தொண்டு நிறுவனங்களுக்கு அதிகச் சொத்துகளை எழுதி வைத்த ரத்தன் டாடா

ரத்தன் டாடாவின் அதிகப்படியான சொத்துகள் அவரின், தொண்டு நிறுவனங்களுக்குத்தான் கிடைக்கும் என அவர் எழுதிவைத்த உயிலின் மூலம் மதிப்பிடப்பட்டுள்ளது. மேலும், அவர் தன்னுடைய செல்லப்பிராணிகளுக்காக ரூ.12 லட்சத்தை நிதியாக ஒதுக்கியுள்ளார்.

பிரபலத் தொழிலதிபரும், டாடா குழுமத்தின் முன்னாள் தலைவருமான ரத்தன் டாடா, 2024, அக்டோபர் 9-ம் தேதியன்று  உடல் நலக்குறைவால் காலமானார். அவரின் சொத்துக்கள் யார் யாருக்குக் கிடைக்க வேண்டும் என்று ரத்தன் டாடா உயில் எழுதி இருந்தார். அதில், டாடா சன்ஸ் பங்குகள் உட்படத் தனது செல்வத்தின் பெரும்பகுதியைத் தொண்டு நிறுவனங்களுக்கு விட்டுச் சென்றார்.

அதே நேரத்தில், அவர் தனது குடும்பத்தினர், நெருங்கிய நண்பர்கள், ஊழியர்கள் மற்றும் தனது அன்பான செல்லப்பிராணிகளைக் கூட மறக்கவில்லை. தற்போது தொழிலதிபர் ரத்தன் டாடாவின் உயில் விவரங்கள் வெளிவந்துள்ளன, இது அவரது ரூ.3,800 கோடி சொத்துகள் பகிர்ந்தளிக்கப்பட்டதைக் காட்டுகிறது.

மேலும், "எனது இந்தக் கடைசி உயிலை எதிர்த்து நீதிமன்றத்துக்குச் சென்றால், அந்த நபருக்கு நான் வழங்கிய சலுகைகள் திரும்பப் பெறப்படும். எனது சொத்தின் எந்தப் பகுதியிலும் அந்த நபருக்கு எந்த உரிமையும் கிடையாது" எனப் பிப்ரவரி 23, 2022 அன்று கையொப்பமிடப்பட்ட உயில் கூறுவதாகத் தெரிகிறது.

அவருக்குக் கடைசிக் காலத்தில் மிகவும் நெருக்கமாக இருந்த உதவியாளர் சாந்தனு நாயுடு, ஒன்றுவிட்டசகோதரிகள் ஷிரீன் ஜெஜீபாய் மற்றும் டீனா ஜெஜீபாய் ஆகியோருக்குச் சொத்துக்கள் கிடைக்கும்படி செய்து இருந்தார். நெருங்கிய நண்பர் மெஹ்லி மிஸ்திரி, டாடாவின் 82 வயது சகோதரர் ஜிம்மி நேவல் டாடாவும் உயிலில் சேர்க்கப்பட்டுள்ளார்.

தற்போது ரத்தன் டாடாவின் உயிலை நிறைவேற்றுபவர்கள் அதை உறுதிப்படுத்த மும்பை நீதிமன்றத்தில் ஒரு மனுவைத் தாக்கல் செய்தனர். இதை நீதிமன்றம் சரிபார்க்கிறது.

டாடாவின் விலங்குகள் மீதான அன்பு நன்கு அறியப்பட்டது தான், மேலும் அவரது உயில் அதைப் பிரதிபலிக்கிறது. அவர் தன்னுடைய செல்லப்பிராணிகளுக்காக ரூ.12 லட்சத்தை நிதியாக ஒதுக்கி, அவற்றின் பராமரிப்புக்காக ஒவ்வொரு காலாண்டிலும் ரூ.30,000 பெறுவதை உறுதி செய்தார்.

நீதிமன்ற ஆவணங்களின்படி, டாடாவின் வெளிநாட்டுச் சொத்துகள் சுமார் ரூ.40 கோடி மதிப்புடையவை எனக் கூறப்படுகிறது. அவரது தனிப்பட்ட ஆடம்பரக் கடிகாரங்களின் தொகுப்பும் உயிலில் சேர்க்கப்பட்டுள்ளது. இந்தத் தொகுப்பில் Bvlgari, Patek Philippe, Tissot மற்றும் Audemars Piguet போன்ற  65 கடிகாரங்கள் உள்ளன.