ஆல் இன் ஆல் அழகுராஜா திரைப்படத்தில் சந்தானத்தின் சர்ச்சைக்குரிய காட்சி நீக்கப்பட்டு விட்டதாக, அந்த படத்தின் இயக்குனர் ராஜேஷ் தெரிவித்துள்ளார்.
ராஜேஷ் இயக்கத்தில், கார்த்தி - காஜல் அகர்வால், சந்தானம் ஆகியோர் நடித்து வரும் படம் ஆல் இன் ஆல் அழகுராஜா. இந்த படம் வரும் தீபாவளிக்கு ரிலீசாக இருக்கிறது. இந்த படத்தின் ட்ரைலர் காட்சிகள் சமீபத்தில் வெளியாகியது. இதில், சந்தானம் ஒரு காட்சியில், புகையிலை மற்றும் குட்கா எதிர்ப்பு விளம்பரத்தை கிண்டலடிப்பது போல காட்சி அமைக்கப்பட்டுள்ளது. இந்த காட்சிக்கு கடும் எதிர்ப்பு தெரிவித்துள்ள தமிழ்நாடு புகையிலை கட்டுப்பாட்டு மக்கள் மன்றம் இதுகுறித்து தமிழக அரசிடம் புகார் தெரிவித்தது. குட்கா சாப்பிட்டு புற்றுநோயால் இறந்த முகேஷ் என்ற மனிதன் தன் குரலால் நாட்டு மக்களை எச்சரிக்கும் வகையில் உருவாக்கப்பட்ட இந்த விளம்பரத்தைக் கிண்டலடிப்பதா என கண்டனம் தெரிவித்திருந்தது அந்த அமைப்பு, சர்ச்சைக்குரிய அந்தக் காட்சியை படத்திலிருந்து நீக்க வேண்டும் என்றும் வலியுறுத்தியது, இதனை அடுத்து, அந்தக் காட்சியே புகையிலைக்கு எதிரான பிரச்சாரம் என்று விளக்கமளித்திருந்தார் இயக்குநர் ராஜேஷ். அதனை ஏற்க மறுத்து எதிர்ப்புகள் அதிகரித்ததால், சர்ச்சைக்குரிய அந்தக் காட்சியை நீக்குமாறு சென்சார் அதிகாரிகள் அறிவுறுத்தியுள்ளனர். இதைத் தொடர்ந்து சர்ச்சைக்குரிய அந்தக் காட்சியை படத்திலிருந்து நீக்கிவிட்டதாக இயக்குனர் ராஜேஷ் அறிவித்துள்ளார்.
|