சென்னையில் தூய தமிழ் பேசுவோர் சங்கம் இனிதே தொடங்கியது

நேற்று ஞாயிறு மாலை, தூய தமிழ் பேசுவோர் சங்கத்திற்கு முகநூல் நட்புகள் வந்திருந்தனர். பலரும் வருவதற்கு விருப்பம் தெரிவித்து இருந்தாலும் சிலர் மட்டுமே நேரில் வரும் வாய்ப்பை பெற்றனர். வந்திருந்த அனைவரும் தூய தமிழில் பேச எந்த வித பயிற்சியும் இல்லாதவர்கள் ஆனால் தூய தமிழில் பேச வேண்டும் என்ற தீராத வேட்கை உடையவராக இருந்தனர். அவர்களுக்கு சில போட்டிகள் வைத்து தூய தமிழில் பேச ஊக்கம் கொடுக்கப்பட்டது. 

முதல் சுற்று அறிமுக சுற்று: தங்களை தாங்களே இரண்டு நிமிடத்திற்குள் தூய தமிழில் அறிமுகம் செய்து கொள்ள வேண்டும். இரண்டாம் சுற்று : தமிழில் கலந்துள்ள ஆங்கில சொற்களுக்கு இணையான தமிழ் சொற்களை கண்டறிய வேண்டும்.  மூன்றாம் சுற்று : தமிழ் கலந்துள்ள வடமொழி சொற்களுக்கு இணையான தமிழ் சொற்களை கண்டறிய வேண்டும் . நான்காம் சுற்று சூழ்நிலை சுற்று : இரு நபர்களுக்கு ஒரு சூழ்நிலையை உருவாக்கிக் கொடுத்து அந்த சூழ்நிலையில் அவர்கள் தூய தமிழில் உரையாட வேண்டும். இதில் ஒருவர் அலைப்பேசி வாடிக்கையாளர் சேவைக்கு தொடர்பு கொண்டு தன்னுடைய அலைபேசி எண் அட்டை தொலைந்து போய்விட்டது என்று புகார் அளிக்கிறார். இன்னொருவர் புகார் பெரும் வாடிக்கையாளர் சேவை முகவராக நடிக்கிறார். இவர்கள் இருவரும் சிறப்பாக தூய தமிழில் பேசியதற்கு பரிசு பெற்றனர். 

நிகழ்ச்சியின் முடிவில் சிறப்பாக தூய தமிழில் பேசியதற்கு திரு.சுந்தர் மூவை, மருத்துவர் செந்தமிழ்ச்செல்வன் மற்றும் ஆசைத் தம்பி ஆகியோர் தமிழர் மென் ஆடைகளை பரிசாக பெற்றனர். தூய தமிழ் பேசுவோர் சங்கம் மீண்டும் அடுத்த மாதம் கூடுவதாக உள்ளது. வருகை தந்த அனைவரும் தங்களால் இயன்ற வரை இனி பொதுவில் தூய தமிழில் பேச உள்ளதாக உறுதி அளித்தனர். தூய தமிழில் பேசுவோம் , தமிழ் மொழியை காப்போம்.
நன்றி:இராசகுமார் பழனிசாமி