ஏழாம் திருமுறை-45

7.045.திருஆமாத்தூர் 

பண் - கொல்லிக்கௌவாணம் 

திருச்சிற்றம்பலம் 

இத்தலம் நடுநாட்டிலுள்ளது. 

சுவாமிபெயர் - அழகியநாதர். 

தேவியார் - அழகியநாயகியம்மை. 

456 காண்டனன் காண்டனன் காரிகை 

யாள்தன் கருத்தனாய்

ஆண்டனன் ஆண்டனன் ஆமாத் 

தூர்எம் மடிகட்காட்

பூண்டனன் பூண்டனன் பொய்யன்று 

சொல்லுவன் கேண்மின்கள்

மீண்டனன் மீண்டனன் வேதவித் 

தல்லா தவர்கட்கே.

7.045.1

  அடியேன், திருவாமாத்தூரில் எழுந்தருளியுள்ள எம் தலைவனை, உமையம்மைக்குக் கணவனாகக் கண்டேன்; அவனுக்கு அடிமை பூண்டேன்; அடிமையைப் பலகாலும் செய்தேன்; இவை பொய்யல்ல; இன்னும் சொல்லுவேன்; கேண்மின்; வேத நெறியைப் போற்றுவோரல்லாதவர்களை நீங்கினேன். 

457 பாடுவன் பாடுவன் பார்ப்பதி

தன்னடி பற்றிநான்

தேடுவன் தேடுவன் திண்ணனப்

பற்றிச் செறிதர

ஆடுவன் ஆடுவன் ஆமாத்

தூர்எம் மடிகளைக்

கூடுவன் கூடுவன் குற்றம

தற்றென் குறிப்பொடே.

7.045.2

  யான், இவ்வுலகிற்குத் தலைவனாகிய, திருவாமாத்தூரில் எழுந்தருளியுள்ள எம் இறைவனை, அவனது திருவடியைக் கருதிப் பாடுவேன்; உறுதியாகப் பற்றி அணைத்தற்குத் தேடுவேன்; தேடிக்கண்டு, என் கருத்தின் வண்ணம் குற்றம் நீங்கிக் கூடுவேன்; கூடிய களிப்பினால் ஆடுவேன். 

458 காய்ந்தவன் காய்ந்தவன் கண்ணழ

லாலன்று காமனைப்

பாய்ந்தவன் பாய்ந்தவன் பாதத்தி

னாலன்று கூற்றத்தை

ஆய்ந்தவன் ஆய்ந்தவன் ஆமாத்

தூர்எம் மடிகளார்

ஏய்ந்தவன் ஏய்ந்தவன் எம்பி

ராட்டியைப் பாகமே.

7.045.3

  திருவாமாத்தூரில் எழுந்தருளியிருக்கின்ற எம் தலைவன், அன்று காமனைத் தனது நெற்றிக்கண்ணில் உள்ள நெருப்பால் எரித்தவன்; அன்று, கூற்றுவன்மேற் காலாற் பாய்ந்து அவனை அழித்தவன்; எல்லாவற்றையும் நன்குணர்ந்தவன்; எம்பெருமாட்டியை ஒருபாகத்தில் ஆரப்பொருந்தியவன். 

459 ஓர்ந்தனன் ஓர்ந்தனன் உள்ளத்துள்

ளேநின்ற ஒண்பொருள்

சேர்ந்தனன் சேர்ந்தனன் சென்று

திருவொற்றி யூர்புக்குச்

சார்ந்தனன் சார்ந்தனன் சங்கிலி

மென்றோள் தடமுலை

ஆர்ந்தனன் ஆர்ந்தனன் ஆமாத்

தூர்ஐயன் அருளதே.

7.045.4

  யான், என் உள்ளத்துள்ளே நிலை பெற்றுள்ள ஒளியுடைய பொருளை ஆராய்ந்தறிந்தேன்; அவ்வறிவின் வழியே சென்று அதனைத் தலைப்பட்டேன்; இனி, வெளியே, திருவொற்றியூரிற் புகுந்து, 'சங்கிலி' என்பாளது மெல்லிய தோளையும், பெரிய தனங்களையும் பொருந்தினேன்; இவ்விருவாற்றானும், இருவகை இன்பத்தையும் நிரம்ப நுகர்ந்தேன்; இது, திருவாமாத்தூரில் எழுந்தருளியிருக்கின்ற தலைவனது திருவருள். 

460 வென்றவன் வென்றவன் வேள்வியில்

விண்ணவர் தங்களைச்

சென்றவன் சென்றவன் சில்பலிக்

கென்று தெருவிடை

நின்றவன் நின்றவன் நீதி

நிறைந்தவர் தங்கள்பால்

அன்றவன் அன்றவன் செய்யருள்

ஆமாத்தூர் ஐயனே.

7.045.5

  திருவாமாத்தூரில் எழுந்தருளியிருக்கின்ற தலைவன், தக்கன் வேள்வியில் எல்லாத் தேவர்களையும் வென்றவன்; சிலவாகிய பிச்சைக்கென்று தெருவிற் சென்றவன்; நீதியிற் சிறிதும் குறையாதவரிடத்தில் நிலைபெற்று நின்றவன்; தன்னை அடைந்தார்க்கு அருள்செய்தல், அடைந்த அன்றேயாகின்றவன். 

461 காண்டவன் காண்டவன் காண்டற்

கரிய கடவுளாய்

நீண்டவன் நீண்டவன் நாரணன்

நான்முகன் நேடவே

ஆண்டவன் ஆண்டவன் ஆமாத்

தூரையும் எனையுமாட்

பூண்டவன் பூண்டவன் மார்பிற்

புரிநூல் புரளவே.

7.045.6

  திருவாமாத்தூரில் எழுந்தருளியுள்ள தலைவன், தன் அடியவர்கட்கு எளிதில் காணப்பட்டவன்; திருமாலும் பிரமனும் தேட, அவர்களால் காணுதற்கரிய கடவுளாய் நீண்டவன்; ஆமாத்தூரையும் ஆண்டவன்; என்னையும் ஆளாக வைத்து ஆண்டவன்; மார்பில் முப்புரி நூலைப் புரளப் பூண்டவன். 

462 எண்ணவன் எண்ணவன் ஏழுல

கத்துயிர் தங்கட்குக்

கண்ணவன் கண்ணவன் காண்டும்என்

பாரவர் தங்கட்குப்

பெண்ணவன் பெண்ணவன் மேனியொர்

பாகமாம் பிஞ்ஞகன்

அண்ணவன் அண்ணவன் ஆமாத்

தூர்எம் மடிகளே.

7.045.7

  திருவாமாத்தூரில் எழுந்தருளியிருக்கின்ற எம் தலைவன் ஏழுலகத்திலும் உள்ள உயிர்கட்குக் கருத்தாய் உள்ளவன்; தன்னை, 'காண்போம்' என்று அன்பால் முயல்கின்றவர்கட்குக் கண்ணாய் உள்ளவன்; திருமேனி ஒரு பாகம் பெண்ணாகியவன்; பொருந்திய தலைக்கோலத்தை உடையவன்; அடையத் தக்கவன். 

463 பொன்னவன் பொன்னவன் பொன்னைத்தந்

தென்னைப்போ கவிடா

மின்னவன் மின்னவன் வேதத்தி

னுட்பொரு ளாகிய

அன்னவன் அன்னவன் ஆமாத்தூர்

ஐயனை ஆர்வத்தால்

என்னவன் என்னவன் என்மனத்

தின்புற் றிருப்பனே.

7.045.8

  திருவாமாத்தூரில் எழுந்தருளியுள்ள தலைவன், அடியார்களுக்குப் பொன்போல்பவனாய் உள்ளவன்; பொன்னைக் கொடுத்து என்னைத் தன்னினின்றும் நீங்கவொட்டாது பிணித்துக் கொண்ட ஒளிவடிவினன்; வேதத்தின் உட்பொருளாய் உள்ள அத் தன்மையை உடையவன்; எனக்கு உரிமையுடையவன்; அவனை, யான் என்மனத்தில் அன்பால் நினைந்து இன்பமுற்றிருப்பேன்; 

464 தேடுவன் தேடுவன் செம்மலர்ப்

பாதங்கள் நாள்தொறும்

நாடுவன் நாடுவன் நாபிக்கு

மேலேயொர் நால்விரல்

மாடுவன் மாடுவன் வன்கை

பிடித்து மகிழ்ந்துளே

ஆடுவன் ஆடுவன் ஆமாத்

தூஎம் மடிகளே.

7.045.9

  யான், திருவாமாத்தூரில் எழுந்தருளியுள்ள எம் தலைவனது திருவடிகளை நாள்தோறும் தேடுவேன்; அவனை, உந்திக்குமேல் நால்விரல் அளவில் உள்ள இருதயத்தில் நினைப்பேன்; வெளியில் சென்றால் வலிய கையால் பிடித்து மகிழ்ந்து உள்ளே சேர்ப்பேன்; அவனுக்கு ஏற்புடையன ஆகும்படி கூத்துக்களை ஆடுவேன். 

465 உற்றனன் உற்றவர் தம்மை

ஒழிந்துள்ளத் துள்பொருள்

பற்றினன் பற்றினன் பங்கயச்

சேவடிக் கேசெல்ல

அற்றனன் அற்றனன் ஆமாத்தூர்மேயான்

அடி யார்கட்காள்

பெற்றனன் பெற்றனன் பெயர்த்தும்

பெயர்த்தும்பிற வாமைக்கே.

7.045.10

  யான், மீட்டும் மீட்டும் பிறவாமைப் பொருட்டு, உற்றாரை நீங்கி, உள்ளத்தில் உள்ள பொருளை அடைந்தேன்; திருவாமாத்தூரில் எழுந்தருளியிருக்கின்ற இறைவனது, தாமரை மலர் போலும் செவ்விய திருவடியிடத்தே செல்ல அவற்றைத் துணையாகப் பற்றினேன்; அதனால் துன்பங்கள் நீங்கப்பெற்றேன்; அதன்பின். அவன் அடியவர்க்கு அடியனாகும் பேற்றையும் பெற்றேன். 

466 ஐயனை அத்தனை ஆளுடை

ஆமாத்தூர் அண்ணலை

மெய்யனை மெய்யர்க்கு மெய்ப்பொரு

ளான விமலனை

மையனை மையணி கண்டனை

வன்றொண்ட னூரன்சொல்

பொய்யொன்று மின்றிப் புலம்புவார்

பொற்கழல் சோவரே.

7.045.11

  யாவர்க்கும் தலைவனும், தந்தையும், என்றும் உள்ளவனும், மெய்ம்மையான உள்ளம் உடையவர்க்கு அநுபவப் பொருளாய் விளங்குகின்ற தூயவனும், திருவருள் மேகமானவனும், மைபோலும் அழகிய கண்டத்தை உடையவனும் ஆகிய திருவாமாத்தூரை ஆளுதலுடைய இறைவனை, வன்றொண்டனாகிய நம்பியாரூரன் பாடிய பாடல்களை, வஞ்சனை சிறிதும் இன்றிப் பாடுகின்றவர், அப்பெருமானது பொன்போலும் திருவடிகளை அடைவர். 

திருச்சிற்றம்பலம்