3 ஆயிரம் ஆண்டு பழமையான தங்க ஆபரணங்களை கலிபோர்னியாவில் சோதிக்க உயர்நீதிமன்றம் உத்தரவு!

கீழடியில் கிடைத்த 3 ஆயிரம் ஆண்டு பழமையான தங்க ஆபரணங்களை, கலிபோர்னியாவில் உள்ள ஆய்வகத்தில் பரிசோதித்து அறிக்கை தாக்கல் செய்ய உயர்நீதிமன்ற  கிளை உத்தரவிட்டு உள்ளது.

சென்னையை சேர்ந்த வக்கீல் கனிமொழி மதி,  மதுரை உயர்நீதிமன்ற கிளையில் தாக்கல் செய்த மனுவில் கூறி இருந்ததாவது:

சிவகங்கை மாவட்டம், திருப்புவனம் கீழடியில் ஆற்றங்கரை நாகரீகத்தின் அடிப்படையில் அகழாய்வு மேற்கொள்ளப்பட்டது. இதில் ஏராளமான ஆவணங்கள், பொருட்கள் கண்டெடுக்கப்பட்டன. சுமார் 2200 ஆண்டுக்கு முந்தைய 5 ஆயிரத்திற்கும் மேற்பட்ட பொருட்கள் கிடைத்துள்ளன.

இங்கு அகழாய்வு பணியைத் தொடரவும், கீழடியில் அருங்காட்சியகம் அமைக்கவும், இங்கு சிறப்பாக பணியாற்றிய தொல்லியல் துறை கண்காணிப்பாளர் அமர்நாத் ராமகிருஷ்ணனை மீண்டும் பணியில் தொடரவும் உத்தரவிட வேண்டும்.

இவ்வாறு மனுவில் கூறியிருந்தார்.

இதேபோல், மதுரையை சேர்ந்த வக்கீல் பிரபாகர பாண்டியன் தாக்கல் செய்த மனுவிலும் அமர்நாத் ராமகிருஷ்ணனே ஆய்வை தொடர்ந்து நடத்தி அறிக்கை தாக்கல் செய்ய உத்தரவிட வேண்டும் என கூறப்பட்டிருந்தது. 

இந்த மனுக்கள் நீதிபதிகள் எம்.எம்.சுந்தரேஷ், என்.சதீஷ்குமார் ஆகியோர் முன்  மீண்டும் விசாரணைக்கு வந்தன. அப்போது கூடுதல் அட்வகேட் ஜெனரல் ஆஜராகி, ‘‘மத்திய அரசு 3 கட்ட ஆய்வுகளோடு முடித்துக் கொண்டது. தற்போது தமிழக அரசின் தொல்லியல் துறை சார்பில் 4ம் கட்ட ஆய்வுப்பணிகள் இறுதிக்கட்டத்தை அடைந்துள்ளது.  5ம் கட்ட ஆய்வுப் பணிகளுக்கு அனுமதி கேட்டுள்ளோம்.

கடந்த ஏப்ரல் முதல் செப்டம்பர் வரை நடந்த ஆய்வில் பானைகள், ஓடுகள், விலங்கின பொருட்கள் உள்ளிட்ட 7 ஆயிரத்திற்கும் அதிகமான பொருட்கள் கிடைத்து உள்ளன. குறிப்பாக 3 ஆயிரம் ஆண்டுகளுக்கு முந்தைய தங்க ஆபரணங்கள் ஏராளமாக கிடைத்துள்ளன. 

இவற்றின் சரியான ஆண்டுகள் குறித்து அறிய கலிபோர்னியாவில் உள்ள பீட்டா ஆய்வகத்திற்கு அனுப்ப வேண்டி உள்ளது’’ என்றார்.

இதையடுத்து நீதிபதிகள், தங்க ஆபரணங்களை உடனடியாக கலிபோர்னியாவில் உள்ள பீட்டா ஆய்வகத்திற்கு அனுப்பி வைத்து, அதன் அறிக்கையை 4 வாரத்தில் தாக்கல் செய்ய வேண்டும். அமர்நாத் ராமகிருஷ்ணன் மேற்கொண்ட ஆய்வின் அறிக்கையையும் தாக்கல் செய்ய வேண்டும் என உத்தரவிட்டனர்.