உலகையே கலக்கி வரும் பேஸ்புக் மோகம் மலையாள திரையுலகை மட்டும் விட்டு வைக்குமா என்ன. தற்போது மலையா நடிகர், நடிகைகள் இடையே பேஸ்புக் பயன்படுத்துவது அதிகரித்து விட்டது. சூப்பர் ஸ்டார் முதல் சுண்டக்கா ஹீரோ, ஹீரோயின் வரை அனைவரும் பேஸ்புக் கணக்குகளை தொடக்கி தங்களது, கருத்துக்களையும், புகைப்படங்களையும், அனுபவங்களையும் வாரி வழங்கி வருகின்றனர்.
கேரளா திரையுலகை பெறுத்தவரை முதலில் மோகன்லாலும், மம்முட்டியும் பேஸ்புக்கில் நம்பர் ஒன்னாக இருந்தார்கள். இப்போது அவர்களைத் தாண்டி மலையாள நடிகைகள் சென்று கொண்டிருக்கிறார்கள். மலையாள சினிமா நட்சத்திரங்களில் இப்போது பேஸ்புக்கில் அதிக லைக்குகளோடு முன்னணியில் இருப்பது யார் தெரியுமா. நம் சர்ச்சை நாயகி நஸ்ரியா நாசிம் தான். சமீபத்தில் நையாண்டி பட சர்ச்சையினால் இவர் லைக்குகள் உச்சத்தை தொட்டன.
இன்றைய நிலவரப்படி நஸ்ரியா 23 லட்சத்து 31 ஆயிரத்து 418 லைக்குகளுடன் முதல் இடத்தில் இருக்கிறார். அவரை தொடர்ந்து, பாவனா 15 லட்சத்து 25 ஆயிரம் லைக்குகளுடன் இரண்டாம் இடத்தில் உள்ளார். முதல் இடத்தில் இருந்த மோகன் லால் தற்போது மூன்றாம் இடத்திற்கு தள்ளப்பட்டுள்ளார். நான்காவது இடத்தில் மம்முட்டியும். ஐந்தாவது இடத்தில் மம்முட்டியின் மகன் துல்கர் சல்மான் உள்ளனர்.
|