அரண்மனை, டார்லிங், காஞ்சனா 2, டிமான்டி காலனி என தற்போது பேய் படங்களின் ராஜ்ஜியம் தான் தமிழ் சினிமாவில் நடந்து வருகிறது. தற்போது வெளியான மாசு என்கிற மாசிலாமணி படமும் ஓரளவுக்கு ஹிட் அடித்துள்ளது. இதனால் தயாரிப்பில் இருக்கும் பேய் படங்களின் எண்ணிக்கை அதிகரித்துள்ளது.
இந்நிலையில் விரைவில் பேய்ப் பட சீசன் முடிவுக்கு வருமோ என்ற சூழ்நிலை தற்போது ஏற்பட்டுள்ளது. இதற்கு காரணம் அடுத்தடுத்து வெளியாக இருக்கும் காமெடி படங்கள் தான். உதாரணமாக வரும் வாரம் சந்தானத்தின் இனிமே இப்படிதான் படம் வெளியாகிறது. இது முழுக்க முழுக்க காமெடி படம். இதே தினத்தில் வெளியாகவிருக்கும் ஜெயம் ரவி, ஹன்சிகா ஜோடி சேர்ந்து நடித்துள்ள ரோமியோ ஜூலியட் படத்திலும் காமெடிக்கும் அதிக முக்கியத்துவம் கொடுக்கப்பட்டுள்ளது.
அடுத்த வாரம் அதாவது ஜூன் - 19 அன்று வடிவேலுவின் எலி படம் வெளியாகவிருக்கிறது. அதே தினத்தில் தான் இன்னொரு காமெடி படமான அருள் நிதி, ரம்யா நம்பீசன் நடித்துள்ள நாலு போலிசும் நல்லா இருந்த ஊரும் படமும் ரிலீசாகிறது. ஜூன் 26 அன்று சிம்பு நடித்த வாலு படம் வெளியாகிறது. இதுவும் முழுக்க முழுக்க காமெடி படமே. இந்தப் படங்கள் தவிர கவுண்டமணி கதாநாயகனாக நடித்துள்ள 49-ஒ மற்றும் எங்களுக்கு வேறு எங்கும் கிளைகள் இல்லை படங்களும் தயாராகி வருகின்றன. இந்தப் படங்கள் உட்பட மேலும் பல காமெடி படங்கள் ரிலீசாகி தயாராகி வருகின்றன. இவற்றில் ஏதாவது ஒரு படம் சூப்பர் ஹிட்டானால் காமெடி சீசன் தொடங்குவது உறுதி...
|
