டிஜிடல் தொழில்நுட்பத்தில், புதிய காட்சிகளுடனும் மீண்டும் வெளியாகிறது காமராஜ் திரைப்படம் !!

பழைய படங்களை ரீமேக் செய்வதும், அல்லது அதை புதுபித்து வெளியிடுவதும் தான் இன்றைய தமிழ் சினிமாவின் புதிய ட்ரென்ட். இந்த வகையில் கடந்த 2004 ஆம் ஆண்டு வெளியாகி, தமிழக மக்களின் நன்மதிப்பையும், அரசின் பாராட்டுகளையும் பெற்ற, காமராஜரின் வரலாற்றைக்கூறும், "காமராஜ்" திரைப்படம், டிஜிடல் தொழில்நுட்பத்தில் புதுப்பிக்கப்பட்டு, சில மாற்றங்களுடன் விரைவில் வெளியாக இருக்கிறது. 

காமராஜர் :

காமராஜர் தமிழ் நாட்டின் முன்னாள் முதலமைச்சர்களுள் ஒருவர் ஆவார். 1954 முதல் 1963 வரை தமிழகத்தில் மூன்று முறை முதலமைச்சராக இருந்தவர். தமிழகத்தில் பள்ளிக் குழந்தைகளுக்கு இலவச மதிய உணவுத் திட்டத்தை அறிமுகப்படுத்தியவரும் இவரே. காமராஜர் எளிமைக்கும் நேர்மைக்கும் பெயர் பெற்றவர். இவர், தென்னாட்டு காந்தி, படிக்காத மேதை, அரசரை உருவாக்குபவர் (King Maker), பெருந்தலைவர் என்றெல்லாம் புகழப்படுகிறார். மேலும், நம் நாட்டில், ஊழலே செய்யாதவர்  என்று விரல் நீட்டி சொல்லக் கூடியவர்களை விரல் விட்டே எண்ணி விடலாம் அப்படிப்பட்டவர்களில் ஒருவர் காமராஜர் ..அதுவும் அவர் தமிழக மண்ணின் மைந்தர் என்பதில் நாம் பெருமைப்பட்டுக் கொள்ளலாம். 

101 ருபாய் சொத்துடைய முதலமைச்சர் :

கடந்த 1975 -ல் காமராஜர் இறந்த போது எஸ்டேட் டாக்ஸ் என்ற அரசாங்கத்தை சேர்ந்தவர்கள் அவரது சொத்து மதிப்பை கணக்கிட வந்தனர் அப்போதைய நடைமுறை அது.

அப்படி வந்தவர்கள் எல்லாவற்றையும் ஆராய்ந்து பார்த்து இவர் ஏழை இல்லை… பரம ஏழை! மூன்று முறை முதல்வராக இருந்த இவர் இப்படியொரு ஏழையாக இருப்பார் என்று நாங்கள் எதிர்பார்க்க வில்லை என்று ஆச்சர்யப்பட்டனர். காரணம் வாடகை வீடு,சட்டைப் பையில் 101 ரூபாய் மட்டுமே அவரது சொத்தாக இருந்தது, அப்படிப்பட்டவரின் வாழ்கையை ரமணா கம்யூனிகேசன்ஸ் என்ற நிறுவனம் 

“காமராஜ்”  என்ற பெயரில், 2004 ம் ஆண்டில் திரைப்படமாக உருவாக்கியது. இந்த படத்திற்கான வரவேற்பு பெருகவே, படத்தை, ஆங்கிலத்திலும், இந்தியிலும் மொழிபெயர்ப்பு செய்தது ரமணா கம்யூனிகேசன்ஸ் நிறுவனம். 

தற்போது, “காமராஜ்” படத்தை தமிழில் மெருகேற்ற நினைத்த, இயக்குனர். அ. பாலகிருஷ்ணன், அதற்கான வேலைகளை மேற்கொண்டுவருகிறார். இந்த படத்தில் 15 புதிய காட்சிகளை இணைக்க நினைத்த படக்குழு, காமராஜராக இப்படத்தில் நடித்த ரிச்சர்ட் மதுரம் இறந்து விட்டதால் அவரது மகன் பிரதீப் மதுரம் காமராஜராகவும், பெரியார் வேடத்தில் விஜயகுமாரம் நடிக்க வைத்திருக்கிறார்கள். 

இளையராஜா இசையில், டிஜிடல் தொழில்நுட்பத்தில், மீண்டும் நம் அபிமான திரையரங்குகளில் வலம் வரப்போகிறார் "காமராஜர்"..