கந்தரகோலம் என்ற சொல்லின் பொருள் !!

தீவிரமாக ஆராய்ந்ததில் மூன்று வகையான பொருள் சாத்தியங்கள் உள்ளன. எது சரியாக இருக்கலாம் என்பதை நீங்களே முடிவு செய்துகொள்ளுங்கள்.

(1). கந்தர்வம் என்றால் ‘தலைவனும் தலைவியும் தாமே மணந்துகொள்ளுதல்’. தன்னிச்சைப்படி முன்பின் விளைவுகளைப் பற்றிக் கவலைப்படாமல் அவர்களாக ‘கந்தர்வகோலத்தில்’ நிற்பது. இது மருவி ‘கந்தரகோலம்’ ஆகியிருக்கலாம்.

(2). களத்தில் மாடுகள், யானைகள் கொண்டு மிதித்தபின் நெற்கதிர்களைக் கோல்கொண்டு அடிப்பதற்குக் ‘கந்தடித்தல்’ என்று பெயர். இதில் ‘கந்து’ என்பது தானியம் உதிரும் முன்னுள்ள முற்றிய நெற்பயிர். வைக்கோலுக்கு முந்திய நிலை. அரைகுறையாய் மணியுதிர்ந்து வைக்கப்பட்ட நிலையைக் ‘கந்து அரைக்கோலம்’ என்று சொல்லப்போய் ‘கந்தரைகோலம்’ என்றாகி ‘கந்தரகோலம்’ ஆகியிருக்கலாம்.

(3). திறம் வளம் களம் போன்றவை கடைசியெழுத்து மாறித் தோன்றி திறன் வளன் களன் என்று கடைப்போலிகளாகும். பந்தல் என்பது பந்தர் என்று கடைப்போலி ஆவதுபோல் கந்தல் என்பது கந்தர் என்று கடைப்போலி பெறும். கந்தல் என்பதற்குக் கிழிந்த ஆடை, அறியாமல் விளையும் குற்றம், ஒழுக்கக்கேடு போன்றன பொருள்கள். கந்தல் என்பதை அறியாமல் விளைந்த குற்றம் எனப் பொருள்கொண்டு கடைப்போலி பெற்றால் கந்தர் என்றாகும். அறியாமல் போட்டுக் குழப்பிக் கெடுத்து வைத்த தோற்றம்தான் கந்தர்கோலம், கந்தரகோலம்.

இதற்கும் முருகராகிய கந்தர்க்கும் எந்தத் தொடுப்பும் இருப்பதாய்த் தெரியவில்லை. இம்மூன்றில் எது பொருத்தம் என்று அவரவரே முடிவுசெய்துகொள்ளுங்கள்.

- கவிஞர் மகுடேசுவரன்