ஏழாம் திருமுறை-94

7.094.திருச்சோற்றுத்துறை 

பண் - கௌசிகம் 

திருச்சிற்றம்பலம் 

இத்தலம் சோழநாட்டிலுள்ளது. 

சுவாமிபெயர் - தொலையாச்செல்வர். 

தேவியார் - ஒப்பிலாம்பிகை. 

954 அழல்நீர் ஒழுகி யனைய சடையும்

உழையீர் உரியும் முடையான் இடமாம்

கழைநீர் முத்துங் கனகக் குவையும்

சுழல்நீர்ப் பொன்னிச் சோற்றுத் துறையே. 7.094.1

  மூங்கில்களிடத்து உளவாகிய சிறந்த முத்துக்களும், பொற்குவியல்களும் சுழிகளில் சுழல்கின்ற நீரையுடைய காவிரி யாற்றையுடைய, 'திருச்சோற்றுத்துறை' என்னும் தலமே, நெருப்பு நீர்த் தன்மையுடையதாய் ஒழுகினாற்போலும் சடையையும், மானையும், யானை, புலி இவைகளை உரித்த தோலையும் உடையவனாகிய இறைவனது இடமாகும். 

955 பண்டை வினைகள் பறிய நின்ற

அண்ட முதல்வன் அமலன் னிடமாம்

இண்டை கொண்டன் பிடைஅ றாத

தோண்டர் பரவுஞ் சோற்றுத் துறையே. 7.094.2

  அன்பு, இடையில் அற்றுப்போதல் இல்லாத அடியார்கள், இண்டை மாலை முதலியவைகளைக் கொண்டுவழி படுகின்ற, 'திருச்சோற்றுத்துறை' என்னும் தலமே, உயிர்கள் செய்த பழைய, வலிமையான வினைகள் நீங்குமாறு நிற்கின்ற, உலகிற்கு முதல்வனும், தூயவனும் ஆகிய இறைவனது இடமாகும். 

956 கோல அரவுங் கொக்கின் இறகும்

மாலை மதியும் வைத்தான் இடமாம்

ஆலும் மயிலும் ஆடல் அளியும்

சோலை தருநீர்ச் சோற்றுத் துறையே. 7.094.3

  சோலைகள், ஆடுகின்ற மயில்களையும், சுழலுதல் உடைய வண்டுகளையும் கொண்டு காட்டுகின்ற மிக்க நீரையுடைய, 'திருச்சோற்றுத்துறை' என்னும் தலமே, அழகிய பாம்பையும், கொக்கின் இறகையும், மாலைக் காலத்தில் தோன்றுகின்ற பிறையையும் முடியில் வைத்துள்ளவனாகிய இறைவனது இடமாகும். 

957 பளிக்குத் தாரை பவள வெற்பில்

குளிக்கும் போல்நூற் கோமாற் கிடமாம்

அளிக்கும் ஆர்த்தி அல்லால் மதுவம்

துளிக்கும் சோலைச் சோற்றுத் துறையே. 7.094.4

  தேனை வண்டுகள் நிரம்ப உண்ணச்செய்து, மேலும் நிலத்திற் சிந்துகின்ற சோலைகளையுடைய, 'திருச்சோற்றுத்துறை' என்னும் தலமே, பவளமலையின்மேல் பதிந்து ஓடுகின்ற பளிங்கு அருவிபோலும் முப்புரி நூலை அணிந்த தலைவனாகிய இறைவனுக்கு இடமாகும். 

958 உதையுங் கூற்றுக் கொல்கா விதிக்கு

வதையுஞ் செய்த மைந்தன் இடமாம்

திதையுந் தாதுந் தேனுஞ் ஞிமிறும்

துதையும் பொன்னிச் சோற்றுத் துறையே. 7.094.5

  நிலைபெற்ற மகரந்தமும், தேனும், வண்டும் சோலைகளில் நெருங்கியிருக்கின்ற, காவிரி யாற்றையுடைய, 'திருச்சோற்றுத்துறை' என்னுந் தலமே, கூற்றுவனுக்கு உதையையும், ஒன்றற்கும் தோலாத ஊழிற்கு அழிவையும் ஈந்த வலிமை உடையவனாகிய இறைவனுக்கு இடமாகும். 

959 ஓதக் கடல்நஞ் சினைஉண் டிட்ட

பேதைப் பெருமான் பேணும் பதியாம்

சீதப் புனல்உண் டெரியைக் காலும்

சூதப் பொழில்சூழ் சோற்றுத் துறையே. 7.094.6

  குளிந்த நீரை உண்டு, தீயை உமிழ்கின்ற மாஞ் சோலைகள் சூழ்ந்த, 'திருச்சோற்றுத்துறை' என்னும் தலமே, மிக்க நீரையுடைய கடலில் உண்டாகிய நஞ்சினை உண்ட, அருள்மிகுந்த பெருமான் விரும்பும் ஊராகும். 

960 இறந்தார் என்பும் எருக்குஞ் சூடிப்

புறங்காட் டாடும் புனிதன் கோயில்

சிறந்தார் சுற்றந் திருவென் றின்ன

துறந்தார் சேருஞ் சோற்றுத் துறையே. 7.094.7

  உயிர்போலச் சிறந்த மனைவி மக்களும், ஏனைய சுற்றத்தாரும், செல்வமும் என்று சொல்லப்பட்ட இன்னோரன்ன வற்றைத் துறந்த ஞானியர் சேர்கின்ற, 'திருச்சோற்றுத்துறை' என்னும் தலமே, இறந்தவரது எலும்புகளையும்' எருக்கம் பூவையும் அணிந்து கொண்டு, புறங்காட்டில் ஆடுகின்ற தூயவனாகிய இறைவனது இடம். 

961 காமன் பொடியாக் கண்ஒன் றிமைத்த

ஓமக் கடலார் உகந்த இடமாம்

தேமென் குழலார் சேக்கை புகைத்த

தூமம் விசும்பார் சோற்றுத் துறையே. 7.094.8

  தேன் பொருந்திய, மெல்லிய கூந்தலையுடைய மகளிர், தம் இருக்கையில் இட்ட நறும்புகைகள், வானத்தில் சென்று நிறைகின்ற, 'திருச்சோற்றுத்துறை' என்னும் தலமே மன்மதன் சாம்பராகுமாறு கண் ஒன்றைத் திறந்த, வேள்வியாகிய கடலையுடைய வராகிய இறைவர் விரும்பும் இடமாகும். 

962 இலையால் அன்பால் ஏத்தும் அவர்க்கு

நிலையா வாழ்வை நீத்தார் இடமாம் 

தலையால் தாழுந் தவத்தோர்க் கென்றும்

தொலையாச் செல்வச் சோற்றுத் துறையே. 7.094.9

  தன்னைத் தலையால் வணங்குகின்ற தவத்தினை உடையோர்க்கு, எஞ்ஞான்றும் அழியாத செல்வத்தைத் தரும், 'திருச்சோற்றுத்துறை' என்னுந் தலமே, இலையாலாயினும் அன்போடு துதிக்கின்ற அவர்கட்கு, நிலையாத இவ்வுலக வாழ்வை நீக்குபவராகிய இறைவனது இடமாகும். 

963 சுற்றார் தருநீர்ச் சோற்றுத் துறையுள்

முற்றா மதிசேர் முதல்வன் பாதத்

தற்றார் அடியார் அடிநாய் ஊரன்

சொற்றான் இவைகற் றார்துன் பிலரே. 7.094.10

  பற்றற்றவராகிய அடியார்களது அடிக்கு நாய் போலும் நம்பியாரூரன், சுற்றிலும் நிறைந்த நீரையுடைய திருச்சோற்றுத்துறையில் எழுந்தருளியிருக்கின்ற, இளமையான சந்திரனைச் சூடிய முதல்வனது திருவடிக்கண் இப்பாடல்களைப் பாடினான்; இவைகளைக் கற்றவராவார், யாதொரு துன்பமும் இல்லாதவராவர். 

திருச்சிற்றம்பலம்