ஏழாம் திருமுறை-97

7.097.திருநனிபள்ளி 

பண் - பஞ்சமம் 

திருச்சிற்றம்பலம் 

இத்தலம் சோழநாட்டிலுள்ளது. 

சுவாமிபெயர் - நற்றுணையப்பர். 

தேவியார் - பர்வதராசபுத்திரி. 

985 ஆதியன் ஆதிரையன் அயன் 

மாலறி தற்கரிய

சோதியன் சொற்பொருளாய்ச் சுருங் 

காமறை நான்கினையும்

ஓதியன் உம்பர்தங்கோன் உல 

கத்தினுள் எவ்வுயிர்க்கும்

நாதியன் நம்பெருமான் நண்ணும் 

ஊர்நனி பள்ளியதே.

7.097.1

  எப்பொருட்கும் முதலானவனும், ஆதீரை நாண்மீனைத் தனக்கு உரியதாகக் கொண்டவனும், பிரமனும் திருமாலும் அறிதற்கரிய ஒளிவடிவானவனும், சொல்லும் சொற்பொருளுமாய் நின்று, சுருங்குதல் இல்லாத வேதங்கள் நான்கினையும் ஓதியவனும், தேவர்களுக்குத் தலைவனும், உலகில் உள்ள எல்லா உயிர்கட்கும் தந்தையும் ஆகிய இறைவன் பொருந்தியிருக்கின்ற ஊர், திருநனிபள்ளியே. 

986 உறவிலி ஊனமிலி உண 

ரார்புரம் மூன்றெரியச்

செறுவிலி தன்னினைவார் வினை 

யாயின தேய்ந்தழிய

அறவில கும்மருளான் மரு 

ளார்பொழில் வண்டறையும்

நறவிரி கொன்றையினான் நண்ணும் 

ஊர்நனி பள்ளியதே.

7.097.2

  உறவுத் தொடக்கு இல்லாதவனும், குறைவில்லாதவனும், தன்னை மதியாதவரது மூன்று ஊர்களும் எரிந்தொழியும்படி அழித்த வில்லை உடையவனும், தன்னை நினைபவரது வினையெல்லாம் வலிமை குன்றி அழியும்படி, மிகவும் விளங்குகின்ற திருவருளை உடையவனும், தேனோடு மலர்கின்ற கொன்றை மலர் மாலையை அணிந்தவனும் ஆகிய இறைவன் பொருந்தியிருக்கின்ற ஊர், மயக்கத்தைத் தருகின்ற சோலைகளில் வண்டுகள் ஒலிக்கின்ற திருநனிபள்ளியே. 

987 வானுடை யான்பெரியான மனத 

தாலும் நினைப்பரியான்

ஆனிடை ஐந்தமர்ந்தான் அணு 

வாகியொர் தீயுருக்கொண்

டூனுடை இவ்வுடலம் ஒடுங் 

கிப்புகுந் தான்பரந்தான்

நானுடை மாடெம்பிரான் நண்ணும் 

ஊர்நனி பள்ளியதே.

7.097.3

  விண்ணுலகத்தைத் தனதாக உடையவனும், யாவரினும் பெரியோனும், மனத்தாலும் நினைத்தற்கரியவனும், பசுவினிடத்துத் தோன்றுகின்ற ஐந்து பொருள்களை விரும்புபவனும், நுண்ணிய பொருளாகி, சுடர் வடிவத்தைக்கொண்டு, ஊனையுடையதாகிய இவ்வுடம்பினுள் அடங்கிப் புகுந்தவனும், உலகம் எல்லாம் தன்னுள் அடங்க விரிந்தவனும், நான் உடைய செல்வமாய் இருப்பவனும் ஆகிய எம்பெருமான் பொருந்தியிருக்கின்ற ஊர் திருநனிபள்ளியே. 

988 ஓடுடை யன்கலனா உடை 

கோவண வன்னுமையோர்

பாடுடை யன்பலிதேர்ந் துணும் 

பண்புடை யன்பயிலக்

காடுடை யன்னிடமா மலை 

ஏழுங் கருங்கடல்சூழ்

நாடுடை நம்பெருமான் நண்ணும் 

ஊர்நனி பள்ளியதே.

7.097.4

  ஓட்டினை உண்கலமாகவும், கோவணத்தை உடையாகவும், உடையவனும், ஒரு பக்கத்தில் உமையை உடையவனும், பிச்சை எடுத்து உண்ணும் தன்மையை உடையவனும், வாழ்வதற்குரிய இடமாகக் காட்டை உடையவனும், ஏழு மலைகளையும், கரிய கடல் சூழ்ந்த ஏழு நாடுகளையும் உடையவனும் ஆகிய நம்பெருமான் பொருந்தியிருக்கின்ற ஊர், திருநனிபள்ளியே. 

989 பண்ணற் கரியதொரு படை 

ஆழி தனைப் படைத்துக்

கண்ணற் கருள்புரிந்தான் 

கரு தாதவர் வேள்விஅவி

உண்ணற் கிமையவரை 

உருண் டோட உதைத்துகந்து

நண்ணற் கரியபிரான் நண்ணும் 

ஊர்நனி பள்ளியதே.

7.097.5

  ஆக்குதற்கு அரிதாகிய சக்கரப்படை ஒன்றை ஆக்கி, அதனைத் திருமாலுக்கு அளித்தவனும், தன்னை மதியாதவனாகிய தக்கனது வேள்வியில் அவிசை உண்ணச் சென்ற தேவர் அனைவரையும் சிதறி ஓடும்படி தாக்கிப்பின் அவர்கட்கு அருள் செய்து, ஒருவராலும் அணுகுதற்கரிய தலைவனாகியவனும் ஆகிய இறைவன் பொருந்தியிருக்கும் ஊர், திருநனிபள்ளியே. 

990 மல்கிய செஞ்சடைமேல் மதி 

யும்மர வும்முடனே

புல்கிய ஆரணன்எம் புனி 

தன்புரி நூல்விகிர்தன்

மெல்கிய விற்றொழிலான் விருப் 

பன்பெரும் பார்த்தனுக்கு

நல்கிய நம்பெருமான் நண்ணும் 

ஊர்நனி பள்ளியதே.

7.097.6

  நிறைந்த, சிவந்த சடையின்மேல், சந்திரனும் பாம்பும் ஒருங்கியைந்து பொருந்திய திருமேனியனாகிய வேத முதல்வனும், எங்கள் தூயோனும், முப்புரி நூலையணிந்த, வேறுபட்ட தன்மையை உடையவனும், தன்மேல் அன்புடையவனாகிய மிக்க தவத்தையுடைய அருச்சுனனுக்கு, மெல்லிய வில்தொழிலினால் அருள்பண்ணினவனும் ஆகிய இறைவன் பொருந்தியிருக்கும் ஊர், திருநனிபள்ளியே. 

991 அங்கமொ ராறவையும் அரு 

மாமறை வேள்விகளும்

எங்கும் இருந்தந்தணர் எரி 

மூன்றவை யோம்புமிடம்

பங்கய மாமுகத்தாள் உடை 

பங்கன் உறைகோயில்

செங்கயல் பாயும்வயல் திரு 

வூர்நனி பள்ளியதே.

7.097.7

  தாமரை மலர்போலும் முகத்தையுடைய உமா தேவியைப் பாகத்தில் உடையவனாகிய இறைவன் எழுந்தருளியிருக்கின்ற இடம், அந்தணர்கள் மூன்று எரிகளோடே, ஆறு அங்கங்களையும், அரிய வேதங்களையும், வேள்விகளையும் எவ்விடத்தும் இருந்து வளர்க்கின்ற இடமாகிய, செவ்விய கயல்மீன்கள் துள்ளுகின்ற வயல்களையுடைய அழகிய ஊரான திருநனிபள்ளியே. 

992 திங்கட் குறுந்தெரியல் திகழ் 

கண்ணியன் நுண்ணியனாய்

நங்கட் பிணிகளைவான் அரு 

மாமருந் தேழ்பிறப்பும்

மங்கத் திருவிரலால் அடர்த் 

தான்வல் அரக்கனையும்

நங்கட் கருளும்பிரான் நண்ணும் 

ஊர்நனி பள்ளியதே.

7.097.8

  சிறிய பிறையாகிய, விளக்கம் அமைந்த கண்ணிமாலையைச் சூடியவனும், நுண்ணியனாய் நின்று, எழுவகைப் பிறப்புக்களும் கெடும்படி, நம்மிடத்து உள்ள வினையாகிய நோயை நீக்குகின்ற, உயர்ந்த அரிய பெரிய மருந்தாய் உள்ளவனும், வலிய அரக்கனாகிய இராவணனையும், அழகிய ஒரு விரலால் நெரித்தவனும் ஆகிய, நமக்கு அருள்செய்யும் பெருமான் பொருந்தியிருக்கின்ற ஊர், திருநனிபள்ளியே. 

993 ஏன மருப்பினொடும் எழில் 

ஆமையும் பூண்டுகந்து

வான மதிள்அரணம் மலை 

யேசிலை யாவளைத்தான்

ஊனமில் காழிதன்னுள் ளுயர் 

ஞானசம் பந்தர்க்கன்று

ஞானம் அருள்புரிந்தான் நண்ணும் 

ஊர்நனி பள்ளியதே.

7.097.9

  பன்றியின் கொம்பையும், அழகிய ஆமையோட்டையும் விரும்பியணிந்து, வானத்திற்செல்லும் மதிலாகிய அரணின்முன், மலையையே வில்லாக வளைத்து நின்றவனும், குறையில்லாத சீகாழிப்பதியுள் உயர்ந்தோராகிய ஞானசம்பந்தர்க்கு ஞானத்தை அருள்செய்தவனும் ஆகிய இறைவன் பொருந்தியிருக்கும் ஊர், திருநனிபள்ளியே. 

994 காலமும் நாள்கழியுந் நனி 

பள்ளி மனத்தின்உள்கிக்

கோலம தாயவனைக் குளிர் 

நாவல ஊரன்சொன்ன

மாலை மதித்துரைப்பார் மண் 

மறந்துவா னோர்உலகில்

சாலநல் லின்பமெய்தித் தவ 

லோகத் திருப்பவரே.

7.097.10

  காலமும் நாள்தோறும் கழியாநிற்கும், அதனால், குளிர்ந்த திருநாவலூரனாகிய நம்பியாரூரன், கருணையால் திருவுருக்கொண்ட இறைவனைத் திருநனிபள்ளியுள் வைத்து மனத்தில் நினைத்துப் பாடிய இப்பாமாலையின் பெருமையை உணர்ந்து பாடுவோர், தேவருலகில் மிக்க இன்பத்தைத் துய்த்து, பின்பு மண்ணுலகத்தில் வருதலை மறந்து, சிவலோகத்தில் இருப்பவரே யாவர். 

திருச்சிற்றம்பலம்