|
|||||
திரைப்பட இயக்குனரும், நடிகருமான மனோபாலா காலமானார் |
|||||
திரைப்பட இயக்குனரும், நடிகருமான மனோபாலா காலமானார் இயக்கத்திலும் நடிப்பிலும் நகைச்சுவைக் கதாபாத்திரங்களிலும் மிளிர்ந்த தமிழ்க் கலைஞன் 'மனோபாலா' என அறியப்படும் பாலச்சந்தர் அவர்கள் கல்லீரலில் ஏற்பட்ட பிரச்சினை காரணமாக உயிரிழந்துள்ளார். அவருக்கு வயது 69. இயக்குனர் பாரதிராஜாவின் படமாகிய 'புதிய வாழ்க்கை' என்ற படத்தில் உதவி இயக்குனராக 1979 ஆம் ஆண்டில் இவரது திரைத்துறைப் பயணம் துவங்கியது.இவர் இயக்குனராக அறியப்பட்ட முதல் படம் ஆகாயகங்கை (1982). இப்படம் தோல்வி கண்ட போதும் அடுத்ததாக இவர் இயக்கி வெளியாகிய 'பிள்ளை நிலா' (1985)பெரும் வெற்றி அடைந்தது.விஜயகாந்த், ரஜினி ஆகிய நடிகர்களை ஆரம்பகாலத்தில் இயக்கி வெற்றியடைந்துள்ளார். இவர் இயக்கிய படங்கள் அப்போது தமிழ் மட்டுமின்றி பிற மொழிகளிலும் வெளிவந்துள்ளன.24 படங்களை இயக்கியுள்ளார் மனோபாலா. நடிகராக,முழு நேரம் களம் கண்டது 2000 ஆண்டிலிருந்து தான்.துணை நடிகராகவும், நகைச்சுவை நடிகராகவும் மக்களின் கவனத்தை ஈர்த்தவர் மனோபாலா. கிட்டத்தட்ட 700 படங்களில் நடித்துள்ளார். "எப்படி இருந்த நான், இப்படி ஆகிட்டேன் "என்று விவேக் கூறும் நகைச்சுவை வசனக் காட்சி மனோபாலா அவர்களை மிக இரசிக்க வைத்தது.சிறுத்தை, பிதாமகன், சந்திரமுகி, அரண்மனை போன்ற படங்களில் நகைச்சுவைப் பகுதிகளில் தோன்றும் மனோபாலா இயல்பான புன்னகையை வரவித்திருப்பார். 'சதுரங்க வேட்டை' படத்தினை தயாரித்து தயாரிப்பாளராக அறிமுகமாகி, அதற்காக தென்னிந்திய சர்வதேச திரைப்பட விருதுகளில் சிறந்த அறிமுக திரைப்பட தயாரிப்பாளருக்கான விருதைப் பெற்றிருக்கிறார். திரைப்பட பங்களிப்பிற்காக தென்மேற்கு அமெரிக்கப் பல்கலைக்கழகம் 'முனைவர்' பட்டம் வழங்கியுள்ளது.உலக சாதனையாளர் கவுன்சிலின் 'வாழ்நாள் சாதனையாளர்' பட்டமும் பெற்றுள்ளார். மறைந்த விவேக், மயில்சாமி ஆகிய கலைஞர்களின் இழப்போடு, மனோபாலா அவர்களின் இழப்பும் திரை இரசிகர்களின் கண்களைப் பனிக்கச் செய்துள்ளது. |
|||||
by R.Gnanajothi on 19 May 2023 0 Comments | |||||
கருத்துகள் | |
|
உங்கள் கருத்துகள் பதிவு செய்ய | ||
|