உத்தம வில்லன் படத்திற்கு பிறகு கமல் ஹாசன் நடிப்பில் அடுத்து வெளியாக இருக்கும் படம் பாபநாசம். கமல் ஹாசன் நடிப்பில் சமீபத்தில் வெளியான உத்தம வில்லன் படம் எதிர்பார்த்த அளவுக்கு வெற்றியைத் தேடித்தரவில்லை. இதனால்... எப்படியாவது ஒரு மிகப்பெரிய வெற்றியை எதிர் நோக்கியுள்ளார் கமல். ஜீது ஜோசப் இயக்கத்தில், மோகன் லால், மீனா நடிப்பில் வெளியாகி மிகப்பெரிய வசூல் சாதனையை நிகழ்த்திய படம் திரிஷ்யம். இந்தப் படத்தின் தமிழ் ரீமேக் தான் பாபநாசம். பாபநாசம் படத்தில் மோகன்லால் கதாப்பாத்திரத்தில் கமல் ஹாசனும், மீனா கதாப்பாத்திரத்தில் கவுதமியும் நடித்துள்ளனர். ஜீது ஜோசப் இந்த படத்தை இயக்கி உள்ளார். ஜிப்ரான் இந்த படத்திற்கு இசை அமைத்துள்ளார். இந்த படத்தின் அனைத்து வேலைகளும் முடிவடைந்து பல நாட்கள் ஆகிவிட்டன. உத்தம வில்லன் ரிலீஸுக்கு பிறகு இந்த படத்தை ரிலீஸ் செய்ய காத்திருந்தனர். அதன்படி இப்போது அதுவும் ரிலீஸாகிவிட்டதால் அடுத்தப்படியாக பாபநாசம் படத்தை ரிலீஸ் செய்வதற்கான வேலைகள் மும்முரமாக நடந்து வருகிறது. தற்போதைய தகவல் படி பாபநாசம் படத்தை ஜூலை 17ம் தேதி ரிலீஸ் செய்ய முடிவு செய்துள்ளனர்.
|