அல்லோலகல்லோலம் என்றால் என்ன

நாடு அல்லோலகல்லோலப்பட்டுக் கிடக்கிறது.
 
மக்கள் பதறியடித்து அல்லோலகல்லோலப்பட்டு ஓடினர்.
 
வேலைக்குச் சென்ற தொழிலாளர்கள் அல்லோலகல்லோலப்பட்டு வீடுகளுக்குத் திரும்பினர்
 
இவ்வாறு படித்திருக்கிறோம்.

அல்லோலகல்லோலம், அல்லோலகல்லோலப்படுதல் என்றால் என்னவென்று துலக்கமாகத் தெரியாது. ‘பதற்றமான, அலைச்சலான துன்பத்திற்குட்பட்டு...’ என்று பழக்கத்தின் அடிப்படையில் புரிந்துகொண்டு அந்தப் பதச்சேர்க்கையைக் கடந்து போகிறோம்.

அவ்வாறு நாம் புரிந்துகொண்டது கிட்டத்தட்ட சரிதான், என்றாலும் அந்தச் சொல்லைப் பிரித்து மேய்ந்து உண்மையாய் உணர்த்தி நிற்கும் பொருளை இதுவரை அறிந்ததில்லை.

அல்’ என்றால் இரவு. அல்லும் பகலும்’ என்றால் இரவும் பகலும் அல்லவா... அதில் உள்ள அல்.

ஓலம்’ என்பதற்குக் கடல் என்று ஒரு பொருளும் உண்டு.
கல்லோலம்’ என்றால் ‘அலை’ என்று பொருள்.

அல்+ஓலம்+கல்லோலம் = அல்லோலகல்லோலம். ‘இரவுநேரக் கடலில் கொந்தளிக்கின்ற அலை’ என்று அர்த்தம். இரவில் அதீத மௌனத்தால் அலையோசை பலமாகப் பெருத்துக் கேட்கும். அலையின் இயல்பு ஆரவாரத்துடன் ஆர்ப்பரித்தல் அல்லவா ? அதனால் இப்பதச்சேர்க்கைக்குப் ‘ பேராரவாரம்’ என்றும் பொருள் சொல்வர்.

ராத்திரியில் பொங்கி ஆரவாரிக்கின்ற அலைவாய்ப்பட்டவன்போல், திக்கு திசை தெரியாமல் அலைந்து திரிந்து எப்படியோ தப்பிப் பிழைத்து வந்தேன் - என்பதைத்தான் சுருக்கமான உருவகமாக ‘அல்லோலகல்லோலப்பட்டு வந்தேன்’ என்கிறோம்.

- கவிஞர் மகுடேசுவரன்