அவர்க்கு இவர்க்கு வந்தவர்க்கு என எழுதும் போது ரு போடாமல் எழுதுங்கள் !!

அவர்க்கு இவர்க்கு வந்தவர்க்கு போனவர்க்கு என்று ‘ரு’ போடாமல் எழுதக் கோரியிருந்தேன். பலர் எழுதுவதைப் பார்க்கிறேன். மகிழ்ச்சி. அதேபோல் நாம் செய்கின்ற மற்றொரு தவறு உகரத்தில் முடியும் பெயர்ச்சொற்களுக்கு நடுவில் ‘வு’ போடுவது. வைரமுத்துவுக்கு விருது கொடுத்தோம், குமரிமுத்துவுக்குப் பொன்னாடை போர்த்தப்பட்டது - என்று எழுதுகிறோம். நன்றாக யோசித்துப் பாருங்கள். அன்புக்கு நான் அடிமை’ என்கிறோமா ? அன்புவுக்கு நான் அடிமை என்கிறோமா ? முத்துக்கு முத்தாக என்கிறோம்... முத்துவுக்கு முத்தாக’ என்பதில்லை. சொத்துக்கு அடித்துக்கொள்கிறார்கள்’ என்கிறோம். சொத்துவுக்கு அடித்துக்கொள்கிறார்கள் என்பதில்லை. அதனால் உகரத்தில் முடியும் பெயர்ச்சொற்களுக்குக் ‘கு’ சேர்க்கும்போது ‘வு’ தவிர்த்து நேரடியாகப் புணர்த்தி வைரமுத்துக்கு, குமரிமுத்துக்கு என்றே எழுதுங்கள் !

- கவிஞர் மகுடேசுவரன்