தமிழ்நாடு மற்றும் புதுச்சேரியில் வருமானவரி பற்றிய தகவல்களுக்கு புதிய இணையதளம்(www.tnincometax.gov.in) நேற்று தொடங்கப்பட்டது. ஒரு வாரத்தில் இந்த இணையதளம் முழு வீச்சில் செயல்படும் என முதன்மை ஆணையர் தெரிவித்துள்ளார்.
புதிய இணையதளம் குறித்து, வருமானவரி துறை முதன்மை ஆணையர் எஸ்.ரவி கூறியதாவது, இந்த புதிய இணையதளத்தில் அனைத்து உத்தரவுகள், சுற்றறிக்கைகள், பயிற்சி வகுப்புகள், செய்திகள், நடப்புகள், மேல்முறையீட்டு வழக்குகள் பற்றிய விவரங்கள் உள்பட பல்வேறு தகவல்களும் அடங்கியுள்ளன.
வருமானவரி தொடர்பான சலுகைகள் குறித்த தகவல்களை பொதுமக்கள் தெரிந்து கொள்ளும் வகையில் உள்ளது. மேலும் இந்த இணையதளத்தில், வருமான வரித்துறையின் தலைமையிடமான டெல்லி இணையதளத்தில் உள்ள தகவல்களும் இதில் இடம்பெற்றிருக்கும். இதில் ஒப்பந்த கோரிக்கைகளை டவுன்லோடு செய்து கொள்ளலாம்.
வருமானவரி துறை அலுவலகத்தில் உள்ள அதிகாரிகளின் தொலைபேசி எண்கள் மற்றும் இணையதள முகவரியையும் இதில் பதிவு செய்யப்பட்டுள்ளது. இதனால் பொதுமக்கள் தங்களுக்கு தேவையான தகவல்களை சம்பந்தப்பட்ட அதிகாரிகளிடம் தொடர்பு கொண்டு தெரிந்து கொள்ளலாம். இதன்மூலம் எங்களுக்கும், பொதுமக்களுக்கும் பணிகள் சுலபமாகும். தற்போது இணையதளம் தொடங்கப்பட்டுள்ளது. இன்னும் ஒரு வாரத்தில் இந்த இணையதளம் முழு வீச்சில் செயல்படும் என வருமானவரி துறை முதன்மை ஆணையர் எஸ்.ரவி கூறியுள்ளார்.
|
