மற்றுமொரு மரணம்

அந்த சிதைந்த சித்திரம்

சாலையில் வரையப்பட்டிருந்தது

அதன் ரத்தக் கறைகள்

கோரமாயிருந்தன

உலகில் எந்த ஓவியனும்

வரைய இயலாத காட்சியாகத்தான்

அது இருந்தது

அந்த மரணத்தின்

கடைசி நிமிடங்கள்

கடந்து செல்ல முடியாதவைகளாக இருந்தன

அந்த இருளில்

விட்டு விட்டு விழுந்த

வெளிச்சங்கள்

எந்த விடியலுக்குமான

அறிகுறிகளற்றிருந்தது

சில கைப்பேசி படமெடுத்தல்களும்

சில காட்சிப் பதிவுகளும்

கண்டும் காணா

கடப்புகளும்

தொடர்ந்து நிகழ்ந்து

கொண்டிருந்தன

ஒரு மரணம்

இப்படி வேடிக்கை பார்க்கப்படுவது

விநோதமாக இருந்தது

சோகங்களை தின்று

கொண்டிருந்தன பிரமிப்புக்கள்

அதன் கண்களில் கசிந்திருந்தது

வாழ்வின் கடைசி துளி

இறுதியாக அந்த சித்திரத்தை

யாரோ அகற்றுகிறார்கள்

அதன் விழிகளில் தெரிந்த

இறுதி ஏக்கங்கள்

சாலையெங்கும்

எஞ்சியிருந்தது

மற்றுமொரு சாலை மரணம்

செய்தியானது

பிரமிப்பூட்டும்

காட்சிப்பதிவுகளுடன்.

நிலாரவி.