கோயம்புத்தூர்த் தமிழ்ச் சங்கம் தமிழ்க் காப்புக் கூட்டியக்கம் இணைந்து நடத்தும் தமிழ் உரிமை மீட்பு எழுச்சி மாநாடு 2022 கோவை இலட்சுமி திருமண மண்டபம், தெக்குபாளையத்தில் செப்டம்பர் 25,2022 அன்று தமிழ் மிகச்சிறப்பாக நடைபெற்றது. இம்மாநாட்டின் நோக்கமானது சங்ககாலம் முன்தொட்டு தமிழ்பெற்று இருந்த ஏற்றத்தை இழந்து இருக்கின்ற நிலையில் அந்த உரிமையை மீட்டு எடுப்பதற்கு உண்டான முயற்சிதான் இந்த மாநாட்டின் மைய நோக்கம். தற்போதைய இளைய தலைமுறையினரிடம் நமது சங்ககாலத் தமிழை கொண்டு சேர்ப்பது.எங்கும் தமிழ், எதிலும் தமிழ், வழிபாட்டு தலங்கள், சடங்குகள், வாழ்வில் சடங்குகளில் தமிழ், பள்ளி, கல்லூரி, நீதிமன்றங்கள் ஆகியவற்றில் தமிழையே பயன்படுத்த வேண்டும் போன்ற பல்வேறு கோரிக்கையை வலியுறுத்தி இந்த மாநாடு நடைபெறுகின்றது. இந்த மாநாடு கோவை மாவட்டத்தை சேர்ந்த அனைத்துத் தமிழ் சங்கங்கள், மாநில மற்றும் அகில இந்தியத் தமிழ்ச்சங்கங்களின் ஒருங்கிணைப்போடு நடைபெறுகின்றது.
இந்நிகழ்ச்சியில் மின்சாரதுறை அமைச்சர் செந்தில் பாலாஜி சிறப்பு விருந்தினரராகக் கலந்து கொண்டு சிறப்பிக்க உள்ளார்கள்.பேரூர் ஆதீனம் தவத்திரு. சாந்தலிங்க மருதாசல அடிகளார் மற்றும் சிரவை ஆதீனம் தவத்திரு. குமரகுருபர சுவாமிகள் ஆகியோரின் அருளாசியோடும் விழா நடைபெறவுள்ளது. தஞ்சைத் தமிழ்ப் பல்கலைக்கழக மேனாள் துணைவேந்தரும், ஏவிபி பள்ளி தலைவருமான முனைவர் சி. சுப்பிரமணியம் இம்மாநாட்டின் நெறியாளாராக உள்ளார்.துவக்க விழாவில் முன்னாள் நீதிபதி ந. கிருபாகரன் தொடக்கவுரையாற்றுகிறார். மேலும் கோவை, பாரதியார் பல்கலைக்கழக துணைவேந்தர் பெ. காளிராசு கருத்துரையாற்றுகிறார், பெரியார் பல்கலைக்கழக துணைவேந்தர் செகநாதன் வாழ்த்துரை வழங்கிறார் தமிழ்ப் பல்கலைக்கழக துணைவேந்தர் முனைவர் வி. திருவள்ளுவன் சிறப்புரையாற்றுகிறார். மேலும் விழாவில் தமிழ் மற்றும் கல்வித்துறை இயக்குனர்கள் மற்றும் அனைத்துநிலைத் தமிழ் அறிஞர்கள் கலந்து கொள்ள உள்ளார்கள்.
மாநாட்டின் ஒருங்கிணைப்பாளராக தஞ்சை தமிழ் பல்கலை முன்னாள் துணைவேந்தர் சுப்பிரமணியம் அவர்கள் பங்காற்றினார். மேலும் மாநாட்டில் தமிழ்ச் சங்கமம் தலைவர் செ. துரைசாமி, தமிழ்க்காப்புக் கூட்டியக்கம் தலைவர் கா. ச. அப்பாவு, அமைப்புச் செயலாளர் பூ. அ. இரவீந்திரன், மாநாட்டுப் பொருளாளர் கவிஞர் இல. மணி, சமூக செயற்பாட்டாளர் லி. கனகசுப்பிரமணி ஆகியோர் கலந்துகொண்டனர்.
மாநாட்டில் கீழ்காணும் 16 தீர்மானங்கள் நிறைவேற்றப்பட்டன.
1. உலகில் பல நாடுகளில் இருப்பதைப்போலவும், இந்தியாவின் பல நாடுகளில் இருப்பதைப்போலவும் பள்ளிக்கல்வி முழுதும் தாய்மொழியிலேயே கற்பிக்கப்படவேண்டும்.
2. மாநில பாடத்திட்டம், தேசியப் பாடத்திட்டம் , பன்னாட்டுப் பாடத்திட்டம் ஆகிய தமிழ்நாட்டில் இயங்கிவரும் அனைத்திலும் தமிழே பயிற்றுமொழியாக இருக்கவேண்டும். அனைத்து விதமான கல்லூரி பாடத்திட்டத்தில் தமிழ் ஒரு பாடமாக வைக்கப்படவேண்டும். மேலும் போதிய கலைச்சொற்கள் உள்ள துறைகளில் பாடத்திட்டங்களை தமிழில் உருவாக்கவேண்டும். தொடர்ச்சியாக கலைச்ச்சொல்லாக்கப் பணிகள் உருவாக்கப்பட்டு தமிழிலிலேயே கல்லூரிப் பாடங்கள் அமையவேண்டும்.
3. அனைத்து துறைகளிலும் தொடர்புகள், கடிதப்போக்குவரத்துகள் , தொடர்பு ஆவணங்கள் தமிழில் அமையவேண்டும்.
4. வழக்காடு மொழியாக தமிழே இருக்கவேண்டும்.
5. 8-வது அட்டவணையில் உள்ள அனைத்து மொழிகளையும் ஆட்சிமொழியாகவும், அலுவல் மொழியாகவும் ஆக்கவேண்டும்.
6. வழிபாட்டு மொழியாக தமிழ் மொழி இருக்கவேண்டும் என்று அரசாணை வெளியிட்டு நடைமுறைப்படுத்த கேட்டுக்கொள்கிறது.
7.தமிழர்களின் அனைத்து வாழ்வியல் சடங்குகளும் தமிழில் இருக்கவேண்டும் என்று தீர்மானிக்கப்பட்டது.
8. வணிக நிறுவனங்களின் முகப்புப் பலகைகள் தமிழில் இருக்கவேண்டும் என்று உறுதிசெய்து அதை கண்காணிக்கும் பொறுப்பை உள்ளாட்சி அமைப்புகளுக்குக் கொடுக்கவேண்டும்.
9. திருக்குறளை உலகப் பொதுமறையாக அறிவிக்குமாறு ஐக்கியநாடுகள் கல்வி-பண்பாட்டு அமைப்பான யுனெஸ்கோ -வை கேட்டுக்கொள்கிறோம். அதற்கான முயற்சியை ஒன்றிய அரசும் , தமிழ்நாடு அரசும் மேற்கொள்ளவேண்டும் என்று கேட்டுக்கொள்ளப்படுகிறது.
10.1330 திருக்குறளையும் ஒன்றிய அரசின் கட்டுப்பாட்டில் உள்ள சங்ககிரி மலையில் ஒவ்வொரு குறளையும் தனித்தனியாக பதிவுசெய்ய நிதி ஒதுக்கி செயல்படுத்துமாறு கேட்டுக்கொள்ளப்படுகிறது.
11. பல தமிழ் ஆளுமைகளுக்கு ஒன்றிய அரசு அஞ்சல் தலை வெளியிட்டுள்ளது. தொல்காப்பியருக்கும் சித்திரை 1 அன்று அஞ்சல்தலை வெளியிடவேண்டும் என்று இம்மாநாடு கேட்டுக்கொள்கிறது.
12. சித்திரை முழுமதி நாளில் தொல்காப்பியர் சிலைகளுக்கு மாலை அணிவிக்க அரசு ஆணை வெளியிட்டுள்ளதுபோல் உள்ளதுபோல் சித்திரை மாதத்தை தொல்காப்பியர் மாதமாக அறிவிக்க வேண்டுகிறோம்.
13. தமிழ்நாடு அரசின் வேலைவாய்ப்புகளில் தமிழ் வழியில் கல்விகற்றோருக்கு 80% தனி ஒதுக்கீடு செய்ய தமிழ்நாடு அரசை கேட்டுக்கொள்கிறது.
14. ஊடகங்களில் கலப்பற்ற தமிழ் பேசுவதற்கு மலேசியா , சிங்கப்பூர் ஆகியவற்றில் இருப்பதுபோல் ஒரு தரக்கட்டுப்பாட்டு அமைப்பை ஒன்றிய மாநில அரசுகள் உருவாக்குமாறு இம்மாநாடு கேட்டுக்கொள்கிறது.
15. தமிழில் பெயர் சூட்டுதல், பெயரின் முதல் எழுத்தை தமிழில் எழுதுதல் , தமிழில் பெயர் தாங்கி பள்ளிகளில் சேரும் குழந்தைகளுக்கு ஊக்கத்தொகை வழங்கலாம் எனவும் அரசுக்கு பரிந்துரை செய்யப்படுகிறது.
16. தமிழகத்திலிருந்து புறப்படுகிற, தமிழகத்திற்கு வந்துசேர்கிற அனைத்து வானூர்திகளிலும் தமிழில் கட்டாயமாக அறிவிப்புகள் இடம்பெறவேண்டும் என்று கேட்டுக்கொள்கிறது.
|
