கூகுளின் வைஃபை கேமரா !! என்ன தான் ஸ்பெஷல் !!

இணைய உலகில் முன்னணி நிறுவனமாக திகழ்ந்து வரும் கூகுள் நிறுவனம், சமீபத்தில் பொது மக்கள் பயன்படுத்தும் எலக்ட்ரானிக் சாதனங்களை தயாரிக்கும் பணியில் காலடி எடுத்து வைத்துள்ளது. 

இதன் முன்னோட்டமாக செல்போன், டேப்லெட் ஆகியவற்றை அறிமுகப்படுத்திய கூகுள் நிறுவனம் கடந்த சில மாதங்களுக்கு முன் கூகுள் கிளாசை அறிமுகப்படுத்தி, உலக மக்கள் அனைவரின் பார்வையையும் தங்களது பக்கம் திருப்பியது. 

தற்போது டிரைவர் இல்லாமல் இயங்கும் காரை தயாரிக்கும் பணியில் அதிக கவனம் செலுத்திவருகிறது. 

இந்நிலையில் கூகுள் நிறுவனம், மற்றொரு புதிய கண்டுபிடிப்பை அறிமுகப்படுத்த உள்ளது. 

அந்த கண்டுபிடிப்பு என்ன தெரியுமா... 

வைஃபை மூலம் இயங்கும் கேமராதான் கூகுளின் அடுத்த கண்டுபிடிப்பு. 

வைஃபை கேமரா என்ற உடன்... நீங்கள் ஏற்கனவே வைபையில் இயங்கும் கேமராக்கள் சந்தையில் நிறைய இருக்கிறது என்றுதான் நினைப்பீர்கள். 

ஆனால் கூகுளின் வைஃபை கேமராக்கள் மற்ற கேமராக்களை விட பல தனித்தன்மைகளை பெற்றுள்ளது. அதை பற்றி இங்கு விரிவாக காண்போம். 

வைஃபை மூலம் இயங்கும் இந்த கேமராவை வீடு அல்லது அலுவலகத்தில் பொருத்தி, அதை வைஃபையுடன் இணைத்துவிடவேண்டும். 

பின்னர் நாம் தைரியமாக எங்கு வேண்டுமானாலும் செல்லலாம். காரணம் வைஃபையுடன் இணைக்கப்பட்டிருக்கும் கேமரா குறிப்பிட்ட நேரத்திற்கு ஒரு முறை அது பொருத்தப்பட்டுள்ள இடத்தை புகைப்படம் எடுத்து நமது ஸ்மார்ட் போனிற்கு அனுப்பிவிடும்.

வீட்டில் தீவிபத்து அல்லது மற்ற அசம்பாவிதங்கள் ஏதுவும் நேர்ந்தால் இந்த கேமராவில் உள்ள ஒரு சென்சார் கருவி புகைப்படத்துடன், அபாயத்தை தெரிவிக்கும் ஒருவித சங்கேத ஒலியையும் உங்களது ஸ்மார்ட் போனிற்கு அனுப்பும்.

இதன் மூலம் வெகு தொலைவில் இருந்தால் கூட வீட்டில் நடக்கும் நிகழ்வுகளை இருந்த இடத்தில் இருந்தே பார்த்து தெரிந்துகொள்ளலாம். 

கூகுளின் வைஃபை கேமரா குறித்த அதிகாரப்பூர்வ அறிவிப்பு இன்னும் வெளியாவில்லை என்றாலும், இந்த கருவிக்கு சிறிய நிறுவனங்கள் இடையே இப்போதிருந்தே வரவேற்பு பெருகியுள்ளது.