ஏழாம் திருமுறை-62

7.062.திருக்கோலக்கா 

பண் - தக்கேசி 

திருச்சிற்றம்பலம் 

இத்தலம் சோழநாட்டிலுள்ளது. 

சுவாமிபெயர் - சத்தபுரீசுவரர். 

தேவியார் - ஓசைகொடுத்தநாயகியம்மை. 

635 புற்றில் வாளர வார்த்தபி ரானைப்

பூத நாதனைப் பாதமே தொழுவார்

பற்று வான்துணை எனக்கௌ வந்த

பாவ நாசனை மேவரி யானை

முற்ற லார்திரி புரம்ஒரு மூன்றும்

பொன்ற வென்றிமால் வரைஅரி அம்பாக்

கொற்ற வில்அங்கை ஏந்திய கோனைக்

கோலக் காவினிற் கண்டுகொண் டேனே.

7.062.1

  புற்றில் வாழும் கொடிய பாம்பைக் கட்டியுள்ள பெருமானும், பூத கணங்கட்கு முதல்வனும், தன் திருவடியையே வணங்குவோர் விடாது பற்றுகின்ற சிறந்த துணைவனும், எனக்கு எளியவனாய் எதிர் வந்தவனும், அடியவரது பாவங்களைப் போக்கும் தொழிலை உடையவனும், யாவராலும் அடைதற்கு அரியவனும், செருக்கு மிக்கவர்களது மூன்று ஊர்கள் அழியுமாறு, திருமால் அம்பாகி நிற்க, வெற்றியைத் தரும் பெரிய மலையாகிய வில்லை அங்கையில் ஏந்திய தலைவனும் ஆகிய இறைவனை, அடியேன், திருக்கோலக்காவில் வெளிப்படக் கண்டுகொண்டேன். 

636 அங்கம் ஆறும்மா மறைஒரு நான்கும்

ஆய நம்பனை வேய்புரை தோளி

தங்கு மாதிரு வுருவுடை யானைத்

தழல்ம திசடை மேற்புனைந் தானை

வெங்கண் ஆனையின் ஈருரி யானை

விண்ணு ளாரொடு மண்ணுளார் பரசுங்

கொங்கு லாம்பொழிற் குரவெறி கமழுங்

கோலக் காவினிற் கண்டுகொண் டேனே. 7.062.2

  துணை நூல்களாகிய ஆறும், முதல் நூல்களாகிய வேதம் நான்கும் ஆகி நிற்கின்ற நம்பனும், மூங்கில் போலும் தோள்களையுடைய உமாதேவி பொருந்தியுள்ள, சிறந்த திருமேனியையுடையவனும், ஒளிர்கின்ற பிறையைச் சடையின் மேற் சூடியவனும், சினத்தால் எரிகின்ற கண்களையுடைய யானையினது உரித்த தோலையுடையவனும் ஆகிய இறைவனை, அடியேன், விண்ணில் உள்ளவர்களும், மண்ணில் உள்ளவர்களும் துதிக்கின்ற, தேன் பொருந்திய சோலையின்கண் குரா மலர்கள் மணங்கமழ்கின்ற திருக்கோலக்காவினில் வெளிப்படக் கண்டுகொண்டேன். 

637 637பாட்ட கத்திசை யாகிநின் றானைப்

பத்தர் சித்தம் பரிவினி யானை

நாட்டகத் தேவர் செய்கையு ளானை

நட்டம் ஆடியை நம்பெரு மானைக்

காட்ட கத்துறு புலியுரி யானைக்

கண்ணொர் மூன்றுடை அண்ணலை அடியேன்

கோட்ட கப்புன லார்செழுங் கழனிக்

கோலக் காவினிற் கண்டுகொண் டேனே.

7.062.3

  பாட்டின்கண் இசைபோன்று எல்லாப் பொருளிலும் வேறறக் கலந்து நிற்பவனும், அடியார்களது உள்ளம் அன்பு செய்தற்கு இன்பமாகிய பயனாய் உள்ளவனும், மண்ணில் வாழும் தேவராகிய அந்தணர்களது வழிபாட்டின் கண் விளங்குகின்றவனும், நடனம் ஆடுபவனும், நமக்குத் தலைவனும், காட்டின்கண் வாழ்கின்ற புலியினது தோலை உடையவனும், கண்கள் மூன்று உடைய பெருமையுடையவனும் ஆகிய இறைவனை, அடியேன், வரம்பகத்து நீர் நிறைந்த செழுமையான வயல்களையுடைய திருக்கோலக்காவில் வெளிப்படக் கண்டுகொண்டேன். 

638 ஆத்த மென்றெனை ஆள்உகந் தானை

அமரர் நாதனைக் குமரனைப் பயந்த

வார்த்த யங்கிய முலைமட மானை

வைத்து வான்மிசைக் கங்கையைக் கரந்த

தீர்த்த னைச்சிவ னைச்செழுந் தேனைத்

தில்லை அம்பலத் துள்நிறைந் தாடுங்

கூத்த னைக்குரு மாமணி தன்னைக்

கோலக் காவினிற் கண்டுகொண் டேனே.

7.062.4

  என்னை ஆளாகக் கொள்ளுதலே தனக்குவாய்மை யாவது என்று கருதி என்னை அவ்வாறே விரும்பி ஆண்டருளினவனும், தேவர்கட்குத் தலைவனும், முருகனைப் பெற்ற கச்சின்கண் விளங்குகின்ற தனங்களையுடைய இளைய மான்போலும் தேவியை இடப்பாகத்தில் வைத்து, வானுலகத்தில் உள்ள கங்கையைச் சடையின் கண் மறைத்த தூயவனும், மங்கலம் உடையவனும், செழுமையான தேன்போல இனிப்பவனும், தில்லையம்பலத்துள் நிறைந்து நின்று ஆடுகின்ற கூத்தினை யுடையவனும், ஒளியையுடைய மாணிக்கம் போல்பவனும் ஆகிய இறைவனை, அடியேன், திருக்கோலக்காவில் வெளிப்படக் கண்டுகொண்டேன். 

639 அன்று வந்தெனை அகலிடத் தவர்முன்

ஆள தாகஎன் றாவணங் காட்டி

நின்று வெண்ணெய்நல் லூர்மிசை ஒளித்த

நித்தி லத்திரள் தொத்தினை முத்திக்

கொன்றி னான்றனை உம்பர்பி ரானை

உயரும் வல்லர ணங்கெடச் சீறுங்

குன்ற வில்லியை மெல்லிய லுடனே

கோலக் காவினிற் கண்டுகொண் டேனே.

7.062.5

  அன்று அந்தணனாய்த் திருநாவலூரில் வந்து, அகன்ற இப்பூமியில் உள்ளார் பலர் முன்பும், நீ எனக்குச் செய்யும் அடிமையைச் செய்க' என்று சொல்லி ஓலை காட்டி வழக்குப்பேசி நின்று, பின்பு, திருவெண்ணெய்நல்லூரில் சென்று மறைந்த, முத்தினது திரட்சியமைந்த கொத்துப் போல்பவனும், முத்தியளித்தற்குப் பொருந்தியவனும், தேவர்கட்குத் தலைவனும், உயர்ந்த வலிய மதில்கள் அழியுமாறு சினந்த, மலைவில்லை உடையவனும் ஆகிய இறைவனை, இறைவியுடனே, அடியேன் திருக்கோலக்காவில் வெளிப்படக் கண்டு கொண்டேன். 

640 காற்றுத் தீப்புன லாகிநின் றானைக்

கடவு ளைக்கொடு மால்விடை யானை

நீற்றுத் தீயுரு வாய்நிமிர்ந் தானை

நிரம்பு பல்கலை யின்பொரு ளாலே

போற்றித் தன்கழல் தொழுமவன் உயிரைப்

போக்கு வான்உயிர் நீக்கிடத் தாளாற்

கூற்றைத் தீங்குசெய் குரைகழ லானைக்

கோலக் காவினிற் கண்டுகொண் டேனே.

7.062.6

  காற்றும், தீயும், நீரும் ஆகி நிற்பவனும், எல்லாப் பொருள்களையும் கடந்தவனும், கொடிய பெரிய இடப ஊர்தியை யுடையவனும், நீற்றைத் தரும் நெருப்புருவாய் ஓங்கி நிற்பவனும், நிறைந்த பல நூல்களினது பொருள் வழியே துதித்துத் தன் திருவடியை வணங்குகின்ற அவனது உயிரைப் போக்குவோனது உயிர் நீங்கும்படி தனது திருவடியால் கூற்றுவனுக்கு அழிவைச் செய்த, ஒலிக்கின்ற கழலை யணிந்தவனும் ஆகிய இறைவனை, அடியேன் திருக்கோலக்காவில் வெளிப்படக் கண்டுகொண்டேன். 

641 அன்ற யன்சிரம் அரிந்ததிற் பலிகொண்

டமர ருக்கருள் வெளிப்படுத் தானைத்

துன்று பைங்கழ லிற்சிலம் பார்த்த

சோதி யைச்சுடர் போல்ஒளி யானை

மின்ற யங்கிய இடைமட மங்கை

மேவும் ஈசனை வாசமா முடிமேற்

கொன்றை அஞ்சடைக் குழகனை அழகார்

கோலக் காவினிற் கண்டுகொண் டேனே.

7.062.7

  அன்று பிரமனது தலையை அரிந்து அதன்கண் பிச்சை ஏற்றுத் தேவர்கட்குத் தனது திருவருள் நிலையை வெளிப்படுத்தியவனும், நெருங்கிய பசிய கழலையணிதற்கு உரிய திருவடியில் சிலம்பையணிந்த ஒளிவவடிவினனும், விளக்குப்போலும் விளக்கம் உடையவனும், மின்னலினது தன்மை விளங்கிய இடையினையுடைய இளமங்கை விரும்பும் கடவுளும், மணங்கமழுமாறு தலையின் மேல் கொன்றை மாலையையணிந்த, அழகிய சடையை உடைய அழகனும் ஆகிய இறைவனை, அடியேன், அழகு நிறைந்த திருக்கோலக்காவில் வெளிப்படக் கண்டுகொண்டேன். 

642 நாளும் இன்னிசை யால்தமிழ் பரப்பும்

ஞான சம்பந்த னுக்குல கவர்முன்

தாளம் ஈந்தவன் பாடலுக் கிரங்கும்

தன்மை யாளனை என்மனக் கருத்தை

ஆளும் பூதங்கள் பாடநின் றாடும்

அங்க ணன்றனை எண்கணம் இறைஞ்சும்

கோளி லிப்பெருங் கோயிலு ளானைக்

கோலக் காவினிற் கண்டுகொண் டேனே.

7.062.8

  எந்நாளும் இனிய இசையால் தமிழ்ப்பாடலை எங்கணும் பரவச்செய்த திருஞானசம்பந்தமூர்த்தி சுவாமிகளுக்கு, அவர் தம் கைகளால் ஒற்றறுத்துப் பாடுதலுக்கு இரங்கி, பலரு காணத் தாளம் ஈந்த கருணையாளனும், என் உள்ளத்துள் கொள்ளப்படும் பொருளாய் உள்ளவனும், தன்னால் ஆளப்படும் பூதங்கள் பாடல்களைப்பாட, அவற்றிற்கு ஏற்ப நின்று ஆடுகின்ற அருள் பொருந்திய கண்களையுடையவனும், பதினெண் கணங்களாலும் வணங்கப்படுபவனும், திருக்கோளிலியில் உள்ள பெருங்கோயிலில் எழுந்தருளியிருப்பவனும் ஆகிய இறைவனை அடியேன், திருக்கோலக்காவில் வெளிப்படக் கண்டுகொண்டேன். 

643 அரக்கன் ஆற்றலை அழித்தவன் பாட்டுக்

கன்றி ரங்கிய வென்றியி னானைப்

பரக்கும் பாரளித் துண்டுகந் தவர்கள்

பரவி யும்பணி தற்கரி யானைச்

சிரக்கண் வாய்செவி மூக்குயர் காயம்

ஆகித் தீவினை தீர்த்தஎம் மானைக்

குரக்கி னங்குதி கொண்டுகள் வயல்சூழ்

கோலக் காவினிற் கண்டுகொண் டேனே.

7.062.9

  அன்று இராவணனது வலிமையை முதலில் அழித்து, பின்பு அவன் பாடிய இசைக்கு இரங்கி அருள்புரிந்த வெற்றியை யுடையவனும், விரிந்த உலகத்தைப் படைத்தும், உண்டும் களித்தவர்கள் துதித்துப் பணிதற்கும் அரியனாய் உள்ளவனும், தலையில் அமைந்து, 'கண், வாய், காது, மூக்கு' என்பவற்றோடு, நீண்ட உடம்புமாய் நின்று, தீமையைத் தரும் வினையை ஒழித்த எம் பெருமானும் ஆகிய இறைவனை, அடியேன்,சோலைகளில் குரங்குக்கூட்டம் குதித்துத் திரிகின்ற, வயல் சூழ்ந்த, திருக்கோலக்காவில் வெளிப்படக் கண்டுகொண்டேன். 

644 கோட ரம்பயில் சடையுடைக் கரும்பைக்

கோலக் காவுள்எம் மானைமெய்ம் மானப்

பாட ரங்குடி அடியவர் விரும்பப்

பயிலும் நாவலா ரூரன்வன் றொண்டன்

நாடி ரங்கிமுன் அறியுமந் நெறியால்

நவின்ற பத்திவை விளம்பிய மாந்தர்

காட ரங்கென நடம்நவின் றான்பாற்

கதியும் எய்துவர் பதியவர்க் கதுவே.

7.062.10

  ஆலம் விழுது போலும் சடைகளை யுடையவனும், கரும்பு போல இனிப்பவனும் ஆகிய, திருக்கோலக்கா வில் எழுந்தருளியுள்ள எம் இறைவனை, உண்மையமைந்த பெரிய பாடல்களைப் பாடும் வழிவழி அடியவர் பலரும் விரும்புமாறு, அத்திருத் தொண்டிலே பழகும், திருநாவலூரில் தோன்றிய, வன்றொண்டனாகிய நம்பியாரூரன், உலகில் உள்ளவர்தாமும் மனம் உருகி அவனை முற்பட உணருமாற்றால் பாடிய பத்துப் பாடல்களாகிய இவைகளைப் பாடிய மாந்தர், காடே அரங்கமாக நடனம் செய்பவனாகிய சிவ பிரானிடத்து உயர்கதியையும் பெறுவர்; என்றும் நீடு வாழும் இடமும் அவர்க்கு அக்கதியேயாம். 

திருச்சிற்றம்பலம்