நெசவாளர்களை கவுரவிக்க கோ ஆப்டெக்ஸ் புதிய திட்டம் !! 30 சதவீத தள்ளுபடியும் அறிவிப்பு !!

மூத்த நெசவாளர்களை கவுரவிக்கும் விதமாக, அவர்கள் நெசவு செய்த சேலைகளில், அவர்களின் புகைப்படத்தை இணைத்து, கோ ஆப்டெக்ஸ் விற்பனை செய்கிறது. 

அடுத்த மாதம் பொங்கல் பண்டிகை வருவதையொட்டி, கோஆப்டெக்ஸ் நிறுவனத்தின் புதிய ரகங்களின் அறிமுகம் மற்றும் விற்பனை, துவக்க விழா சென்னை, தலைமைச் செயலகத்தில் உள்ள, கோஆப்டெக்ஸ் வானவில் விற்பனை நிலையத்தில் நடந்தது. இதில் கோஆப்டெக்ஸ் உயர் அதிகாரிகளும், தமிழக கைத்தறித் துறை அமைச்சர்களும் கலந்து கொண்டனர்.

கோஆப்டெக்ஸ் புதிய ரகங்களில், சரித்திரப் புகழ் பெற்ற பாரம்பரிய சின்னங்கள், கோவில்களின், சிற்ப மற்றும் ஓவிய வேலைப்பாடுகளில் உள்ள, வடிவமைப்புகளை பயன்படுத்தி நெய்யப்பட்ட சேலைகள், கோடம்பாக்கம் சேலை, கண்டாங்கி சேலை, சின்னாளபட்டி சேலை, நெகமம் சேலை, உறையூர் சேலை, சுங்குடி சேலை, புதுமணத் தம்பதியரை கவரும் வகையில் உருவாக்கப்பட்ட, தேனிலவு படுக்கை விரிப்பு, சிறுவர்களை கவரும், குட்டீஸ் படுக்கை விரிப்பு, ஆயத்த சட்டை ஆகியவை விற்பனைக்கு வைக்கப்பட்டிருந்தன.

சேலைகளில் நெசவாளர்கள் விவரம் : 

கைத்தறி நெசவு தொழில் ஈடுபட்டுள்ள, 75 வயதிற்கும் அதிகமான நெசவாளர்களின் உழைப்பை போற்றும் விதமாக, அவர்கள் நெய்யும் சேலையுடன், அவர்களின் வண்ண புகைப்படம், அவர்கள் ஊர், எத்தனை ஆண்டுகளாக நெசவுத் தொழில் செய்கின்றனர். அவர்கள் நெய்த சேலையை, உருவாக்க தேவைப்பட்ட நேரம், அதற்காக, அவர்கள் கை மற்றும் கால்களை எத்தனை முறை அசைத்தனர் என்ற விவரம், அட்டையில் அச்சிடப்பட்டு, சேலையுடன் இணைக்கப்பட்டுள்ளது. இதற்கு, பொதுமக்களிடம் நல்ல வரவேற்பு உள்ளது. அனைத்து சேலைகளுக்கும், ஜனவரி 31ம் தேதி வரை, 30 சதவீதம் தள்ளுபடி அறிவிக்கப்பட்டுள்ளது என கோஆப்டெக்ஸ் மேலாண் இயக்குனர் சகாயம் தெரிவித்துள்ளார்.