மூன்றாம் திருமுறை-99

3.099.திருமுதுகுன்றம் 
பண் - சாதாரி 
திருச்சிற்றம்பலம் 

இத்தலம் நடுநாட்டிலுள்ளது - இதுவே விருத்தாசலம். 
சுவாமிபெயர் - பழமலைநாதர். தேவியார் - பெரியநாயகியம்மை. 

3864 முரசதிர்ந் தெழுதரு முதுகுன்ற மேவியபரசமர் படையுடை யீரேபரசமர் படையுடை யீருமைப் பரவுவார்அரசர்க ளுலகிலா வாரே 3.099.1
பூசை, திருவிழா முதலிய காலங்களில் முரசு அதிர்ந்து பேரோசை ஏழுப்புகின்ற திருமுதுகுன்றம் என்னும் திருத்தலத்தில் விரும்பி வீற்றிருந்தருளுகின்ற மழுப்படையை உடைய சிவபெருமானே! மழுப்படையையுடைய உம்மைப் போற்றி வணங்குபவர்கள் உலகினில் அரசர்கள் ஆவர் . 

3865 மொய்குழ லாளொட முதுகுன்ற மேவியபையர வம்மசைத் தீரேபையர வம்மசைத் தீருமைப் பாடுவார்நைவிலர் நாடொறு நலமே 3.099.2
அடர்ந்த கூந்தலையுடைய உமாதேவியோடு திருமுதுகுன்றம் என்னும் திருத்தலத்தில் விரும்பி வீற்றிருந்தருளுகின்ற, பாம்பைக் கச்சாக அரையில் கட்டியுள்ள சிவபெருமானே! பாம்பைக் காச்சாகக் கட்டியுள்ள உம்மை பாடுவார் எவ்விதக் குறையும் இல்லாதவர். நாள்தோறும் நன்மைகளையே மிகப்பெறுவர். 

3866 முழவமம் பொழிலணி முதுகுன்ற மேவியமழவிடை யதுவுடை யீரேமழவிடை யதுவுடை யீருமை வாழ்த்துவார்பழியொடு பகையிலர் தாமே 3.099.3
முழவுகள் ஒலிக்கின்றதும், சோலைகளால் அழகு பெற்றதுமான திருமுதுகுன்றம் என்னும் திருத்தலத்தில் விரும்பி வீற்றிருந்தருளுகின்ற, இளமைவாய்ந்த இடபத்தை, வாகனமாகவும் கொடியாகவும் உடைய சிவபெருமானே! இளமைவாய்ந்த இடபத்தை வாகனமாகவும், கொடியாகவும் கொண்ட உம்மை வாழ்த்துபவர்கள் பழியும், பாவமும் இல்லாதவர்கள் ஆவர். 

3867 முருகமர் பொழிலணி முதுகுன்ற மேவியஉருவமர் சடைமுடி யீரேஉருவமர் சடைமுடி யீருமை யோதுவார்திருவொடு தேசினர் தாமே 3.099.4
வாசனை பொருந்திய சோலைகள் அழகு செய்கின்ற திருமுதுகுன்றம் என்னும் திருத்தலத்தில் விரும்பி வீற்றிருந்தருளுகின்ற, அழகு பொருந்திய சடைமுடியினையுடையவரே! அழகு பொருந்திய சடைமுடியினை உடையவராகிய உம்மைப் போற்றி வணங்குபவர்கள் செல்வமும், புகழும் உடையவர். 

3868 முத்தி தருமுயர் முதுகுன்ற மேவியபத்து முடியடர்த் தீரேபத்து முடியடர்த் தீருமைப் பாடுவார்சித்தநல் வவ்வடி யாரே 3.099.8
முத்தியைத் தருகின்ற உயர்ந்த திருமுதுகுன்றம் என்னும் திருத்தலத்தில் விரும்பி வீற்றிருந்தருளுகின்றவரும், இராவணனின் பத்துத் தலைகளையும் அடர்த்தவருமான சிவபெருமானே! இராவணனின் பத்துத் தலைகளையும் அடர்த்த உம்மைப் பாடுவார் அழகிய சித்தமுள்ள அடியவர்களாவார்கள். 

3869 முயன்றவ ரருள்பெறு முதுகுன்ற மேவியன்றியன்றவ ரறிவரி யீரேஇயன்றவ ரறிவரி யீருமை யேத்துவார்பயன்றலை நிற்பவர் தாமே 3.099.9
தவநெறியில் முயல்பவர்கள் அருள்பெறுகின்ற திருமுதுகுன்றம் என்னும் திருத்தலத்தில் விரும்பி வீற்றிருந்தருளுகின்ற, அன்று தம் செருக்கால் காணத் தொடங்கிய பிரமன், திருமால் இவர்களால் காண்பதற்கு அரியவராக விளங்கிய சிவபெருமானே! பிரமனும், திருமாலும் அறியவொண்ணாதவராகிய உம்மைப் போற்றி வழிபடுவர்கள் சிறந்த பயனாகிய முத்தியைத் தலைக்கூடுவர். 

3870 மொட்டலர் பொழிலணி முதுகுன்ற மேவியகட்டமண் டேரைக்காய்ந் தீரேகட்டமண் டேரைக்காய்ந் தீருமைக் கருதுவார்சிட்டர்கள் சீர்பெறு வாரே 3.099.10
மொட்டுக்கள் மலர்கின்ற சோலைகளையுடைய அழகிய திருமுதுகுன்றத்தில் விரும்பி வீற்றிருந்தருளுகின்ற, கட்டுப்பாட்டினையுடைய சமணர்களையும், புத்தர்களையும் கோபித்தவரான சிவபெருமானே! சமணர்களையும், புத்தர்களையும் கோபித்த உம்மைத் தியானிப்பவர்கள் சிறந்த அடியார்கள் பெறுதற்குரிய முத்திப்பேற்றினைப் பெறுவர். 

3871 மூடிய சோலைசூழ் முதுகுன்றத் தீசனைநாடிய ஞானசம் பந்தன்நாடிய ஞானசம் பந்தன செந்தமிழ்பாடிய அவர்பழி யிலரே 3.099.11
அடர்ந்த சோலைகள் சூழ்ந்த திருமுதுகுன்றம் என்னும் திருத்தலத்தில் விரும்பி வீற்றிருந்தருளும் சிவபெருமானைத் திருஞானசம்பந்தர் போற்றி அருளினார். அவ்வாறு திருஞானசம்பந்தர் போற்றியருளிய இச்செந்தமிழ்ப் பதிகத்தைப் பாடுபவர்கள் பழியிலர் ஆவர். 

திருச்சிற்றம்பலம்