அமெரிக்க கப்பலில் இருந்த ஆயுதங்கள் பறிமுதல் : கியூ பிரிவு போலீசார் விசாரணை !!!

இந்திய கடல் எல்லை பகுதியில் அத்துமீறி நுழைந்த, அமெரிக்கா கப்பலில் இருந்த ஆயுதங்களை கியூ பிரிவு போலீசார் பறிமுதல் செய்து தீவிர விசாரணை நடத்தி வருகின்றனர்.

அத்துமீறி நுழைந்த அமெரிக்கா கப்பல் :

இந்திய கடல் எல்லை பகுதிக்குள், கடந்த சில தினங்களுக்கு முன், அமெரிக்காவை சேர்ந்த "சீமென் கார்டு ஓகியா" என்ற கப்பலை இந்திய கடலோர காவல் படையினர் சுற்றி வளைத்து பிடித்து தூத்துக்குடி துறைமுகத்துக்கு கொண்டு வந்தனர்.

அமெரிக்க கப்பலில் 10 மாலுமிகள், 25 வீரர்கள் என மொத்தமாக 35 பேர் இருந்தனர். இது தொடர்பாக கடலோர காவல் படையினர் தீவிர விசாரணை நடத்தினர். இதைத் தொடர்ந்து, துப்பாக்கி தோட்டாக்களை அதிகமாக வைத்திருந்ததால் (ஆயுத சட்டம்), சட்ட விரோதமாக டீசல் பரிமாற்றம் மற்றும் அனுமதிக்கப்பட்ட கால அவகாசத்தைவிடவும் கூடுதலாக பயண நேரம் எடுத்தல் உள்ளிட்ட 4 பிரிவுகளில், கப்பல் கேப்டன் உள்பட கப்பல் ஊழியர்கள் 35 பேர் மீதும் வழக்கு பதிவு செய்யப்பட்டது.

மாவட்ட ஆட்சியர் பார்வை :

இந்நிலையில், தூத்துக்குடி மாவட்ட ஆட்சியர் ரவிக்குமார், நேற்று அமெரிக்கா கப்பலில் ஆய்வு மேற்கொண்டு, கப்பல் அதிகாரிகளிடம் விசாரணை நடத்திய பின்னர், இந்த வழக்கு கியூ பிரிவு போலீசாரிடம் ஒப்படைக்கப்பட்டது. 

இதனை அடுத்து கியூ பிரிவு அதிகாரிகள், இன்று காலை கப்பலுக்கு சென்று தீவிர விசாரணை நடத்தினர். மேலும் கப்பலி்ல் இருந்த ஆயுதங்களையும் பறிமுதல் செய்தனர். இது தொடர்பான விரிவான அறிக்கையை, கியூ பிரிவு போலீசார் தமிழக அரசிடம் விரைவில் அளிப்பார்கள் என எதிர்பார்க்கப்படுகிறது.