மாவட்டம்தோறும் 100 அரசுப்பள்ளி மாணவர்களுக்கு இலவச திருக்குறள் இலவச மனனப் பயிற்சி

மாணவப்பருவத்திலேயே தனிமனித ஒழுக்கம், தலைமைப்பண்பு , அறச்சிந்தனை முதலியனவற்றை வளர்த்தெடுக்கும் பொருட்டும், இளம் பருவத்தில் பள்ளிப்பாடத்துடன் சேர்த்து திருக்குறளை முழுமையாகக் கற்றுத்தேர்ந்து, அரசு நடத்தும் 1330 குறள்களையும் மனப்பாடமாக ஒப்புவிக்கும் "திருக்குறள் முற்றோதல்" போட்டியில் கலந்துகொண்டு சான்றிதழ் மற்றும் அரசு வழங்கும் ரூபாய் 10000 பரிசுத்தொகை பெறவும் வழிகாட்ட, ஊக்கப்படுத்த  "உலகத் திருக்குறள் முற்றோதல் இயக்கம்" தொடங்கப்பட்டது.

திருக்குறளை இளம் வயதிலேயே மாணவ மாணவியர் மனப்பாடம் செய்தால் வாழ்நாள் முழுவதும் மனத்தில் நிற்கும் என்ற நோக்கில் அரசுப் பள்ளி மாணவர்களுக்கு இலவசமாக 1330 திருக்குறள் மனனப் பயிற்சி அளிக்க திட்டமிடப்பட்டுள்ளது.

இதன் மூலம் ஏற்கனவே திருக்குறள் முற்றோதல் கற்றுக்கொடுத்து மாணவர்களை உருவாக்கி அனுபவம் பெற்ற கவனகர்கள் , கற்றுக்கொடுக்கும் உத்திகள் தெரிந்த திருக்குறள் ஆளுமைகள் ஐந்துபேர் முதல்கட்டமாக கைகோர்த்து இப்பயிற்சியை வழங்கவிருக்கின்றனர்.இதன் தொடக்கமாக மாவட்டத்திற்கு 100 அரசுப்பள்ளி மாணவர்களுக்கு முற்றோதல் பயிற்சி தொடங்கப்படவிருக்கிறது.

அரசுப்பள்ளி மாணவர்கள் மட்டுமின்றி, தனியார் பள்ளி மாணவர்களும் , வெளிநாடு வாழ் தமிழ் மாணவர்களும் திருக்குறள் ஆளுமைகளை/பயிற்சியாளர்களை பயன்படுத்தி திருக்குறள் முற்றோதல் கற்றுக்கொள்ள ஊக்கப்படுத்துகிறோம்.

மாவட்டத்திற்கு 100 பேருக்கு என்ற இலக்குடன் தொடங்கும் இத்திட்டம், அடுத்த இரண்டு ஆண்டுகளில் மாவட்டத்திற்கு 1000 பேர் என்று விரிவடையும் என்று எதிர்பார்க்கப்படுகிறது.

"நிற்க அதற்குத் தக" என்ற  குறள் வாசகத்துடன் தொடங்கப்பட்டுள்ள உலகத் திருக்குறள் முற்றோதல் இயக்கம், உலகம் முழுதும் திருக்குறள் முற்றோதல் முடித்தவர்களை, நாடு வாரியாக, மாவட்ட வாரியாக வகைப்படுத்தி www.KuralMutrothal.org இணையதளத்தில் தொகுத்து, அவர்களின் தொடர் வெற்றியை உறுதிப்படுத்த தன்னம்பிக்கை பயிற்சி , ஆங்கிலப் பயிற்சி, கல்வி வழிகாட்டல், வேலைவாய்ப்பு வழிகாட்டல் என்று பல்வேறு பயிற்சிகளை வழங்கவும், தொழில்முனைவோராக வளர பயனுள்ள தொடர்புகளை ஏற்படுத்தித்தரவும் முடிவுசெய்யப்பட்டுள்ளது.

இத்திட்டத்தின் திட்ட ஒருங்கிணைப்பாளர்களாக வலைத்தமிழ் திரு.ச.பார்த்தசாரதி, அரசு மற்றும் பயிற்றுநர் ஒருங்கிணைப்பை வள்ளுவர் குரல் குடும்பம் ஒருங்கிணைப்பாளர் திரு.சி.ராஜேந்திரன் IRS (ஓய்வு), அரசுப்பள்ளிகள் ஒருங்கிணைப்பை Service 2 Society நிறுவனர் திரு.ரவி சொக்கலிங்கம், புரவலர்கள் ஒருங்கிணைப்பை தமிழ் ஆர்வலர் திரு.கொழந்தைவேல் இராமசாமி (வாசிங்டன் டிசி), திருக்குறள் ஆர்வலர்கள் திரு.க.செங்குட்டுவன் , திரு.செந்தில் துரைசாமி (டெக்ஸாஸ்) ஆகியோர் பொறுப்பேற்றுள்ளனர்.

உலகத் தமிழர்களை உங்கள் குழந்தைகளுக்கு பயிற்சிபெறவும், உங்கள் ஊர் அரசுப்பள்ளிக்கு இந்த இலவசத் திட்டத்தை கொண்டுசெல்லவும் அன்போடு அழைக்கிறோம்.

இத்திட்டத்தில் உலகத் தமிழ் வளர்ச்சி மன்றம் , மேரிலாந்து , அமெரிக்கா அமைப்பு மாவட்டத்திற்கு ஆண்டுக்கு 2000 புத்தகங்கள் வீதம் ஆண்டுக்கு 80000 திருக்குறள் நூல்களை (திருக்குறள் முனுசாமி உரை) வழங்கவும், இவ்வாண்டு அதை மாவட்டத்திற்கு 1000 புத்தகங்கள் என்று 40000 புத்தகங்களை இலவசமாக வழங்க உலகத் திருக்குறள் முற்றோதல் இயக்கத்துடன் இணைந்துள்ளார் என்பதை மகிழ்ச்சியுடன் தெரிவித்துக்கொள்கிறோம்.

www.KuralMutrothal.org  | E-Mail: Kural.Mutrothal@gmail.com |