லிங்குசாமி தயாரிப்பில் கமல் நடிப்பில் சமீபத்தில் வெளியான உத்தம வில்லன் திரைப்படம் எதிர்பார்த்த அளவுக்கு வெற்றியைப் பெறவில்லை. அது மட்டுமல்லாமல், இப்படம் வெளியாவதில் பல்வேறு பிரச்சினைகளும் எழுந்தது. இந்த படம் மூலம் தயாரிப்பாளர் லிங்குசாமிக்கு பெரிய அளவில் நஷ்டம் ஏற்பட்டது.
இந்நிலையில், இப்படத்தால் ஏற்பட்ட நஷ்டத்தை ஈடுகட்டும் விதமாக கமல் நடிப்பில் உருவாகி வரும் தூங்காவனம் படத்தின் உரிமையை லிங்குசாமிக்கு அளிக்க கமல் முடிவு செய்துள்ளதாக கூறப்படுகிறது. இதுகுறித்து அதிகாரப்பூர்வ தகவல்கள் இதுவரை வெளியாகவில்லை என்றாலும், விரைவில் வெளியிடுவார்கள் என எதிர்பார்க்கப்படுகிறது. ‘தூங்காவனம்’ படத்தில் கமலுக்கு ஜோடியாக திரிஷா நடித்து வருகிறார். மேலும், கிஷோர், பிரகாஷ் ராஜ், சம்பத், யூகி சேது உள்ளிட்டோரும் முக்கிய கதாபாத்திரத்தில் நடித்து வருகின்றனர்.
இப்படத்தின் படப்பிடிப்பு தற்போது விறுவிறுப்பாக நடைபெற்று வருகிறது. ஆகஸ்ட் மாதத்தின் தொடக்கத்துக்குள் இதன் படப்பிடிப்பு முடிந்துவிடும் என எதிர்பார்க்கப்படுகிறது. இப்படத்தின் கமலிடம் நீண்டகாலமாக இணை இயக்குனராக பணியாற்றிய ராஜேஷ் செல்வம் என்பவர் இயக்கி வருகிறார் என்பது குறிப்பிடத்தக்கது.
|