந்த திட்டம் தொடங்கப்படும்.
இந்தத் திட்டம் அமலுக்கு வந்த பின்னர், இதன்மூலம் இணையம் வழியாக தமிழ் ஆர்வலர்கள் மற்றும் தமிழ் மக்கள் பலன் பெறலாம். தமிழ் நாட்டில் உள்ள தமிழர்களுக்காக மட்டும் இன்றி, உலகம் முழுவதும் வாழும் தமிழர்களுக்கு இந்தத் திட்டம் கொண்டுவரப்பட உள்ளது.
தமிழ் வளர்ச்சிக்கு என்று தனியாக ஒரு துறை ஒதுக்கீடு செய்யப்பட்டு, அதற்கு அமைச்சராக நியமிக்கப்பட்ட பின்னர் ஊரின் பெயர்கள் தமிழில் மாற்றப்படுவது உள்ளிட்ட சில புதிய முயற்சிகள் மேற்கொள்ளப்பட்டு வருவது குறிப்பிடத்தக்கது.
|