இல்லாள் என்பதற்கு ஆண்பால் சொல் என்ன?

இல்லாள் என்பது இல்லத்தை நிர்வகிப்பவளாகிய பெண்ணைக் குறிக்கிறது. இல்லத்தாள். இல் ஆள். இல்லத்தை ஆள்பவள் என்று நாம் கவித்துவமாக விளக்கம் கொடுப்பது வேறுவகை. அதன் நேரடி ஆண்பால் சொல்லான ‘இல்லான்’ என்பது இல்லாதவனையே குறிக்கிறது.

இல்லான் என்றால் இல்லத்தை உடைய ஆடவன் என்று முதற்கண் கருதப்படுவதில்லை. ஏழை என்றே கருதப்படும். ஆனால், இல்லாள் இருக்கும்போது ஆண்பால் இருந்தே ஆகவேண்டும் அல்லவா ? ஆண்பால் சொல் இல்லை என்றால் பண்பாடே கேள்விக்குறியாகிறதே. ஊன்றித் தேடியதில் ‘இல்லாளன்’ என்ற சொல் இருக்கிறது.

இல்லாளன் வைக்கவெனத் தம்பக்கல் முன்னிருந்த
நல்லநறு மாங்கனிக ளிரண்டினிலொன் றைக்கொண்டு
- என்று திருத்தொண்டர் புராணம் நவில்கிறது.

இந்தச் சொல்லின் நுண்மையான பொருள் ‘இல்லாள் உடையவன்’ என்பதாகும். இல்லான்’ என்பதுகூட ‘இல்லத்தை உடையவன்’ என்று வெறுமையாகப் பொருள் தருகிறது. அதில் திருமணமானவன் என்ற குறிப்பு இல்லை. ‘இல்லாளன்’ என்பதில் இல்லமும் இருக்கிறது. இல்லத்தரசியும் இருக்கிறாள் !

- கவிஞர் மகுடேசுவரன்