இனி தமிழிலும் பொறியியல் பாடங்கள்
பொறியியல் பாடங்களை இனி தமிழ் மொழியிலும் கற்கலாம் என்ற இனிப்பான செய்தி வெளியாகியுள்ளது. இதுவரை ஆங்கில மொழியிலேயே பொறியியல் பாடங்கள் நடைபெற்று வந்தன. அகில இந்திய தொழில்நுட்ப கவுன்சில் (AICTE - All India Council for Technical Education) தற்போது தமிழ் உள்ளிட்ட ஏழு மொழிகளில் பொறியியல் பாடங்களைப் படிக்கலாம் என்று அறிவித்துள்ளது . அதன்படி தமிழ் இந்தி, தெலுங்கு, மலையாளம், குஜராத்தி, மராத்தி, கன்னடம் ஆகிய மொழிகளில் மாணவர்கள் பொறியியல் பாடங்களை இனி கற்கலாம்.
ஏஐசிடிஇ தலைவர் அனில் சாஸ்டிரபுத்தே அவர்கள் இதுகுறித்து, தொழில்நுட்பக் கல்வியை மாணவர்களுக்கு அவர்களின் தாய்மொழியில் கற்பிப்பதே நோக்கம். இதன் மூலம் அவர்கள் அந்த படிப்பின் அடிப்படையை எளிதாக புரிந்து கொள்ள முடியும். இது தொடர்பாக நாடு முழுவதும் 500 விண்ணப்பங்கள் வந்துள்ளன . இளநிலை பட்டப்படிப்பை மேலும் 11 மொழிகளில் நடத்துவதற்கு திட்டமிடப்பட்டுள்ளது என்று கூறியுள்ளார்.
அகில இந்திய தொழில்நுட்ப கவுன்சிலின் இந்த அறிவிப்பு பள்ளிக்கல்வியை தங்கள் தாய்மொழி வழியிலேயே படித்து வரும் மாணவர்கள், சராசரியாக படிக்கும் மாணவர்கள் மற்றும் கிராமப்புற மாணவர்கள் இனி தயக்கமின்றி பொறியியல் படிப்புகளை தங்கள் மொழியில் கற்கலாம் என்ற மகிழ்வான நிலையை ஏற்படுத்தியுள்ளது.
|