பாலியல் குற்றங்கள் தொடர்பாக இனி உச்ச நீதிமன்றத்துக்கு நேரடியாக புகாரளிக்கலாம் !!

பாலியல் குற்றங்களால் பாதிக்கப்படும் பெண்கள், உச்ச நீதிமன்றத்துக்கு நேரடியாக இ-மெயில் அல்லது கடிதம் மூலமாக தங்களது புகார்களை பதிவு செய்யலாம் என உச்ச நீதிமன்ற தலைமை நீதிபதி சதாசிவம் தெரிவித்துள்ளார். 

நாட்டில் பெண்களுக்கு எதிரான குற்ற சம்பவங்கள் நாளுக்கு நாள் அதிகரித்துக்கொண்டே இருக்கிறது. பல்வேறு தரப்பினரும் பல முயற்சிகளை மேற்கொண்டு வருகின்றனர். இந்நிலையில், இதற்கு முடிவு கட்டும் வகையில் உச்ச நீதிமன்ற தலைமை நீதிபதி சதாசிவம், இது தொடர்பான புகார்களை பெற உச்ச நீதிமன்ற பெண் நீதிபதி ரஞ்சனா பிரகாஷ் தேசாய் தலைமையில் 6 பெண் நீதிபதிகள் மற்றும் நீதித்துறை சாராத 2 வெளி நபர்கள் கொண்ட குறை தீர்ப்பு குழு ஒன்றை சமீபத்தில் ஏற்படுத்தியுள்ளார். பெண்களுக்கு ஏற்படும் பாலியல் தொந்தரவு தொடர்பாக வழக்கில் உச்ச நீதிமன்ற வழிகாட்டி நெறிமுறைகளின்படி இந்த குழு செயல்படும் என்றும் அவர் அறிவித்திருந்தார். அதன்படி, இந்த குழுவுக்கான உறுப்பினர்கள் அனைவரும் நியமிக்கப்பட்டுள்ளனர். இதையடுத்து, இந்த குறை தீர்ப்பு மையம் முழுவீச்சில் செயல்பட தொடங்கியுள்ளது. 

பாலியல் குற்றங்களால் பாதிக்கப்படும் பெண்கள், தங்களது புகார்களை இந்த குழுவுக்கு gupta.rachna@indianjudiciary.gov.in என்ற ‘இ-மெயில்’ முகவரிக்கும் அல்லது பதிவு தபால், விரைவு தபால், கொரியர் மூலமாகவும் புகார் அளிக்கலாம். நேரில் சென்று புகார் அளிக்க விரும்புபவர்கள் உச்ச நீதிமன்ற வளாகத்தில் அமைந்துள்ள இந்த குழுவின் அலுவலகத்தை தொடர்பு கொள்ளலாம். 

இதன் மூலம் பெறப்படும் பாலியல் புகார்கள் மீது உடனடியாக ரகசியாகமாகவும், நியாயமான முறையிலும் உரிய விசாரணை நடத்தப்படும் எனவும் தலைமை நீதிபதி சதாசிவம் தெரிவித்துள்ளார். 

உச்ச நீதிமன்ற தலைமை நீதிபதி சதாசிவத்தின் இந்த நடவடிக்கைக்கு சமூக நல அமைப்புகள் பல வரவேற்பு தெரிவித்துள்ளன.