ஐந்தாம் திருமுறை-4

5.004.திருவண்ணாமலை 

திருக்குறுந்தொகை

திருச்சிற்றம்பலம் 

இத்தலம் நடுநாட்டிலுள்ளது. 

சுவாமிபெயர் - அருணாசலேசுவரர். 

தேவியார் - உண்ணாமுலையம்மை. 

1102 வட்ட னைம்மதி சூடியை வானவர்

சிட்ட னைத்திரு வண்ணா மலையனை

இட்ட னையிகழ்ந் தார்புர மூன்றையும்

அட்ட னையடி யேன்மறந் துய்வனோ. 5.004.1

  கந்தையுடை அணிந்தானும், மதிசூடியும், வானவர்க்கு உயர்ந்தானும், திருவண்ணாமலை வடிவினனும், விருப்பம் உடையானும், இகழ்ந்தார் புரங்கள் மூன்றினையும் அட்டானும் ஆகிய பெருமானை அடியேன் மறந்து உய்தலும் கூடுமோ.

1103 வான னைம்மதி சூடிய மைந்தனைத்

தேன னைத்திரு வண்ணா மலையனை

ஏன னையிகழ்ந் தார்புர மூன்றெய்த

ஆன னையடி யேன்மறந் துய்வனோ. 5.004.2

  வானத்துள்ளவனும், பிறைசூடிய பேராற்றல் உடையவனும், தேனென இனிப்பவனும், திருவண்ணாமலைத் தலத்துக்கு உடையவனும், பன்றிக்கொம்பை அணிந்தவனும், இகழ்ந்தார் புரங்கள் மூன்றினையும் எய்த விடையேறுடையவனும் ஆகிய பெருமானை அடியேன் மறந்து உய்தலுங் கூடுமோ.

1104 மத்த னைம்மத யானையு ரித்தவெஞ்

சித்த னைத்திரு வண்ணா மலையனை

முத்த னைம்முனிந் தார்புர மூன்றெய்த

அதத னையடி யேன்மறந் துய்வனோ. 5.004.3

  ஊமத்தமலர் அணிந்தவனும், யானைத் தோலை உரித்துப் போர்த்து எம் சித்தத்துறைபவனும், திருஅண்ணாமலைத் தலத்துக்குடையவனும், முத்தனும், முனிந்தார் புரங்கள் மூன்றையும் எரியுண்ணச்செய்த அத்தனுமாகிய பெருமானை அடியேன் மறந்து உய்தலுங் கூடுமோ.

1105 காற்ற னைக்கலக் கும்வினை போயறத்

தேற்ற னைத்திரு வண்ணா மலையனைக்

கூற்ற னைக்கொடி யார்புர மூன்றெய்த

ஆற்ற னையடி யேன்மறந் துய்வனோ. 5.004.4

  காற்றாகியுள்ளவனும், கலக்குகின்ற வினைகள் விட்டு நீங்கத் தோற்றம்புரிபவனும், திருவண்ணாமலைத் தலத்துக் குடையவனும், உலகினை நன்றுந் தீதுமாய்க் கூறுசெய்து வகுத்தவனும், கொடியவர் புரங்கள் மூன்றையும் எய்த வீரநெறி உடையவனுமாகிய பெருமானை அடியேன் மறந்து உய்தலுங் கூடுமோ.

1106 மின்ன னைவினை தீர்த்தெனை ஆட்கொண்ட

தென்ன னைத்திரு வண்ணா மலையனை

என்ன னையிகழ்ந் தார்புர மூன்றெய்த 

அன்ன னையடி யேன்மறந் துய்வனோ. 5.004.5

  மின் ஒளியுருவாயவனும், வினைகளைப் போக்கி என்னை ஆட்கொண்ட அழகியவனும், திருவண்ணாமலைத் தலத்துக்குடையவனும், என்னை உடையவனும், இகழ்ந்தவர் புரங்கள் மூன்றையும் எய்த அத்தன்மையனும் ஆகிய பெருமானை அடியேன் மறந்து உய்தலுங் கூடுமோ.

1107 மன்ற னைம்மதி யாதவன் வேள்விமேல்

சென்ற னைத்திரு வண்ணா மலையனை

வென்ற னைவெகுண் டார்புர மூன்றையுங்

கொன்ற னைக்கொடி யேன்மறந் துய்வனோ. 5.004.6

  ஐந்துவகை மன்றங்களில் (சபைகளில்) எழுந்தருளியிருப்பவனும், மதியாத தக்கன் வேள்வியின்மேல் உருத்துச் சென்றவனும், திருவண்ணாமலைத் தலத்துக்கு உடையவனும், புலனைந்தும் வென்ற வென்றி உடையவனும், சினந்தார் புரங்கள் மூன்றையும் கொன்றவனும் ஆகிய பெருமானைக் கொடிய வனாகிய அடியேன் மறந்து உய்தலுங் கூடுமோ.

1108 வீர னைவிட முண்டனை விண்ணவர்

தீர னைத்திரு வண்ணா மலையனை

ஊர னையுண ரார்புர மூன்றெய்த

ஆர னையடி யேன்மறந் துய்வனோ. 5.004.7

  வீரச்செயல்களைப் புரிந்தவனும், விடம் உண்டவனும், விண்ணவர்க்கு அச்சம் நீக்குபவனும், திருவண்ணாமலை வடிவினனும், மருத நிலத்தை இடங்கொண்டவனும், உணராதவர் புரங்கள் மூன்றையும் எய்தவனும், ஆத்திமாலை சூடியவனுமாகிய பெருமானை அடியேன் மறந்து உய்தலுங் கூடுமோ.

1109 கருவி னைக்கடல் வாய்விட முண்டவெம்

திருவி னைத்திரு வண்ணா மலையனை

உருவி னையுண ரார்புர மூன்றெய்த

அருவி னையடி யேன்மறந் துய்வனோ. 5.004.8

  கருவாயிருந்து காப்பவனும், கடலெழு நஞ்சு உண்ட எம்திருவாகியவனும், திருவண்ணாமலை வடிவினனும், உருவத்திருமேனி உடையவனும் உணராதவர் புரங்கள் மூன்றையும் எய்தவனும், அருவத்திருமேனி உடையவனுமாகிய பெருமானை அடியேன் மறந்து உய்தலுங் கூடுமோ.

1110 அருத்த னையர வைந்தலை நாகத்தைத்

திருத்த னைத்திரு வண்ணா மலையனைக்

கருத்த னைக்கடி யார்புர மூன்றெய்த

அருத்த னையடி யேன்மறந் துய்வனோ. 5.004.9

  பொருள் வடிவாயுள்ளவனும், ஐந்தலையுடைய நாகத்தைத் திருந்த அணிந்தவனும், திருவண்ணாமலை வடிவினனும், தலைவனானவனும், தீக்குணங்களைக் கடியாதார் புரங்கள் மூன்றையும் எய்தவனும், உயிர்களுக்கு வினைப்பயனைப் பிறழாது நுகர்விப்போனும் ஆகிய பெருமானை அடியேன் மறந்து உய்தலுங்கூடுமோ.

1111 அரக்க னையல றவ்விர லூன்றிய

திருத்த னைத்திரு வண்ணா மலையனை

இரக்க மாயென் உடலுறு நோய்களைத்

துரக்க னைத்தொண்ட னேன்மறந் துய்வனோ. 5.004.10

  இராவணன் அலறுமாறு அழகிய திருவிரலை ஊன்றிய திருத்தமானவனும். திருவண்ணாமலை வடிவினனும், இரக்கம் கொண்டு என் உடலில் உற்ற நோய்களைத் துரத்திய அருளாளனுமாகிய பெருமானைத் தொண்டுபுரியும் அடியேன் மறந்து உய்தலுங் கூடுமோ.

திருச்சிற்றம்பலம்