விக்ரமின் நடிப்பை பாராட்டிய அர்னால்டு !!

தற்போதைய தமிழ் சினிமா ரசிகர்கள் எதிர்பார்த்துக் கொண்டிருக்கும் படங்களில் ஒன்று, ஷங்கர் இயக்கத்தில் பிரமாண்டமாக தயாராகி வரும் ஐ. 

இந்த படத்தில் விக்ரம், கதாநாயகனாகவும், எமி ஜாக்சன் கதாநாயகியாகவும் நடித்துள்ளனர். இசை புயல் ஏ.ஆர்.ரஹ்மான் இந்த படத்திற்கு இசை அமைக்கிறார். ஆஸ்கார் பிலிம்ஸ் ரவிச்சந்திரன் இந்த படத்தை தயாரிக்கிறார். 

கடந்த இரண்டு வருட காலமாக தயாரிப்பில் இருந்து வரும் ஐ படத்திற்காக, இயக்குனர் ஷங்கர் ரொம்பவே மெனக்கெட்டிருப்பதாகவும், பல புதிய அம்சங்களையும் தொழில்நுட்பங்களையும் கையாண்டிருப்பதாகவும் தகவல் வெளியாகி ரசிகர்கள் மத்தியில் படத்தைப் பற்றிய எதிர்பார்ப்பை கூட்டியிருக்கின்றன. கூடவே விக்ரமும் தன் பங்கிற்கு நடிப்பிலும், கதாபாத்திரத்திலும் அசத்தியிருக்கிறாராம்.

இந்த படம் அனேகமாக தீபாவளி அன்று ரிலீசாகும் என எதிர்பாக்கப்படுகிறது. 

ஐ படத்தின் இசை வெளியீட்டை வரும் செப்டம்பர் 15ம் தேதி அன்று சென்னையில் பிரம்மாண்டமான விழாவாக கொண்டாட முடிவு செய்துள்ளனர். இசை வெளியீட்டு விழாவில், ஹாலிவுட் நடிகர் அர்னால்டு ஸ்வாசனேகர் கலந்துகொள்கிறார்.

இரண்டு நாட்களுக்கு முன்பு தயாரிப்பாளர் ஆஸ்கார் ரவிச்சந்திரனின் தம்பி ரமேஷ் பாபு, ‘ஐ’ இசை வெளியீட்டு விழாவில் சிறப்பு விருந்தினராக கலந்து கொள்ளுமாறு அர்னால்டுவை அழைப்பதற்காக லாஸ் ஏஞ்சல்ஸில் உள்ள அவரது வீட்டிற்குச் சென்றிருக்கிறார். 

விழாவிற்கு வர சம்மதம் தெரிவித்த அர்னால்டு ‘ஐ’ படம் பற்றி வியந்து பேசினாராம். குறிப்பாக கதாநாயகன் விக்ரம் இப்படத்திற்காக 120 கிலோ, 70 கிலோ, 50 கிலோ என தன்னை உருமாற்றி நடித்திருப்பதைப் பற்றியும் ஆச்சரியமாக கூறினாராம்.