மகளின் மாண்பு - பாவலர் கருமலைத்தமிழாழன்

இரண்டாம் போர் உலகத்தில் மூண்டபோதோ
இரக்க மற்ற செர்மனியின் நாசியர்கள்
கரம் பிணைத்தே உருசியாவின் வீரர் தம்மை!
கடுஞ்சிறையில் கைதிகளாய் அடைத்து வைத்தே
உரமழிக்க வீரர்கட் குணவும் நீரும்
உறைய வைக்கும் குளிருக்கு போர்வை ஏதும்
தரமறுத்தே பட்டினியில் துடிதுடிக்கத்
தாங்கொண்ணாகொடுமை செய்து சாகடித்தார் !

நாள்தோறும் நூற்றுக்கும் மேலாய் வீரர்
நலிந்து சிறை உள்ளேயே மாண்டுபோக
நாள் கடந்தும் வயதான முதிய வீரன்
நலிவின்றி எலும்புதோலாய் ஆனபோதும்
தாள்பதித்து நடக்கின்ற வலிமையோடு
தாங்கி துயர் உயிரோடே இருக்கக்கண்டு
நீள்சிறையைப் பாதுகாக்கும் நாசியர்கள்
நீண்ட தொரு ஐயத்தில் குழம்பி நின்றார்!

சிறையடைத்த வீரரினைக் காண்பதற்கும்
சிறைக்குள்ளே யாரையுமே விட்டிடாமல்
வரையறுத்த கடுமையான கட்டுப்பாட்டில்
வாய்த்தரத்த உறவை மட்டும் துரும்பைக்கூட
சிறைக்குள்ளே எடுத்து செல்ல இயலாவாறு
சிறப்பாகச் சோதித்தே அனுமதித்தும்
குறையாத நலமுடனே முதியவீரன்
குந்திருக்கநாசியர்கள் வியந்து நின்றார் !


அற்புதந் தான் சிறைக்குள்ளே நிகழ்ந்த தென்ன
அடைத்து வைத்த முதிய வீரன் தம்மைக்காணப்
பொற்புதல்வி நாள் தோறும் வந்தபோது
பொறுப்புடனே தான் பெற்ற குழந்தைக்கூட்டும்
நற்பாலைத் தந்தை வாய் ஊட்டிவிட்டே
நலம் காத்து நாடுதனைக் காப்பதற்கே
உற்ற துணையாய் நின்ற தியாகத்தால் தான்
உயர்நாட்டைத் தாய் நாடாய்ப் போற்றுகின்றோம் !

(சிறைக்குள்ளே அடைக்கப்பட்டுள்ள தந்தைக்குப் பாலூட்டும் மகளின் தியாகத்தின் சாட்சியாக சோவியத் நாட்டு லெனின் கிராட் அருங்காட்சியகத்தில் நெஞ்சை நெகிழ வைக்கும் ஓவியமாக இன்றும் காட்சியளித்துக் கொண்டிருக்கிறது)

(மார்ச்சு  8  இன்று உலக மகளிர் நாளில்   பெயர் தெரியா  அப்பெண்ணிற்காய்  இக்கவிதையைப்  படைக்கின்றேன் )