திருடனைப் பிடித்த தீரச் சிறுவன்

கழுத்தில் ஒரு கயிறு , கையில் காப்பு , குடுமி இத்தகைய தோற்றத்தில் காட்சியளித்த “ காமாட்சி ராஜா ” என்ற சிறுவன் எதிர்காலத்தில் காமராஜர் என்ற பெருந்தலைவராக உருவாகப் போகிறான் என்பதற்கான அடையாளம் அப்போதே தெரிந்தது .

விருதுபட்டியில் திருடன் ஒருவன் தனது கைவரிசையைக் காட்டிக் கொண்டிருந்தான் . எல்லோருக்கும் குலை நடுக்கம் . பெரியவர்கள் கூட பயந்து நடுங்கினார்கள் . இருட்டத் தொடங்கியதுமே பலர் தங்களுடைய வீடுகளைப் பூட்டிக்கொண்டார்கள் . திருடனைப் பிடிப்பதற்குப் பதிலாக தங்களைப் பாதுகாத்துக் கொள்வதிலேயே பலர் கவனம் செலுத்தினார்கள் . தவறுகளைத்தட்டிக் கேட்க வேண்டும் என்ற தைரியம் , அதனால் ஆபத்து வந்தால் ஏற்றுக்கொள்கிற அஞ்சாநெஞ்சம் சமுதாயத்துக்கு நாம் பயன்பட வேண்டும் என்ற தொண்டுள்ளம் இவையெல்லாம் சிறுவனாக இருந்த காமராசரிடம் நிரம்பியிருந்தது . அதனால் திருடனைப் பிடிக்க அவரே திட்டமிட்டார் . தனக்கு உதவியாக சில நண்பர்களைச் சேர்த்துக் கொண்டார் . திருடன் வரும் இருட்டு வழியில் குறுக்காக ஒரு கயிரைக் கட்டி வைத்தார்கள் . அவன் விழுந்ததும் கண்ணில் தூவ மிளகாய்ப் பொடி தயாராக இருந்தது . பாதையின் ஓரத்தில் பதுங்கியிருந்து திருடன் வரும் நேரத்தை எதிர்பார்த்திருந்தார்கள் . திட்டமிட்டபடி திருடன் வந்தான் . கயிறு தடுக்கி தடுமாறி விழுந்தான் . கணநேரத்தில் கண்ணில் மிளகாய்ப்பொடி தூவப்பட்டது . சாக்குப்பையில் போட்டு குண்டுக்கட்டாகக் கட்டிவிட்டார்கள் . திருடனைப் பிடித்த சிறுவனின் தீரச் செயல் கண்டு ஊரே வியந்தது .

இத்தகைய திருடர்கள் எந்தத்துறையிலும் ஊடுருவாமல் பார்த்துக்கொள்வது நல்லது .