டூரிங் டாக்கீஸ் தான் எனது கடைசி படம் எஸ்.ஏ. சந்திரசேகரன் !!

கடந்த 1981 ஆம் ஆண்டு வெளியான சட்டம் ஒரு இருட்டறை என்ற படத்தின் மூலம் சினிமாவில் இயக்குனராக அறிமுகமானவர் எஸ்.ஏ. சந்திரசேகரன். 

தற்போது இவரது மகனான விஜய், தமிழ் சினிமாவில் முன்னணி ஹீரோக்களில் ஒருவராக இருந்து வருகிறார் என்பது குறிப்பிடத்தக்கது. 

எஸ்.ஏ. சந்திரசேகரன் இதுவரை 68 திரைப்படங்களை இயக்கி உள்ளார். தற்போது இவர் தனது 69ஆவது படமாக "டூரிங் டாக்கீஸ்' என்ற படத்தை இயக்கி வருகிறார். 

இந்த படம் குறித்து செய்தியாளர்களிடையே எஸ்.ஏ. சந்திரசேகரன் பேசியதாவது, 

இந்த படம் எனது 69ஆவது படமாகவும், கனவுப் படமாகவும் "டூரிங் டாக்கீஸ்' திரைப்படம் உருவாகி வருகிறது. 3 சிறிய கதைத் தொடர்களை ஒருங்கிணைத்து, இந்தப் படத்தின் கதையை அமைத்துள்ளேன்.

இந்த படத்தில் ஒரு முதியவர் கதாபாத்திரத்தில் நடித்து வருகிறேன். வயதானாதால், எனக்கு ஓய்வு தேவைப்படும் என்பதற்காக, இனிமேல் திரைப்படங்களை இயக்க வேண்டாம் என்று என்னுடைய மகன் விஜய் அன்புக் கட்டளையிட்டுள்ளார். அந்த வகையில், "டூரிங் டாக்கீஸ்' எனது இறுதித் திரைப்படமாக அமையும். ஆனால், உழைப்புக்கு ஏது ஓய்வு என்பது எனது கருத்து.

மேலும், ஏ.ஆர்.முருகதாஸ் இயக்கத்தில் விஜய் நடித்து வரும் "கத்தி' திரைப்படத்தை வெளியிடுவதில் எந்த சிக்கலும் இல்லை. விளம்பரம் தேடிக் கொள்வதற்காக, சிலர் பிரச்னையாக்கி வருகின்றனர் என எஸ்.ஏ. சந்திரசேகர் தெரிவித்துள்ளார்.