காக்கி சட்டை - திரை விமர்சனம் !!

கதைச்சுருக்கம் :

ஆரம்பத்தில் அமைதி போலீசாக வந்து காமெடி பண்ணும் சிவகார்த்திகேயன்... ஒரு கட்டத்தில் அவரது வாழ்க்கையில் ஏற்படும் திருப்புமுனையால், மனித உடலுறுப்புகளை திருடி விற்கும் கும்பலை கண்டிபிடித்து எப்படி அழிக்கிறார் என்பதை ஆக்சன் தீ பறக்க அதிரடியாக, அதே அளவுக்கு காமெடியாக சொல்லியிருக்கும் படம் தான் காக்கி சட்டை.  

சரி வாங்க இப்போ விரிவான கதைய பார்ப்போம்...

காவல் நிலையத்தில் ஒரு சாதாரண போலீசாக பணிபுரிகிறார்... நம்ம ஹீரோ சிவகார்த்திகேயன்(மதிவாணன்). ஹீரோயின் குடும்பத்துக்கு அவர் செய்யும் ஒரு உதவியினால் ஸ்ரீ திவ்யாவின் அறிமுகம் கிடைக்கிறது. அதுவே சில நாளில் காதலாக மாறுகிறது.

ஒரு சாதாரண போலீசாக இருந்தாலும் நேர்மையாக இருக்கவேண்டும் என்று நினைக்கிறார் நம்ம சிவா. ஆனால், அவர் வேலைசெய்யும் காவல் நிலையத்தில் உள்ள மற்றவர்களெல்லாம் சிவாவுக்கு எதிர்மறையாக இருக்கிறார்கள். இதனால் ஆத்திரமடையும் சிவா... இன்ஸ்பெக்டர் பிரபுவிடம் தனது ஆதங்கத்தை எடுத்து உரைக்கிறார்.

"தொட்டாலே ஷாக் அடிக்கிற மாதிரி ஒரு பெரிய கேஸ் இருந்த புடிச்சுட்டு வா... அப்புறம் நான் நடவடிக்கை எடுக்கலைன்னா.. கேளு" என பிரபு சொல்ல... ஹீரோவின் ஆக்சன் களம் ஆரம்பிக்கிறது.... இந்நிலையில், ஒரு மருத்துவமனையில் மனித உடலுறுப்புகளை திருடி வியாபாரப் பொருளாக பாவித்து விற்பனை செய்யும் கொடூர குற்றம் நடப்பது சிவகார்த்திகேயனுக்கு தெரியவருகிறது.

இறுதியாக உடலுறுப்புகளை திருடி விற்கும் கும்பலை, கண்டிபிடித்து, அவர்கள் கொடுக்கும் சாவால்களை எல்லாம் சமாளித்து, வில்லன்களை எல்லாம் எப்படி அழிக்கிறார் என்பது தான் படத்தின் மீதிகதை.  

மெரீனா, மனம் கொத்தி பறவை, எதிர்நீச்சல், வருத்தப் படாத வாலிபர் சங்கம், மான் கராத்தே என காமெடி ஹீரோவாக நடித்து வந்த சிவகார்த்திகேயனுக்கு போலீஸ் வேடம் நன்றாக பொருந்தியுள்ளது. இந்த படத்தில் காமெடியிலும், ஆக்சனிலும் கலக்கி இருக்கிறார்.

ஸ்ரீதிவ்யா படத்தின் நாயகியாக மட்டுமல்லாமல், கதையின் நாயகியாகவும் வருகிறார். பாடல் காட்சிகளில் அழகு பதுமையாக வந்து ரசிகர்களை கொள்ளை கொள்கிறார்.

இன்ஸ்பெக்டராக வரும் பிரபுவுக்கு சுவாரசியமான கதாபாத்திரம்...

இம்மான் அண்ணாச்சி, மனோபாலா காமெடி படத்திற்கு கூடுதல் பலம் என்றே சொல்லலாம்.

முதல் பாதி காதல், காமெடி என ஜாலியாக நகர... இரண்டாம் பாதியில் ஆக்சன் அனல் பறக்கிறது... காமெடி ஹீரோவாக நடித்து வந்த சிவகார்த்திகேயனை, ஆக்சன் ஹீரோவாக தேவையான இடங்களில் காட்டியிருப்பது இயக்குனரின் திறமையை பிரதிபலிக்கும் விதமாக இருக்கிறது.  

அனிருத்தின் இசையில் அனைத்துப் பாடல்களும் ஏற்கனவே செம ஹிட். பின்னணி இசையிலும் அசத்தியிருக்கிறார் அனிருத்.

மொத்தத்தில் காக்கி சட்டை.... நல்ல பொழுது போக்கு படம் தாங்க....  நம்பி போகலாம்....