மண்புழு விஞ்ஞானி சுல்தான் அகமது இஸ்மாயில்

சென்னையில் 1951 அக்டோபர் 9ம் தேதி பிறந்தார் சுல்தான் அகமது இஸ்மாயில்.

சென்னை, புதுக் கல்லூரியின் முன்னாள் துணை முதல்வர் மற்றும் பயோடெக்னாலஜி துறைத் தலைவர். 'மண்புழு விஞ்ஞானி’ என்பதுதான் அவரது நிரந்தர அடையாளம். இப்போது உலக அளவில் மண்புழு உரம் குறித்த விழிப்பு உணர்வு அதிகரித்துள்ளது. ஆனால், இது தொடர்பாகக் கடந்த 20 வருடங்களாக ஆய்வுசெய்து அப்போதே மண்புழு உரத்தை உருவாக்கியவர்!

மண்புழு உரத் தொழில்நுட்பத்தைக் குறிக்க 'வெர்மி டெக்’ என்ற வார்த்தையை உருவாக்கிய இவர், உலகம் முழுக்கப் பயணித்து மண்புழு உரத்தின் பெருமைகளை உரக்கப் பேசிவருகிறார். இந்திய இயற்கை விவசாயிகள் கூட்டமைப்பின் தொழில்நுட்ப ஆலோசகராகச் செயல்படுபவர், பள்ளிக் குழந்தைகளுக்கு 100 விதமான அறிவியல் செய்முறைகளை இலவசமாகப் பயிற்றுவிக்கிறார். அந்த அடிப்படை செய்முறை அறிவியலை தென் மாநிலப் பள்ளி ஆசிரியர்களுக்குப் பயிற்றுவிக்கும் பொறுப்பை மத்திய அரசு இவரிடமும் ஒப்படைத்துள்ளது. கழிவுநீரை எளிய முறையில் சுத்திகரிக்கும் தொழில்நுட்பம் மூலம் நகர்ப்புற வீட்டுத் தோட்டங்களைச் செழிக்கச் செய்திருக்கிறார் இஸ்மாயில்!

மண்புழு என்றால் இளக்காரமாகப் பார்க்கும் பார்வை ஒன்று உண்டு. அதை மாற்றி மண்புழுக்களை மரியாதைக்குறியதாகவும் விவசாயிகளின் நண்பனாகவும் பாவித்த அவர் , "நான் இருக்கும் வரை மண்புழுக்களுக்கு இடையே எனது வாழ்க்கை. நான் இறந்த பிறகு என் மீது மண்புழுக்களின் வாழ்க்கை" என கூறியிருக்கிறார்.

மண்புழு தொழில் நுட்பம்

இஸ்மாயில், குழந்தைகளுக்கான ஒரு நிலையான சுற்றுச்சூழல் நடைமுறைக்காக இந்திய அரசின் அறிவியல் மற்றும் தொழில்நுட்பத் துறையுடன் இணைந்து, மண்புழு உரம் தயாரித்தலுக்கான கட்டகம் ஒன்றை உருவாக்கியுள்ளார். மேலும் இவர் தமிழக அரசின் சுற்றுச்சூழல் மற்றும் வனத்துறைக்காக சென்னையிலுள்ள 50 பள்ளிகளில் மண்புழு உரம் தயாரித்தல் செயல்திட்டத்தை நடைமுறைப்படுத்தினார். இது மட்டுமின்றி, இந்தியா மற்றும் வெளிநாடுகளில் உள்ள 200 க்கும் மேற்பட்ட பள்ளிகளில் சுற்றுச்சூழல் விழிப்புணர்வு , திடக் கழிவு மேலாண்மை மற்றும் மண்புழு உரம் தயாரித்தல் சார்ந்த பல விரிவுரைகளை வழங்கியுள்ளார். தற்போது இவர் பினாங்கின் நுகர்வோர் சங்கத்துடன் (CAP) இணைந்து மலேஷியாவில் உள்ள கல்வி நிறுவனங்கள் மற்றும் கரிம வேளாண்மை செய்யும் விவசாயிகள் இடையே கரிம வேளாண்மை , உயிர் தொழில் நுட்பவியல் மற்றும் கழிவு மேலாண்மை போன்றவை குறித்த விழிப்புணர்வை ஊக்குவிக்கும் முயற்சியில் , ஈடுபட்டு வருகிறார்.

மண்புழுவின் எதிர்ப்பு அழற்சி பண்புகள், பீனியல் சீட்டேவின் கட்டமைப்பு மற்றும் மின் உயிர் ஒளிர்வுத் தன்மை ஆகியவைகளிலும் இவர் ஆராய்ச்சிகளை மேற்கொண்டுள்ளார். சுற்றுச்சூழல் கல்வி மற்றும் விழிப்புணர்வுக்காக இந்திய அரசின் சுற்றுச்சூழல் துறையின் அறிஞர் அண்ணா விருது பெற்றுள்ளார்.

பல்வேறு நாடுகளில் உள்ள பள்ளிகள் மற்றும் கல்லூரிகளில் மண்புழுவின் அவசியத்தை குறித்தும் மண்புழு உரம் குறித்தும் விழிப்புணர்வு ஏற்படுத்தி வருகிறார் சுல்தான் அகமது இஸ்மாயில்.