பாரத ரத்னா விருது நாட்டில் உள்ள அனைத்து அன்னையாருக்கும் சமர்ப்பணம் - சச்சின் !!

கிரிக்கெட் உலகில் எண்ணற்ற பல சாதனைகளை படைத்த சச்சின் டெண்டுல்கர்க்கு, நாட்டின் மிக உயரிய விருதான பாரத ரத்னா விருது வழங்கப்படும் என கடந்த ஆண்டு மத்திய அரசு அறிவித்தது. இதற்கான விழா டில்லியில் உள்ள ஜனாதிபதி மாளிகையில் நேற்று வண்ணமயமாக நடந்தது. அரங்கில் இருந்தவர்கள் உற்சாக கரகோஷம் எழுப்ப, விஞ்ஞானி சி.என்.ஆர்.ராவ், சச்சின் ஆகியோருக்கு ‘பாரத ரத்னா’ விருதை’ ஜனாதிபதி பிரனாப் முகர்ஜி வழங்கினார். இந்நிகழ்ச்சியில் பிரதமர் மன்மோகன் சிங், சச்சின் மனைவி அஞ்சலி, மகள் சாரா உள்ளிட்ட பல வி.ஐ.பி.,க்கள் கலந்து கொண்டனர். 

இந்த நிகழ்ச்சியில், பாரத ரத்னா விருது பெற்றது குறித்து சச்சின் டெண்டுல்கர் கூறியதாவது, பாரத ரத்னா’ விருதை எனக்கு கிடைத்த மிகப் பெரும் கவுரவமாக கருதுகிறேன். ஏற்கனவே கூறியது போல, இவ்விருதை என் தாயாருக்கு மட்டுமல்லாமல், தங்களது குழந்தைகளின் கனவு நனவாக நிறைய தியாகங்களை செய்த இந்தியாவில் உள்ள அனைத்து தாய்மார்களுக்கும் சமர்ப்பிக்கிறேன்.

அழகான இந்திய நாட்டில் பிறந்ததற்கு, பெருமை அடைகிறேன். நீண்ட காலமாக என் மீது அன்பு செலுத்தி, ஆதரவு அளித்து வருபவர்களுக்கு நன்றி. கிரிக்கெட்டில் இருந்து ஓய்வு பெற்றாலும், இந்திய மக்களின் மனங்களில் புன்னகை பூக்கச் செய்ய என்னால் முடிந்த அளவுக்கு தொடர்ந்து முயற்சி செய்வேன். ‘பாரத ரத்னா’ விருது பெற்ற அறிவியல் விஞ்ஞானி சி.என்.ஆர்.ராவிற்கு எனது வாழ்த்துகள் என சச்சின் கூறினார்.

இந்த விருதை பெற்றதன் மூலம், மிக குறைந்த வயதில் பாரத ரத்னா விருதை தட்டிச் சென்றவர் என்ற பெருமை சச்சின் பெற்றுள்ளார். இது தவிர, இவ்விருதை பெறும் முதல் விளையாட்டு வீரர் என்ற சாதனையும் படைத்தார்.