உண்மையை சொன்னால் உன் போல் எனக்கு காதலிக்க தெரியாது..!!

அன்பாய் ஒரு வார்த்தை பேசியவனில்லை 
அக்கறை கேள்விகள் கேட்டவனில்லை
ஆசைகள் ஏதென்று அறிந்தவனில்லை 
அதன்படி யாதொன்றும் செய்தவனில்லை

கோல விழி பார்த்து கொஞ்சியதில்லை 
கோவத்தில் திட்டிவிட்டு கெஞ்சியதில்லை 
 நட்புடன் கை கோர்த்து நடந்தது இல்லை 
நல்லதோ கெட்டதோ பகிர்ந்தது இல்லை 

செல்லமாய் பேர் வைத்து அழைத்ததும் இல்லை
மெல்லமாய் என் காதல் உரைத்ததும் இல்லை
உல்லாச பயணமோ உறவாடும் தருணமோ 
ஒருபோதும் நமக்கு வாய்த்ததே இல்லை 

பின் எங்ஙனம் தான் உணர்ந்தாயோ..!!? 

 
என் உயிரின் தேவையை! 
திசுக்களில் ஒளிந்திருக்கும் 
தினையளவு காதலை ! 
உஷ்ண வார்த்தைகளின் 
உள்ளிருக்கும் உண்மையை !
அதட்டல் மொழியின் ஆழத்திலிருக்கும் 
அன்பை அக்கறையை !

பொழுதெல்லாம் உடனிருந்து புரியாத போதும் 
 புயலொன்று நகரத்தின் நாக்கு அறுத்த -அந்த 
பொல்லாத மௌனத்தில் தான் புரிந்து தொலைத்ததடி
"ஒற்றை இதயத்தில் நம் உயிர் துடிப்பது"