ரயில்வேயின் வருவாயை அதிகரிக்க விரைவில் பிரிமியம் ரயில்கள் அறிமுகம் !!

ரயில்வேயின் வருவாயை அதிகரிக்கும் பொருட்டு முக்கியமான வழித்தடங்களில் பிரிமியம் ரயில்களை இயக்க ரயில்வே துறை முடிவு செய்துள்ளது.  

கடுமையான நிதி நெருக்கடியை சந்தித்து வரும் ரயில்வே நிர்வாகம், வருவாயை அதிகரிக்க பல்வேறு புதிய திட்டங்களை அறிமுகப்படுத்தி வருகிறது. இந்த வகையில், விமான கட்டணங்கள் பாணியில், புது ரயில்களை இயக்க இந்திய ரயில்வே நிர்வாகம் திட்டமிட்டுள்ளது. 

பயணிகளின் விருப்பத்தை பொருத்து முக்கியமான வழித்தடங்களில் இந்த வகை ரயில்கள் இயக்கப்படும். 

சில வழித்தடங்களில் ரயிலில் பயணிக்க, டிக்கெட் கிடைப்பதே இல்லை. அத்தகைய ரயில்களில் பயணிக்க, இரு மாதங்களுக்கு முன், முன்பதிவு துவங்கியதும், அனைத்து டிக்கெட்டுகளும், விற்று தீர்ந்து விடுகின்றன. இதனால், கடைசி நேரத்தில், வரும் பயணிகள், ரயிலில் இடம் கிடைக்காமல் திண்டாடுகின்றனர். 'தட்கல்' டிக்கெட் புக்கிங்கும், துவங்கிய ஒரு சில வினாடிகளில், முடிந்து விடுகிறது. 

இதையடுத்து, முக்கிய வழித்தடங்களில், புது ரயில்களை விட ரயில்வே நிர்வாகம் முடிவு செய்துள்ளது. இதற்கான கட்டணங்கள், ராஜ்தானி, சதாப்தி ரயில்களுக்கான கட்டணங்களை விட கூடுதலாக இருக்கும், முதற்கட்டமாக டில்லி - மும்பை இடையே, சோதனை அடிப்படையில், இந்த புதிய பிரிமியம் ரயில் விடப்படுகிறது. இதற்கு கிடைக்கும் வரவேற்பை பொருத்து, ரயில்களின் எண்ணிக்கை அதிகரிக்கப் படும் என ரயில்வே நிர்வாகம் தெரிவித்துள்ளது.

பிரிமியம் ரயில்கள் புறப்படும் இடத்தில் இருந்து, வழியில் எங்கும் நிற்காமல், குறிப்பிட்ட நகரத்துக்கு மட்டும் போய் சேரும். வழக்கமாக செல்லும் ரயில்களின், 'வெயிட்டிங் லிஸ்ட்'டை பொருத்து முடிவு செய்யப்படும். இவ்வாறு அறிமுகப்படுத்தப்படும் ரயில்கள், திருவனந்தபுரம், ஆமதாபாத், பாட்னா, ஜம்மு தாவி, புவனேஸ்வர், பெங்களூரு, செகந்திராபாத், லக்னோ ஆகிய நகரங்களை இணைக்கும் வகையில் விடப்படும். இந்த ரயில்கள், விமான பயணிகளை கவரும் வகையிலும், வழக்கமான ரயில்களில் இடம் கிடைக்காமல் சிரமப்படும் பயணிகளை மனதில் வைத்து அறிமுகப்படுத்தப்படுகிறது. அத்துடன், ரயில்வே சந்திக்கும், 37 சதவீத நெருக்கடியை ஓரளவு சரிக்கட்ட இந்த புதிய முயற்சி மேற்கொள்ளப்படுகிறது.